Bitrus usijnii m'uujisaatee idhhan
12
01 Beenhoob whad'a Heeroodis tukaniisaati da galib asjiniya.
Bareeh amaag iweer.
02 Yaaguub Yuhannaayiib oosan b'adhdhii isoodir.
03 Tuun tuuna Yahuudi dehay afirhisaa rhiyanihoob,
Bitrus han y'abik.
Beet tuuna Bitrus Ufatiiri Iidiib tiki.
04 Barooh y'abikaayt,
oosjin id'i.
Fadhigt majmuu'a barooh isigw'ad,
majmuu'aatiibka aree fadhig kajar iifiin.
Heeroodis barooh Whasamti W'iidi har'ii oodehayi suurii haakamtiib yhiriw.
05 Aflaay barooh Bitrus usijniib id'i.
Tukaniisi door han Ukwaasanaay deha toosleel singadaat kitti.
Toosileel barooh haay isehiriwna.
Bitrus usijnii ifr'a
06 Whawaad isuuriib Heeroodis barooh hooy haakamaa iideeb,
Bitrus maloot shinshilaatee hakwaaru,
aree malu kajari bitik diwi.
Kajar wari aree udheefa iigw'idiin.
07 Gaalhoob Ukwaasanaay malak lawiya,
usijniit gurfa aree nuur hooy talawiya.
Umalak Bitrus oodar ith'a,
aree isib'ar.
Malya <<Ashshigaa!
Yakaa!>>
idi.
Tishinshila y'ayeesooh dhibiyaan.
08 Umalak masi bariiyooh dehaay,
<<Yhalaakaayeek kwayaa,
tigidh'aateek han shabaa!>>
idi.
Bitrus toona tusoomamiyaneet id'i.
Masi umalak bariiyooh dehaay,
<<Tusideeriyaaytook kwayaat har'i sakaa.>>
idi.
09 Bitrus umalak iram.
Laakiin umalak iid'eet tuuna sidik iikti tiideet toona kiikan.
Beet toona kastooh hawsoot hiisiya.
10 Baraah ikajar igw'aadiiga y'awwaliibwa imalyaawwa hasamiyaan.
Malya tumadiinaati dheefa t'indiitiyaay eeyaanihoob,
udheefa uukna dehaay ingal.
Shaawti baraah ifir'aniit salal gaal hasamiyaanihoob,
umalak gaalhoob barooh imshamaadh.
11 Bitrus oont'a toona tutikeet ikan,
<<W'ankwana Heeroodisii aneeb ishidhhini jillaaywa,
kastooh Iyahuudi s'ayaamiineet toonaatii ishidhhini jillaaywa umalakooh diigwatiyaneet toona oont'a eetehak anu akan.>>
idi.
12 Bitrus beet toona ikanihoob,
Yuhannaab oosmooh ooraaw Maargoos iidneenaayt toondi Maryamiib oogaw ibi.
Gwida dehay beentooy immarraayniit siileeliin.
13 Bitrus udheefa kadhawsiyanihoob,
Rooda iidneet shagaamana udheefaay niguuli jillaay eeta.
14 Batuuh Bitrusiib whiss tikanihoob,
udheefa nigilaat baaakaay winneet afirhaa t'agar,
<<Bitrus udheefaay eefi!>>
tidi.
15 Uudehay batiiyooh dehaay,
<<Batuuk haalaytuwii.>>
idiin.
Laakiin batuuh <<Udheefaay ingadiib Bitrusu.>>
tidi.
Uudehay aree <<Uun baruuh umalakooh ikati.>>
idiin.
16 Bitrus laakiin masi udheefa iikwil,
baraah shaawti udheefa dehaay ingilna.
Barooh rhiyaanihoob,
winneet ajjabamiyaan.
17 Laakiin Bitrus w'ayiisooh bareeh haay dinisiyeet alaamaat rhisiya.
Malya W'ankwana kak barooh whabsii ifir'eeb dehaay hadiidiya.
Baruuh masi <<Yaaguubwa y'aamanana eerawwa toon toona sooyaana.>>
idiit weer haash ookiik y'ish giigiya.
18 Fajir ikajar igw'aadiiga winneet yhasikna,
Bitrusii dehaay naan tikayeeb igamna.
19 Heeroodis ikajareeh barooh isehariw,
laakiin miraab kiikeen.
Malya baliin igw'aadiiga raatiya aree bareeh kasseeh isoodir.
Malya Heeroodis Yahuudaay giigiyaayt Gaysariyaay middaat is'a.
20 Baruuh Tirooswa Siidooneeb oodehay winneet amhassiya iifi.
Baraah immakkaarniit barooh it'ajiirni jillaay galib diigwatiyaan.
Tim'ariituuhna Heeroodis yhukwimeeb whaashii eeti akay gali bareesooh Heeroodisiib udaabit Bilaastoos ibeeniit m'asig hooy yhariwna.
21 Aflaay iwaadiyaayt tooyin,
Heeroodis tehad'aayeeti halaakaayeeh ikwi.
Tehad'aayeeti kwirsi kehii is'at oodehay infaraad.
22 Uudehay waliikiyaaniit,
<<Uun kwaasanaay hissu,
aadami hiss kiiki.>>
idiin.
23 Heeroodis Ukwaasana hamdaab kiiki akay,
Ukwaasanaay malak barooh ith'a.
Malya Heeroodis d'oob tamiyaaniit iya.