Buuluswa Barnaabaaswa Ikoonyoomiib
14
01 Buuluswa Barnaabaaswa Ikoonyoomiib Yahuudi diini gawiib suureet hooy bhaliiyaan.
Baraah beentooy oodehay akraab bhaliisamiyaan.
Antaakiyaay daayaaneeb ishagaayoohna,
tooy han id'iin.
Gwida Yahuudwa Jintiiliiwwa aree aamaniyaan.
02 Laakiin Iyahuudi w'aamanti ribaab,
y'aamaniinni kehii Ijintiili iisbibna.
Bareeyeeh igin'a imigna.
03 Buuluswa Barnaabaaswa beentooy gwida daman is'ana.
Baraah W'ankwanaay ibhali winneet ash'araa hadiidiin.
W'ankwana bareeh m'uujisaatwa ajaayibwa haay iikwsiini akrir yhii.
Ibhaliyaahna sidik iiktiineet toona tin'imaateesooh han rhisiya.
04 Laakiin tumadiinaati dehay malu mhiin y'adhadhna.
Gali Iyahuudi geeb ingadna,
wari aree Ilinguumiyaayi geeb ingadna.
05 Shaawti gwadi Yahuudiiwwa Ijintiiliiwwa isuurkinaayeesoohna maagnaayt imkirna.
Buuluswa Barnaabaaswa amaag iiwriineena ikwinna.
Aweeyee raajamootiib yhariwna.
06 Ilinguumiya laakiin toon toona ikanneet tumasaafa,
Liikaa'ooniyaayt timadiina Liistaraawwa,
Darbaawwa oodar iifiib whaashwa beeti ifoorna.
07 Baraah beentooy usakana udaayiib bhaliiyaan.
Liistaraaywa Darbaaywa
08 Liistaraay tak iragada am'adhdhaab iiktiini iifi.
Uun baruuh t'am'adhdhooy haay faraayu,
door han hiireeraab kiiki.
09 Been uutak Buulus bhaliiyee imaasiw.
Buulus ootak akraab ishibib.
Bariiyooh iimaan rhiya,
mheelamiiniyeet toona aree ikan.
10 Barooh waliikiyaayt,
<<Asti gadaa!>>
idi.
Uutak shaawti asti fariyaayt hiireertiib badooya.
11 Uudehay Buulus id'iyeet toona rhiyaanihoob,
Liikaa'ooniyaay ibhaliiyee waliikiyaan,
<<Isanama aadamiyaab ikeeniit ikwibarna eeyaan hoon!>>
idiin.
12 Baraah Barnaabaas Safas isimna,
Buulus aree whadiidani oowinnuuyt Harmas isimna.
13 Safasiib ufagiiri,
udiini gawuuh tumadiinaatii barraab iifi.
Ufagiiriiwwa uudehaywa bareeyooh dehaay karaamaat iifir'ani jillaay,
yoobwa hindi faari taajwa tumadiinaati dheefaay haay eeyaan.
14 Laakiin ilinguumiya Barnaabaaswa Buuluswa beet toona imaasiwnihoob,
yhalaakaayeehna batakiyaaniit oodehay ookiik waliikee dhaabiyaan,
15 <<Y'arawaan,
toon toona naanhooy tid'iina?
Hinin bareetookna aadamiyaaba.
Teena titakwi baabariit ishtiit,
Ukwaasana udhhaniinaay dehaay tit'agiirni jillaay,
usakana udaayiib soonay hookna.
Ukwaasana toobuutwa,
teebreewwa,
oobharwa,
tehooy teefi kastoohwa ikwaas.
16 Suur Ukwaasana oodehay gaalka whaaliyooh y'ish id'i.
17 Laakiin baruuh daayiinaayt shagaamiyaayt,
iifiyeet toona bareeh rhisiya.
Ukwaasana teebri bireesiit wharrooyookna yaksiini.
M'ariit iniiw hookna,
malya igin'aayeekna afirhisiini.>>
idiin.
18 Barnaabaaswa Buuluswa een ibhali idiineek han,
uudehay masi bareeyooh dehaay karaamaati haruud yhariwna.
19 Antaakiyaaywa Ikoonyoomeewwa Yahuudi gali eeyaaniit oodehay geeboohna isingadna.
Baraah Buulus aweeyee geediyaan,
malyaab ayaab hiisiyaaniit tumadiinaati irfifni giigisiyaan.
20 Laakiin ikwiriyaatay Buulusi kwayaay ingadna.
Baruuh yakiyaayt tumadiina beeti y'agar.
Tooyin tooraaw baruuhwa Barnaabaaswa Darbaab ibeen.
Suuriyaay tiifiit Antaakiyaab marii y'agarna
21 Buuluswa Barnaabaaswa tumadiina Darbaay usakana udaayiib sooyaan,
gwida dehay aree W'ankwana aamaniyaan.
Malya Liistaraawwa,
Ikoonyoomwa,
Antaakiyaawwa ookiik y'agarna.
22 Beentooy baraah ikwiriyaatay is'aakakirna,
w'iimaanoohna isoorariimneet toona sooyaan:
<<Ukwaasanaayt tehad'aayeeti ishuumtii dehaay ibakii gwida gwirha nimgwarheet toonaatu.>>
idiin.
23 Buuluswa Barnaabaaswa han kaniiseetka eegrimaab dehaay waasiyaan.
Malya m'ariit tamaab baakaay giigiyaan.
Siileeleewwa baaskiiteewwa bareeh W'ankwana w'aamaniyaaneeb isigw'adna.
24 Shaawti Buuluswa Barnaabaaswa Biisiidiyaay iibaabiyaaniit,
Baamfiiliyaab iktimna.
25 Baraah tumadiina Bargaay usakana udaayiib sooyaan.
Malya Attaaliyaab beeti hoogiyaan.
26 Malya baraah markabt y'amniit Antaakiyaab beeti y'agarna.
Oont'a faayisiyaaneeb ushanha iitkwikwni jillaay,
y'aamanana beentooy bareeh Ukwaasanaay tin'ima isoorimna.
27 Antaakiyaab iktimni har'ii,
y'aamanana idbilniit,
Ukwaasanaayt shamaamtii d'iyaab iiktiineet teena kasteeh sooyaan.
Ukwaasana kak Ijintiili aamanisiyaneet toona han sooyaan.
28 Baraah beentooy gwida door ikwiriyaatayi geeb is'ana.