Danieli 8

Dimbá laki hai bekeꞌ laki

I katáluna parena popárentána Datu Belesasa,^a

kódóꞌ Danieli molámbiꞌ wopaꞌaꞌ pampetudeꞌá to karompákáꞌna.

2 I lalu pampetudeꞌá iti,

kódóꞌ araꞌaꞌ i kótá Susana to natolelingi bente to maróhó,

to ara i poropensi Elam.

I lalu pampetudeꞌá iti,

kódóꞌ meángkáꞌaꞌ i wiwi uwai Ulai.

3 I wiwi uwai iti,

kuita hambaꞌa dimbá laki^b meángkáꞌ,

hai tánduꞌna rombuaꞌ kálángá,

agáiáná hangkau melosoꞌ kakálángána.

To melosoꞌ kakálángána iti,

i bókóꞌ tueꞌ.

4 Kuita dimbá iti metánduꞌ melindoꞌ tándáꞌ i katámpuá alo,

tándáꞌ i wongko,

hai tándáꞌ i wóiꞌ.^c

Binataꞌ iti maróhó ntepuꞌu,

onoꞌ miꞌi haneꞌi tiꞌara ara binataꞌ to monangi,

hai tiꞌara ara haweꞌ hambaꞌa binataꞌ to peisá tekábáhá hangko i kamakuasaꞌna.

Binataꞌ iti maꞌángkáꞌ ntepuꞌu hai mouláꞌ peá peundeꞌána haduduána.

5 Tangaꞌkuꞌ mani mampeita binataꞌ iti,

iaperái hangkaꞌ mesuwuꞌ hambaꞌa bekeꞌ laki^d hangko tándáꞌ i katámpuá alo.

Ia melangka duuꞌna haweꞌ i pembetoá alo.

Ánti kamagásiꞌna,

bitina tiꞌara piꞌi tóá i tampoꞌ.

Tánduꞌna bekeꞌ iti hangkau peá hai mahile ntepuꞌu,

tueꞌ i hiliꞌ mátána.

6 I kahaweꞌna bekeꞌ iti,

liliu mohungkuki dimbá to kuita meángkáꞌ i wiwi uwai.

Bekeꞌ iti masodo ntepuꞌu.

Ia kásáliu moewaꞌ dimbá iti.

7 Kuita bekeꞌ iti mohungkuki dimbá iti,

hai ánti kamasodona,

ia motánduꞌ dimbá iti duuꞌna matepóꞌ tánduꞌna to rombuaꞌ.

Láwiꞌ tiꞌara piꞌi ara róhóna meꞌewaꞌ,

dimbá iti nahepenga bekeꞌ i tampoꞌ haneꞌi nakada-kada.

Tiꞌara ara haweꞌ hadua to nabuku mamperuruꞌi dimbá iti.

8 Ánti kamenangina bekeꞌ iti,

mantámbái kamaꞌángkáꞌna hai kamakuasaꞌna.

Agáiáná i tempóna maróhó ntepuꞌu kuasaꞌna,

matepóꞌ tánduꞌna to mahile,

haneꞌi i katepóꞌána tánduꞌ iti,

nakatueꞌi iba wuaꞌna tánduꞌ to mahile,

hambuaꞌ-hambuaꞌ montaniꞌ pelindoꞌána mouláꞌ mata angi.

9 Hangko i hambuaꞌ tánduꞌ to iba iti,

mesupaꞌ hambuaꞌ tánduꞌ to kókóiꞌ,^e

hai tueꞌ duuꞌna mahile ntepuꞌu.

Kamakuasaꞌna haweꞌ-haweꞌ tándáꞌ i wóiꞌ,

tándáꞌ i pembetoá alo,

hai haweꞌ woꞌo tándáꞌ i tampoꞌ Sáráeliꞌ,

tampoꞌ to meawaꞌ.

10 Tánduꞌ iti kamahile-hileá hai maróhó,

onoꞌ miꞌi haneꞌi nabuku moewaꞌ surudadoꞌ surugáꞌ.^f

Hantángáꞌ surudadoꞌ surugáꞌ iti nanawoꞌheꞌ i tampoꞌ haneꞌi nakada-kada.

11 Mogalo riꞌi Tadulako Surudadoꞌ i Surugáꞌ,^g

naewaꞌ,

hai popenómbá to rahuhuꞌ alo-alona i Pueꞌ,

napekóntói.

Noꞌonoꞌ woꞌo Támbina Pueꞌ Ala to magasaꞌ ina nagero.

12 Tánduꞌ to kókóiꞌ iti mopaliu surudadoꞌna mampopengkaroo pohuhuꞌ popenómbá to raintu alo-alona,

tandaꞌ peꞌewaꞌna,

hai apa to manótó natitibei.^h

Upu-upuna to naundeꞌ nabábehi,

ina mewaliꞌ.

13 Hangko ionoꞌ,

kuhádi rodua malaꞌeka mombekuneꞌheꞌ,

rauliꞌ,

“Hangapa mani kamaruena hangko mewaliꞌ riꞌi pampetudeꞌá deꞌe?

Hangapa mani kamaruena dósá ina mokuasaꞌiheꞌ tauna to mohuhuꞌ popenómbáraꞌ i Pueꞌ?ⁱ

Hai hangapa mani kamaruena Pueꞌ Ala ina mopatodáhi támbi penómbáꞌá hai surudadoꞌ surugáꞌ ina nakada-kada tánduꞌ to kókóiꞌ iti?”

