Obaia 1

Obaia

Pueꞌ Ala ina mohuku toEdo

Deꞌe miꞌi ngkóráꞌ to napahaweꞌ Pueꞌ ALA i nabiꞌ Obaia moliu pampetudeꞌá. LaluitaNa deꞌe mokana i toEdo.

Kihádi miꞌi bámbári deꞌe hangko i PUEꞌ.

Hadua tauna nahuoꞌ PUEꞌ lao mopahaweꞌ laluitaNa

i upu-upu tauna i duniáꞌ. Nauliꞌ node:

“Maikeꞌ mopatimama bona laokeꞌ mampombealaꞌá toEdo.”

2 Nauliꞌ PUEꞌ i toEdo, “Ina Kupamaledeꞌkou

hai upu-upu tauna ina mokáhihiꞌkou.

3 Pampepemahilemi ina napakanawoꞌkou.

Pehodaꞌána popárentámi i buluꞌ watu to maróhó,

hai toroꞌkou i tutuꞌ buluꞌ to mapángkáꞌ,

onoꞌ miꞌi haneꞌi niuliꞌ i lalumi,

“Heáná to mobuku mopakanawoꞌangkaiꞌ?”

4 Kehapiꞌ peisákou membara nodo tádáhi koꞌaaꞌ,

hai támbimi niaró i betue,

agáiáná ina Kupopendáulukou.

Noꞌonoꞌ miꞌi ngkóráꞌna PUEꞌ.

5 Ane topanako ba toperampaꞌ haweꞌ i kómu tangaꞌ káindi,

tiꞌara paꞌi to naparaluu peá to naꞌala?

Ane arai to mopupu wuaꞌna anggoroꞌmi,

tiꞌara paꞌi ara to napopentárá?

Agáiáná kómu, bateꞌna ina rapatunakou ewálimi,

tiꞌara ara to ina mentárá.

6 Ee pemuleꞌána Esau! Kómu ina rarámpákikou,

hai párewámi to niwuni bateꞌna ina raꞌala.

7 Upu-upu tauna to nipohintuwuꞌá ina moákálángikou,

hai ina mowurakou hangko i tampoꞌmi.

Ina raꞌákálángikou rángámi bona ranangikou,

hai ina rapakanawoꞌkou tauna

to mandeꞌ hingkakani hai kómu.

Ina rauliꞌ, “Iumbá kamapánderaꞌ toEdo?

Tiꞌara raisá tunggáiángkiꞌ to kadake i hira.”

8 I alo iti ina Kupatunaheꞌ upu-upu tomapánde

to toroꞌ i buluꞌ-buluꞌna i Edo,

hai hinángkáꞌ kamapánderaꞌ ina Kuwoe.

9 Surudadoꞌmi i kótá Temana ina melangkaheꞌ ánti kamalááꞌraꞌ,

álána upu-upu surudadoꞌmi i buluꞌ-buluꞌna Edo ina rapapate ewáliraꞌ.”

Álásáraꞌ toEdo ina rahuku

10 PUEꞌ manguliꞌ, “Ina Kuhukukou toEdo,

láwiꞌ maseke gagakou i halalumiheꞌ,

iamoheꞌ pemuleꞌána Iako.

Upu-upu tauna ina mokáhihiꞌ ntepuꞌukou,

hai ina rapatunakou haweꞌ i rue-ruena.

11 I tempóraꞌ ewali mopamarugiꞌ bente kótá Ierusale,

mosuaki kótá iti moliu babaꞌána,

meángkáꞌ ngkaraoꞌ pekou.

I tempóraꞌ ewali mobolobiaꞌ

haneꞌi mogáláꞌ-gáláꞌheꞌ kapebukuna Ierusale

bona raꞌánti karaoꞌ,

tiꞌara ara to nibábehi. Hibali pekou hai hira!

12 Katoꞌuána tiꞌara maroꞌa nipogiá

i tempóna halalumiheꞌ iti molámbiꞌ kapári.

Rángina miꞌi ineeꞌkou góeꞌ

i tempóraꞌ pemuleꞌána Iudá molámbiꞌ rugiꞌ.

