Eteꞌ lao mampombelindoꞌá datu
5
I katálu alona popuasaꞌraꞌ toIahudiꞌ,
Eteꞌ mopakeꞌ miꞌi waruꞌ kadatuána,
lao mesuaꞌ i lalu lintuꞌ potarimaꞌána datu torare,
haneꞌi meángkáꞌ i lindoꞌna babaꞌ pogómbóá.
I tempó iti,
datu tangaꞌna mehoda i pehodaꞌá kadatuána to melindoꞌ i pogómbóá.
2 Kanaitána datu,
Eteꞌ meángkáꞌ i rawa,
kásáliu naodo iti laiꞌ buláwá to i taena,
ánti karumihina pepomahilena datu i Eteꞌ.
Mewaliꞌ lao mpuꞌu miꞌi Eteꞌ mohungkuki datu iti,
haneꞌi motóbóꞌ wuntu laiꞌ iti.
3 Hangko ionoꞌ,
mekuneꞌ miꞌi datu i Eteꞌ,
nauliꞌ,
“Apa riꞌi tunggáiámu Eteꞌ toinángkuꞌ?
Apa to nupoinao?
Nuꞌuliꞌ!
Kehapiꞌ nupembiáꞌnto hanggáláꞌ hantangaꞌ kadatuángkuꞌ,
bateꞌna ina kuweꞌikoꞌ.”
4 Nahániki Eteꞌ,
“Ane nupokana datu,
kupembiáꞌ bona deiná datu hai Haman lao mandeꞌ i posusa to ina kupaꞌara i kaꞌaraꞌángkuꞌ.”
5 Mewaliꞌ napehawaꞌiá miꞌi datu bona Haman hawiáꞌ haweꞌ,
bona poloꞌheꞌ lao mobukeki pembiáꞌna Eteꞌ.
Hangko ionoꞌ,
lao mpuꞌumoheꞌ i posusa pandeꞌ to napaꞌara Eteꞌ.
6 Tangaꞌna mainu anggoroꞌ,
molaluita miꞌi datu i Eteꞌ,
nauliꞌ,
“Deꞌe-deꞌe,
nuꞌuliꞌ miꞌi apa to nupoinao.
Apa peá to nupembiáꞌ,
kehapiꞌ riꞌi hanggáláꞌ hantangaꞌ kadatuángkuꞌ,
bateꞌna ina kuweꞌikoꞌ.”
7-8 Nahániki Eteꞌ,
nauliꞌ,
“Ane nupokana maniꞌi pembiáꞌkuꞌ,
kahalo datu hai Haman mai manikeꞌ i posusa pandeꞌ to ina kupaꞌara mani.
Ionoꞌ rái hangko kupahaweꞌ pembiáꞌkuꞌ i datu.”
Poliwona Haman ina mopapate Modekai
9 Pesuleꞌna Haman hangko i posusa pandeꞌ to napaꞌara Eteꞌ,
ia góeꞌ ntepuꞌu.
Agáiáná tempóna moliu i babaꞌá támbi kadatuá,
ia moita Modekai tiꞌara mau meángkáꞌ tandaꞌ pebiláꞌna,
mewaliꞌ mabukoꞌ iti Haman i Modekai.
10 Agáiáná kamabukoꞌna iti nameeꞌ peá hai ia liliu lao i támbina.
Kahaweꞌna i támbina ia mokióꞌ balenaheꞌ hai mokióꞌ woꞌo toinána to rahangaꞌ Seresi,
bona mehoda-hodaheꞌ sangkani.
11 I kamehodaraꞌ peá,
natepuꞌu miꞌi woꞌo Haman modarita mokana i kapebukuna,
hai kahandaꞌna woꞌo ánáꞌna tobaleilo.
Napolaluita woꞌo kamapángkáꞌna popárentána to napoináláiá datu,
hai kamapángkáꞌna lántiꞌna hangko i upu-upu tauna to nalántiꞌ datu i kadatuá.
12 Hai nauliꞌ,
“Mogalo riꞌi Eteꞌ datu towawine iti,
kódóꞌ peá hai datu to nakióꞌ lao mandeꞌ i posusa to napaꞌara i kaꞌaraꞌána,
hai kahalona nakióꞌ wopangkaiꞌ lao mandeꞌ.
13 Agáiáná upu-upuna iti tiꞌara ara bunduꞌna ane kuita maniꞌi Modekai toIahudiꞌ iti mehoda-hoda i babaꞌá támbi kadatuá.”
14 Kamohádiraꞌ peá laluitana,
Seresi toinána hai balenaheꞌ molaluitamoheꞌ i Haman,
rauliꞌ node:
“Nuhuoꞌ miꞌi tauna mobábehi kau potóeá tauna,
hai kamapángkáꞌna rompuloꞌ hai romete.
Kahalo mepulo-pulo,
lao miꞌi nupesabiꞌ i datu bona Modekai iti ratóe.
Mewaliꞌ ane nubábehiꞌi upu-upuna iti,
hangko tinda riꞌi lalumu ane laokoꞌ hingkakani hai datu i posusa pandeꞌ to napaꞌara Eteꞌ.”
Upu-upu laluitaraꞌ balenaheꞌ hai toinána napomaroꞌa Haman,
onoꞌ miꞌi haneꞌi mohawaꞌ miꞌi bona mobábehiheꞌ kau petóeá.