Haman napehángáꞌá Eteꞌ hai rahuku mate
7
Mewaliꞌ i karongkánina miꞌi datu hai Haman mandeꞌ-mandeꞌ hai mainu hingkakani hai Eteꞌ.
2 Tangaꞌraꞌ mainu anggoroꞌ,
molaluita miꞌi datu i Eteꞌ,
nauliꞌ,
“Deꞌe-deꞌe nuꞌuliꞌ miꞌi apa to nupoinao!
Kehapiꞌ nupembiáꞌ hanggáláꞌ hantangaꞌ hangko i kadatuángkuꞌ,
bateꞌna ina kuweꞌikoꞌ.”
3 Nahániki Eteꞌ,
“Ane nupokana datu,
kupembiáꞌ bona kódóꞌ hai hangka toIahudiꞌkuꞌ peisáꞌangkaiꞌ tueꞌ,
4 láwiꞌ kaiꞌ toIahudiꞌ rapobaluꞌmongkaiꞌ bona rapapate.
Ane rápáꞌna rapobaluꞌ peangkaiꞌ ina rapohawiꞌ,
kupengkaniika peá hai ketiꞌarantoaꞌ mosalempori datu.
Agáiáná kaiꞌ,
raliwomongkaiꞌ ina rapatuna.”
5 Mewaliꞌ mekuneꞌ miꞌi Datu Ahasiwero i Eteꞌ datu towawine,
nauliꞌ,
“Heáná to pebáiꞌ mobábehi noꞌonoꞌ?
Iumbá miꞌi tauna iti?”
6 Mehániꞌ Eteꞌ,
“Haman miꞌi deꞌe to kadake i kaiꞌ toIahudiꞌ.
Ia miꞌi ewálingkiꞌ to mampopeahiahiꞌangkaiꞌ.”
Ánti kamalááꞌna miꞌi Haman,
ia motótói datu hai Eteꞌ.
7 Kamohádina laluitana Eteꞌ,
mabukoꞌ ntepuꞌu datu hai kásáliu meángkáꞌ mopálehi mejá pandeꞌá lao i rawa i hinoe bungaꞌ kadatuá.
Naisá miꞌi Haman kaꞌina nahukuna datu,
onoꞌ miꞌi haneꞌi ia roo-roo peá ionoꞌ hingkakani hai Eteꞌ datu towawine.
Tunggáiána membiáꞌ bona napelae Eteꞌ.
8 Ánti katiꞌárána ara pehárungána Haman,
onoꞌ miꞌi haneꞌi mengkatiropaꞌ perái i Eteꞌ membiáꞌ ámpu.
I tempó onoꞌ woꞌo,
datu mesuaꞌ miꞌi huleꞌ hangko i hinoe bungaꞌ.
I kanaitána datu iti Haman tangaꞌna mengkatiropaꞌ i Eteꞌ,
ia monganga,
nauliꞌ,
“Apa?
Pebáiꞌ ntepuꞌukoꞌ woꞌo ina mampogauꞌ toinángkuꞌ i lindoꞌkuꞌ hai i lalu támbi kadatuángkuꞌ!”
Karoona peá datu molaluita,
topobágóꞌna kásáliu laoheꞌ motótókungi mpiriꞌ lindoꞌna Haman {tandaꞌna ina nahuku mate}.
9 Hangko ionoꞌ,
molaluita miꞌi Habona hadua topobágóꞌ i kadatuá,
nauliꞌ,
“Datu!
I hintáiꞌ támbina Haman ara kau petóeá to kamapángkáꞌna rompuloꞌ hai romete.
Petóeá iti to naꞌaró Haman ina motóe Modekai,
tauna to mampelae miꞌi katueꞌna datu iaꞌo.”