Yuunis W'ankwanaay N'akwmanaatiib Gadabiya
4
Laakiin Yuunis winneet yhasi,
aree winneet gadabiya.
2 Baruuh W'ankwanaay dehaay siileeliya,
<<Yaa W'ankwanaay,
toon toona ani masi ugawiib iifiyeeb oodoor diyaab kaaki han?
Oon usabbii aree ani willa Tarshiish beeti afoor.
Baruuk rhamaateebwa n'akwmanaayiini Kwaasanaawwa tikatiyeet toona iktiin,
diiseet itehasiib aree gwidaat daayiinaayti Kwaasana,
tinasiibeeti fiduugii it'agiir tikatiyeet toona iktiin.
3 Oont'a yaa W'ankwanaay,
aneeb diraheeb.
Ani umidhhaniika tooyat asehayiis.>>
idi.
4 Laakiin W'ankwana igwibi,
<<Baruuk haay gadabtiniyi hag tibariya han?>>
idi.
5 Yuunis giigiyaayt tumadiinaati yintalawiib mhiin gaalnaay is'a.
Beentooy aree makwaatooh shagaamiya,
aree ul'andaay is'a,
aree tumadiina naan dehaay iikti tiideeb iishbib.
6 Malya W'ankwana Ukwaasana aree Yuunisi kehii hindiib yakisiyaayt l'andalaasiya.
Bariiyooh ugirma l'andalaasiyaayt barooh tehasiyaay isfadig.
Yuunis han winneet whindiib afirhiya.
7 Laakiin tooyin tooraaw Ukwaasana d'oob id'i,
been uud'u whindi y'ayikw id'iit balamisiya.
8 Tuuyin tiifir'ihoob,
Ukwaasana nab'a yintalawi baraam ifdig.
Tuuyin Yuunisiib ugirmaay kehii nab'at tiikti,
aflaay baruuh darwiiwiya.
Baruuh tooyat yhiriw aree,
<<Ani umidhhaniika tooyat asehayiis.>>
idi.
9 Laakiin Ukwaasana Yuunisii dehaay,
<<Whindiib titehasiyeet toona hag tibariya han?>>
idi.
Baruuh <<Hag abari,
ani hasiyaaytii tooyat asehayiis.>>
idi.
10 Laakiin W'ankwana,
<<Baruuk oon whindiib tehasika,
baruuk whindi naat han hooy d'iyaab kitta,
tari soowinaab kitta.
Whindi gaal hawaadiib yakiyaayt gaal hawaadiib iya.
11 Laakiin Neenawa sheebwa tagwuugw alfa dehay w'ayoohna umaygwadiiwwa utalhaawwa baakaanaab tiibri.
Gwida sh'a han tiibri.
Beet tumadiina toowin dehaay nakwmanaayaniyeet toona kitti han?>>
idi.