Barnaabaaswa Shaawilwa waasamiyaaniit diigwatamiyaan
13
01 Antaakiyaay tiifiit tukaniisi gwida nabiyaabwa allamanaabwa fagiiriyaabwa tiibri.
Aan baraah Barnaabaaswa,
Siimoon Niigar iidneebwa,
Luukiyuus Geerawaanee iiktiibwa,
Manaayin Heeroodisi geeb winaabwa,
Shaawilwa iiktiin.
02 Baraah W'ankwanaay dehaay siileeleewwa baaskiiteewwa,
Aashuuk Itageega dehaay eeyaaniit,
<<Barnaabaaswa Shaawilwa ani dehaay waliikaab akatiyeeb ushanhii dehaay waasaana.>>
idiin.
03 Malya baraah baaskiitiyaaniitwa siileeliyaaniitwa har'ii,
y'ayeehna bareeyooh kehii daasiyaaniit giigisiyaan.
Barnaabaaswa Shaawilwa Kubiroos ibeen
04 Barnaabaaswa Shaawilwa Aashuuk Itageega giigisiyaan.
Baraah Sulookiyaab ibeen.
Beentooysii Kubiroos tugadiira ookiik iibaabiyaan.
05 Salaamiis tumadiinaatiib eeyaanihoob,
Yahuudi diini gawiib Ukwaasanaayi bhali sooyaan.
Yuhanna Maarkoos iidneeb han bareetooh shamaamtiib geeb iifi.
06 Malya baraah tugadiira kastooh iskattimniit,
Baafoos iidni haash eeyaan.
Beentooy seharanaab Yahuudiib gwisira nabi Baar Yasuu'a iidneeb imriin.
07 Seerjiyoos Baawloos,
tugadiireeti haakim winneet fagar taku.
Baar Yasuu'a bariiyooh geeb shagaamiya.
Seergiyoos Baawloos Ukwaasanaayi bhaliyi maaswi yhiriw akay Barnaabaaswa Shaawilwa waliikisiya.
08 Laakiin Baar Yasuu'a,
oosmooh ooraaw Aliim iidneeb,
bareeh irib.
Baruuh whaakim han W'ankwanaay w'aamantii afuuy jarrabiya.
09 Malya Shaawil,
Buulus atoosmaab,
Eeshuuk Itageegaayee itab.
Baruuh akraab Aliim ishbibaayt,
10 <<Baruuk oobliisi oorwa!
Gwisireebwa!
Amaagwa,
tudaayiinaay aree kastooh tinriiba.
W'ankwanaay isalala idaayiinaayi kehii whadiidti naadoor isingid tindiya?
11 W'ankwana jasaayi hook indi.
Door gaal winneet hamasheeshi hook indi,
ooy'i rhisi hook kiidi.>>
idi.
Gaalhoob,
ootaki gw'ad lasoot kehii dhibta,
aree thibinamiyaan.
Baruuh shaawti w'ayi abkiit salooli nafari harawaay doorka jhaatii hiirareeriya.
12 Whaakim toona tutikeet rhiyanihoob,
W'ankwanaay ibhaliyi allamtiib winneet ajjabamiya.
Buulus Antaakiyaaywa Biisiidiyaaywa allamiya
13 Buuluswa y'arawaahwa Baafoosii markabtii giigiyaaniit,
Bargaab Baamfiiliyaay teefeet iktimna.
Beentooy Yuhanna Maarkoos atoosmaab bareeh imshamaadh aree Algudus ibi.
14 Baraah aree Bargaay giigiyaaniit,
Antaakiyaab Tubiisiidiyaayi ibeen.
Toosab aree Yahuudi diini gaw shuumiyaaniit is'ana.
15 Muusaay Whaggi Kitaabwa,
inabiyaayi kitabwa agriiyaaniit har'ii,
Iyahuudi diini gawi haakma bareeyooh dehaay diigwatiyaan.
Baraah <<Isanaayaan,
bhaliib oodehay is'aakakiir tibariineek,
anaahookna hadiidaana.>>
idiin.
