Nooh mirkabt shagaamiya
6
01 Uudehay toobuuti kehii guudiyaan,
arit han ifaarna.
02 Ukwaasanaay y'ar udehayiit t'arit daawrii rhiyaan.
Gaalka tehooy yhariwneet id'irna.
03 Malya W'ankwana <<Aniib Aashuuk diima w'aadamiib kadaayaan.
Baruuh bashari nuun weena kiiki.
Umidhhan hooy marriyi aree sheebwa tagwuugw hawla eebhad ikatiin.>>
idi.
04 Been udamaaniibwa malyaabwa Nifiiliim iidni wawin da iifiin.
Ukwaasanaay y'ar udehayiit t'arit id'irniit hooy ifaarna.
Baliin y'ar aakna sh'iika faarsa da faalamaab ikeena.
05 W'ankwana uudehay toobuuti kehii shagaamiineet tumaagnaay rhiya.
Beenhoob baraah diimaab maagnaayt toobhaat iikwinna.
06 W'ankwana W'aadami toobuuti kehii id'iyeet toona winneet hooy andimiya,
ugin'uuh yhadaal.
07 Malya baruuh <<Ani oodehay w'akwaaseeb toobuuti kehii eefeen kasseeh kwidhsi andi.
Oodehaywa,
ooreewwa,
eekilaywa,
buutranfiifaawwa kasseeh toobuuti kehii eefeen kwidhsi andi.
Een bareeh akwaaseet tuuna lhasaatootu.>>
idi.
08 Laakiin Nooh W'ankwanaay igw'adeeb shiboot miraa iifi.
09 Aan baraah aree Noohiib ootaasu.
Nooh uubhaat Ukwaasanaay bhaliiyee shagaami.
Baruuh udamaaniyooh udehayiib shibu tak yaay anuubu.
10 Nooh mhay ar iibri.
Bareeh Saamwa,
Haamwa,
Yaafeetwa iidna.
11 Oont'a tuubuur fasaad titab,
Ukwaasanaay suurii tuumaag gwuudta.
12 Ukwaasana kak tuubuur timageet toona rhiya.
Uudehay kassuuh toobuuti kehii ikwiir amag salala iiyheen.
13 Ukwaasana Noohii dehaay,
<<Ani toon toobuuti kehii eefeen oodehay kassooh kwidhsi andi.
Baraah toobuur maag itibna.
Oont'a sidik ani bareehwa toobuurwa kasseeh kwidhsi andi.
14 Baruuk igarooyook deha wawin hindiyee mirkabt d'iya.
Gawaab tehooyteeb d'iya,
malya tehooywa tisaraatwa kwitraan likiiya.
15 Imigmideeh sheebwa mhay tamuunwa mhay mitra kwaasa,
tagwgwu malu mitra mar'at kwaasa,
tamna mhay mitra asa tageegsa.
16 Mhakwaliisii daayiib kwibisa,
shibbaak hooy nigila.
Dheefaab oodar d'iya.
Ugawiit tehooy mhakwaliisii eedhoom hadiit fadhig tamuunwa fadhig mitra eetniit masaafa eebtik isha.
Mhay doora kwaasa:
mhakwalwa,
eebtikwa,
whiiwwa kwaasa.
17 Ani hamshukw tibariina kastooh kwidhsiini kwaan iifdig andi,
toobuuti kehii naat han tiidhhan kitdi.
18 Laakiin ani bariiyook geeb galad adan'i.
Baruukwa tutakatuukwa,
y'araakwa,
y'areetaak taam'atwa tumirkabtiib shuumi tiyadna.
19 Baruuk kasteeh tidhhaniyaatee kwaabwa rabaabwa yaksaa,
aan baraah malya tawaameen.
20 Kasseeh eekilayee maloob,
kasteeh tidhhaniya gaatka jinsiisooh toobuutiib ikwarriin indhhiinni jillaay y'aa hook iyadna akay,
een bareesooh kwaabwa rabaabwa hooy yaksaa.
21 Tutamamtina kastooh yaksaa.
Barookwa bareehwa anf'atniit daayiib dibiya.>>
idi.
22 Nooh Ukwaasana sooyaneet toona kastooh id'i.