Ineeꞌkou mampepemahile

i tempóraꞌ masusa.

13 Tiꞌara maroꞌa mesuaꞌkou i kótáraꞌ taunáNgkuꞌ

i tempóraꞌ molámbiꞌ huleáká.

Rángina miꞌi ineeꞌkou góeꞌ ánti kamagerona kótá iti

i tempóraꞌ rapomapári.

Ineeꞌkou mamperámpáki kapebukuraꞌ

i tempóraꞌ mantódihá kapári.

14 Ee toEdo, tiꞌara maroꞌa meángkáꞌkou i porompengaꞌá rárá

bona mopapatekou tauna to mampehukáꞌ mengkatueꞌ.

Rángina miꞌi ineeꞌkou mohakaꞌ tauna to melangka iti

i tempóraꞌ i lalu kapári,

hai mohuhuꞌheꞌ i toBábeli.

Pueꞌ Ala ina mohuku upu-upu tauna

15 Alona PUEꞌ hungkuꞌ miꞌi.

Ia ina mobutusi kara-kara

upu-upu tauna i duniáꞌ.

Apa to nibábehi i tauna ntániꞌna,

ina mewaliꞌ woꞌo i kómu.

Bábehiámi to kadake

ina mesuleꞌ woꞌo i kómu.

16 Nodo taunáNgkuꞌ mainumoheꞌ

i buluꞌKuꞌ to magasaꞌ

hangko i painuáNgkuꞌ to bukeꞌ pehuku,

noꞌonoꞌ woꞌo upu-upu tauna i duniáꞌ

ina mainuheꞌ oaꞌ pehuku duuꞌna tiꞌarapoheꞌ ara.

ToSáráeliꞌ ina menangi

17 Agáiáná i buluꞌ Sio ina ara tauna to tepelae.

Buluꞌ iti ina mewaliꞌ katoroꞌá to magasaꞌ,

hai pemuleꞌánaheꞌ Iako

ina mewaliꞌheꞌ pueꞌ sosora tampoꞌna iti.

18 Pemuleꞌánaheꞌ Iako ina nodo api,

hai toSáráeliꞌ ina mewaliꞌheꞌ

nodo api to roreꞌ,

duuꞌna pemuleꞌánaheꞌ Esau ina tuna,

nodo deami to raintu.

Tiꞌara ara haweꞌ hadua to ina mentárá,

láwiꞌ PUEꞌ mongkóráꞌ miꞌi noꞌonoꞌ.

19 Tauna hangko i tampoꞌ Nege to tándáꞌ i wóiꞌ

ina mokatoroꞌiheꞌ buluꞌ-buluꞌna Edo to tándáꞌ i mata alo.

Tauna hangko i biti buluꞌ

ina mokatoroꞌiheꞌ tampoꞌraꞌ toPelisitiꞌ to tándáꞌ i wóiꞌ i katámpuá alo.

Ina mokatoroꞌiheꞌ woꞌo pádáraꞌ toEparai hai Samaria

to tándáꞌ i wongko,

hai toBenami ina mokatoroꞌi tampoꞌ Gileaꞌ

to i wóiꞌna rano Galilea.

20 ToSáráeliꞌ to ratawani hangko i kadatuá Sáráeliꞌ to tándáꞌ i wongko,

pemuleꞌáraꞌ ina mesuleꞌ hangko i karatawaniáraꞌ,

hai ina mokatoroꞌiheꞌ tampoꞌ Kánáꞌá

haweꞌ i Sarapaꞌ to tándáꞌ i wongko i katámpuá alo.

ToIudá to ratawani i Saparaꞌ,

pemuleꞌáraꞌ ina mesuleꞌ

haneꞌi mokatoroꞌi wánuá-wánuá to i tampoꞌ Nege.

21 Topetulungi hangko i buluꞌ Sio

ina laoheꞌ mepárentá i buluꞌ-buluꞌna Edo.

Hai kahópóꞌána upu-upu kadatuá i duniáꞌ,

ina napárentái PUEꞌ.