16 Buulus ingadaayt,
w'ayiisooh mitiyaaya,
malya <<Israa'iili dehaywa,
Ijintiili Ukwaasana y'abidwa sinaakirnaheeb!
17 Israa'iileeb Ukwaasana hoobeen waasiya,
udehayoon Masreeb iifiinihoob libaabisiya.
Y'akrireesooh been whaash hooy isfar'a.
18 Fadhig tamuun hawlaab aree umingaayiib bareeh imtaraam.
19 Malya asaramaat gabiila Kan'aaniit kasteeh whaashii kwidhisiyaayt har'ii,
whaashoohna hoobeen yhii.
20 Beet tuuna kastuuh fadhig sheebwa ay tamuun hawlaab hooy tiyhi.
Beenaay har'ii,
unabi Saamuu'eeli udamaan ookiik,
udehayoon gaadiyaab yhii.
21 Laakiin uudehay had'aab yhariwna.
Oon usabbii,
Ukwaasana fadhig tamuun hawlaab Shaawil Giishaay oor Binyaamiiniit tugabiilaatii bareeyooh kehii had'aab ikwaas.
22 Malya Ukwaasana Shaawil giigisiyaayt,
Daawid oomhiinooh haay eeya.
Ukwaasana bariiyooh dehaay,
<Daawid Yassaay oor,
ugin'u dehaay rayhamiini.
Baruuh kastooh toona ani aharriiweet iitkwikw indi.>
idi.
23 Ukwaasana waadiyaab d'iyaabu,
<Daawidiib indhiwaayee gaal y'eetiit Y'israa'iili ishidhhiin.>
diyaabu,
been baruuh aree Yasuu'aabu.
24 Laakiin Yasuu'a y'aab baakaay,
Yuhanna kassooh Israa'iileeb oodehay tuubaatwa atoomsooywa sooya.
25 Malya Yuhanna ushanhooh faayisitiib idwilihoob,
baruuh <Ani aab hiiseenheeb?
Ani beeb uudehay s'ayaamiiniyeeb hiisteen han?
Baruuh ani har'ii y'iini hookna.
Ani tigidh'aateeh ahankwiireet toona han ka'astehalan.>
idi.
26 Yaa isanaayaan,
Ibraahiimi ar,
baraak Ukwaasana ireekw Ijintiiliiwwa,
oomidhhaniit tudiigwat hinee dehaay diigwatamaatu.
27 Alguduseeb uudehaywa yhaakmaayaahwa Yasuu'a kanaab kiikeen.
Toosabka agriiyeeneeb inabiyaayi bhali afhamaab kiikeen.
Aflaay baraah inabiya diyaab iiktiineet toonaatiit Yasuu'a imooraabna.
28 Barooh haay iidirni gwabab miraab biikaayneek han,
Biilaatoos barooh iidireet toona hooy yhariwna.
29 Malya kastooh bariiyooh kataabt toona faayisiyaanihoob,
usaliibii tikwisiyaaniit miimashiib ibisna.
30 Laakiin Ukwaasana barooh tooyat hooy yakisiya!
31 Malya Yasuu'a y'aamanaayeeh Jaliilee Algudus ookiik geeb ibeen gwidaat yina dehaay lawiya.
Oont'a baraah Israa'iileeb oodehayi suurii bariiyeeh baadehi ikatiin.
32 Ukwaasana hoobeen waadiyaab dehaay y'abik.
Hinin aree usakana udaayiib soonayi jillaay tooy neefi.
33 Ukwaasana hinin y'areeh,
Yasuu'a tooyattii ishidhhanaayt uwaadiyaayooh dehoon itkwikw.
Yasuu'iib hadiidiiniib tehabayaati kitaabiib,
tehabay tumaliyaatiib kataabtu:
<Amsi ani baabook akati,
baruuk aree ooroowwa.>
tindi.
