Pueꞌ Ala peá to hintotoꞌ ratóiá
135
Haleluia!Nitóiá miꞌi PUEꞌ.
Ee upu-upu huoꞌána PUEꞌ,
nitóiá miꞌi.
2 Ee kómu to mai mobágóꞌ i támbina PUEꞌ,
i tangabaa támbina Pueꞌ Ala to tapenómbái,
3 nitóiá miꞌi PUEꞌ,
láwiꞌ Ia maroꞌa ntepuꞌu.
Mamponanikou nani petóiá i PUEꞌ,
láwiꞌ Ia maroꞌa ntepuꞌu.
4 PUEꞌ mopileꞌi miꞌi pemuleꞌánaheꞌ Iako mewaliꞌ taunáNa,
toSáráeliꞌheꞌ iti to Napokaꞌahiꞌ mewaliꞌ taunáNa to Napokaꞌahiꞌ.
5 Kuisá PUEꞌ makuasaꞌ ntepuꞌu,
Pueꞌ to tapenómbái melumbuꞌ kuasaꞌNa
hangko i upu-upu pueꞌraꞌ tauna ntániꞌna.
6 PUEꞌ mobábehi apa peá to Naundeꞌ,
maroꞌa i langiꞌ, maroꞌa i tampoꞌ,
maroꞌa i tahiꞌ, hai i tahiꞌ to kaladu ntepuꞌu.
7 Ia mopaꞌara gawu to haweꞌ hangko i wuntu duniáꞌ,
Ia mopaꞌara kiláꞌ hai udá,
Ia mopaꞌara wui to haweꞌ hangko i karawoliána.
8 Ia miꞌi to mopapate
upu-upu tobaleilo to towutuꞌ i tampoꞌ Másiriꞌ,
hai upu-upu uluánáꞌ binataꞌ.
9 Ia mopaꞌara tandaꞌ-tandaꞌ to metitingkáráki
i oloꞌraꞌ toMásiriꞌ.
Ia moewaꞌ Piraoꞌ hai upu-upu topobágóꞌna.
10 Ia miꞌi to mopatuna handaꞌ tauna i tampoꞌ ntániꞌna,
hai mopapate datu-datu to makuasaꞌ,
11 rápáꞌna Siho daturaꞌ toAmori,
hai Og datu i tampoꞌ Basana,a
hai upu-upu datu ntániꞌna i tampoꞌ Kánáꞌá.b
12 Ia mampeweꞌi tampoꞌraꞌ toKánáꞌá iti
i toSáráeliꞌ taunáNa
mewaliꞌ tampoꞌ sosoraraꞌ.
13 Ó PUEꞌ, hangaꞌMu ina ara oaꞌ haweꞌ i rue-ruena.
TaunáMu mambuhinaoKoꞌ oaꞌ haweꞌ-haweꞌ i pemuleꞌáraꞌ.
14 PUEꞌ ina mamperuruꞌi taunáNa
hai mampokaꞌahiꞌ huoꞌáNaheꞌ.
15 Tauna i tampoꞌ ntániꞌna menómbáheꞌ i lenggeꞌ ánitu
to rabábehi hangko i buláwá hai peráꞌ.
16 Kehapiꞌ ara humeraꞌ, agáiáná tiꞌara raisá molaluita,
kehapiꞌ ara mátáraꞌ, tiꞌaraheꞌ meita.
17 Kehapiꞌ ara talingaraꞌ, agáiáná tiꞌara rahádi,
hai tiꞌaraheꞌ woꞌo peisá meinao.
18 Noꞌonoꞌ woꞌo tauna to mobábehi lenggeꞌ ánitu
hai upu-upu tauna to mehárungá i ánitu iti,
ina mbero-mbero katueꞌraꞌ hibali hai ánituraꞌ.
19 Ee toSáráeliꞌ, nitóiá miꞌi PUEꞌ!
Ee tadulako-tadulako menómbá pemuleꞌána Haruni,
nitóiá miꞌi PUEꞌ.
20 Ee toLewi, nitóiá miꞌi PUEꞌ,
hai upu-upukou to mengkoruꞌ i PUEꞌ,
nitóiá miꞌi PUEꞌ.
21 Tetóiá miꞌi PUEꞌ i buluꞌ Sio,
i kótá Ierusale katoroꞌáNa.
Haleluia! Tatóiá PUEꞌ!