14 Nahániki malaꞌeka to ntániꞌna,

“Rosábu tálu átuna mani kánina,

tiꞌaraheꞌ peisá mohuhuꞌ popenómbá alo-alona i Pueꞌ,

ia miꞌi mepulo hai kalumbaꞌ.

{Kamaruena iti hasábu hangatu lima puloꞌna alona.

}^j Liu riꞌi tempó iti,

{hangko peisá wopaheꞌ mohuhuꞌ popenómbáraꞌ,

láwiꞌ} Támbina Pueꞌ Ala ina rapamagasaꞌ huleꞌ.”

Malaꞌeka Gábáráeliꞌ motótóráká pampetudeꞌá

15 Tangaꞌna mani kupepekiri apa lempóna pampetudeꞌá iti,

iaperái hangkaꞌ meángkáꞌ i lindoꞌkuꞌ to nodo hadua tauna tobaleilo.

16 Roo onoꞌ,

kuhádi wopiꞌi wambaꞌ tauna to ntániꞌna hangko i uwai Ulai to molaluita,

nauliꞌ node:

“Gábáráeliꞌ,

nupakanótóá miꞌi tobaleilo iti bona naisá apa lempóna pampetudeꞌá deꞌe.”

17 Mewaliꞌ mai mpuꞌu miꞌi mengkahungkuꞌ i kódóꞌ.

Kahungkuꞌna peá i kódóꞌ,

malááꞌaꞌ,

mewaliꞌ madungkáꞌaꞌ tepalumbá.

Kanaitángkuꞌ peá tepalumbá,

nahángáꞌáꞌáꞌaꞌ,

“Bona nuisá,

ánáꞌ mánusiá:

pampetudeꞌá iti mokana i kahópóꞌána duniáꞌ.”

18 Tangaꞌna mani molaluita i kódóꞌ,

liliuaꞌ malimpu i katepambákáꞌángkuꞌ,

agáiáná natibaaꞌaꞌ Gábáráeliꞌ bona kubuku peá meángkáꞌ,

haneꞌi nauliꞌ,

19 “Ina kuhángáꞌáꞌákoꞌ apa to ina mewaliꞌ i kahópóꞌána duniáꞌ i tempó kamabukoꞌna Pueꞌ Ala.

20 Mokana dimbá to nuita iti to motánduꞌ rombuaꞌ,

molempónga rodua datu,

ia miꞌi daturaꞌ toMedia hai daturaꞌ toPeresia.

21 Bekeꞌ laki iti,

molempónga kadatuá Iunani,

hai tánduꞌ to mahile to tueꞌ i hiliꞌ mátána,

molempónga datu to rungu-runguna i kadatuá iti.^k

22 Iba wuaꞌna tánduꞌ to mesupaꞌ i katepóꞌána tánduꞌ to mahile,^l

lempóna,

iba kadatuá ina mesupaꞌ hangko i kadatuána Iunani,

agáiáná kamaróhóna tiꞌara ina hibali hai kadatuá to rungu-runguna.

23 I tempó kahópóꞌána kadatuá iti,

bábehiá tauna ina mantámbái ntepuꞌu kakadakena.

I tempó onoꞌ woꞌo,

hadua datu to masodo ntepuꞌu hai mapánde meákálángi^m ina mantepuꞌu mepárentá.

24 Ia ina mewaliꞌ maróhó,

agáiáná kamaróhóna iti tiꞌara róhóna haduduána.

Ia ina mopatuna upu-upu {to tiꞌara mouláꞌ párentána}.

Hai apa peá to nabábehi,

ina mewaliꞌ.

Upu-upu tauna to makuasaꞌ ina napapate,

noꞌonoꞌ woꞌo tauna to mepoinálái i Pueꞌ.

25 Ánti kamapándena meákálángi,

handaꞌ tauna to tiꞌara mosangka-sangka kaꞌina napapateraꞌ.

Apa peá to nabábehi hangaa-ngaa mewaliꞌ,

onoꞌ miꞌi haneꞌi ia ina mewaliꞌ maꞌángkáꞌ ntepuꞌu,

hai ina pebáiꞌ moewaꞌ Pueꞌ Ala,

Datu to melumbuꞌ kamakuasaꞌNa hangko i upu-upu datu.

Agáiáná ina haweꞌ tempóna datu iti ina manangi,

agáiáná tiꞌara tauna to ina monangi.ⁿ

26 Mokana i pampetudeꞌá pohuhuꞌ popenómbá kalumbaꞌ hai mepulo,^o

pampetudeꞌá iti toꞌu kaꞌina mewaliꞌna,

agáiáná hangaa-ngaa nuwuniángi i heáná peá láwiꞌ pewaliꞌána deꞌe marue mani hangko mewaliꞌ riꞌi.”

27 Karoongkuꞌ molámbiꞌ pampetudeꞌá moliu paturungkuꞌ,

kódóꞌ Danieli maledeꞌ ntepuꞌuaꞌ hai tiꞌara kulalu bahanoumbá alona kamaruena.

I kakulaluna miꞌi,

timama wopaꞌaꞌ mampopolumao bágóꞌ to nahawaꞌiáꞌaꞌ Datu Belesasa,

agáiáná masusa oaꞌ lalungkuꞌ mampekiri apa lempóna pampetudeꞌá iti.