34 Ukwaasana Yasuu'a tuyattii yakisiya,
ugarooyuuh aree abadan kasuusiya.
Ukwaasana diyaab ikatiyeet toonaatiit,
<Daawid waadiyaayaneet tibaraka titageega,
bareekna han iyaaw hookna andi.>
idi.
35 Habayt weet aree <Ukwaasana Utageegaayooh Oongaal suus rhisi kiidi.>
tindi.
36 Daawid dhhanii iifiyihoob,
Ukwaasana isnaakir.
Baruuh iyanihoob,
indhiwaay miimashaayeeb itoobaas,
ugarooyuuh aree suusiya.
37 Ukwaasana laakiin Yasuu'a tuyattii yakisiya,
ugarooyuuh aree suusaab kiiki.
38 Aflaay isanaayaan,
sinaakirna,
Yasuu'i geebii idinuubeekna afoomteeneet toona asookiineet aharriiw.
39 Muusaay whag sakaab biikaayeet toona,
kassuuh uudehay Yasuu'a aamaneen kasseeh idinuubeeh afoomeen.
40 Inabiya diyaab iiktiineet tuuna dehookna bit'akaay,
digwagwna!
Baraah,
41 <Shibibna,
baraakna uudehay Ukwaasanaay kehii kashteena!
Ajjabamaana,
kwidhaana!
Ani idamaneeyookna naat atankwiikw,
baraakna laakiin gaal sooyiiniyuukna han
ka'aamantaana!>
idiin.>>
idi.
42 Buuluswa Barnaabaaswa Yahuudi diini gawii itfir'ana,
uudehay bareeh teen teena toosab tooraaw bhaliiyeeneet toona bareeyooh yhariwna.
43 Uudehay idabaal ibrarihoob,
gwida Yahuudiiwwa Jintiiliiwwa Ukwaasana y'abid bareeh iramna.
Buuluswa Barnaabaaswa bareeh bhaliisamiyaan,
Ukwaasanaayt tin'ima isoorariimneet toona hooy yhariwna.
44 Toosab tooraaw kassuuh tumadiinaatiib iifiib uudehay W'ankwanaay ibhali isnaakiirni jillaay eeyaan.
45 Laakiin Iyahuud oodehay oogwidaab rhiyaanihoob,
winneet giiraat itabna.
Baraah Buulus neewiyaan,
hadiidiyi bhaliiyeebka aree imgwasaarna.
46 Buuluswa Barnaabaaswa laakiin ash'araabayt,
<<Ukwaasanaay ibhali oodehay ooraaw sooyaab baakaay awwal bareekna sooniyeet toonaatu,
baraakna laakiin tiribna.
Tuun aree baraakna oomidhhan udaayim bit'astehalayneet toona sootni.
Oont'a hinin Ijintiili beeti giignay.
47 Een ibhali W'ankwana waseeya hoon:
<Barook idehayaayi nuur akwaas hook,
kassooh toobuuti agiya ookiik tishidhhiina.>
idi.>>
idiin.
48 Ijintiili een ibhali imaasiwnihoob,
winneet afirhiyaan.
W'ankwanaay imaasiwneet toona yhamidna.
Uudehay kassuuh oomidhhan udaayimii dehaay waasamaab shaawti W'ankwana aamaniyaan.
49 Aflaay W'ankwanaay ibhali kassooh whaashiib ibrarna.
50 Laakiin Iyahuud teem'a Ukwaasana iriikw tifagaraawwa,
tumadiinaati suurkinaawwa isbibna.
Buuluswa Barnaabaaswa maagt dehookna shagaameen miyaadiib oodehay isbibna.
Been whaashii han aree isfar'ana.
51 Aflaay Buuluswa Barnaabaaswa whaash tigidh'aateeyoohna falfuut dehaay infishna.
Beet tuuna aree raab mitiyaatni.
Malya tumadiina Ikoonyoom ookiik giigiyaan.
52 Ikwiriyaatay laakiin winneet afirhiyaan,
Eeshuuk Itageega aree itabna.