Bitrus ushanhooh fassariini
11
01 Ilinguumiyaawwa y'aamanaawwa Yahuudaay iifiin baliin Ijintiili Ukwaasanaay bhali gabbalamiyaaneet toona imaasiwna.
02 Malya Bitrus Algudus eeyanihoob,
gali Yahuudi aamanana barooh imgwasaarna.
03 Baraah <<Ibaakwishaabaayi gawaayeeb shuumtaa,
m'ariit han geeb tamtaa!>>
idiin.
04 Shaawti Bitrus kastooh toona tutikeet bareeh sooya:
05 <<Ani tumadiina Yaafaay iifi,
siileelee diwanihoob hawsooyan.
Teebri fidagee rhan,
halaak fadhigtee tishinkiitee hakwaar aneeb ookiik n'ati hoogi y'ee rhan.
06 Whalaak ashbibhoob,
toobuuti kehii eefeent fadhig ragada ibariint imalaaliit dhhaniyaatwa,
ibuutranfiifaawwa,
eekilaywa rhan.
07 Hiss waliikiib amaasiw,
<Bitrus,
Yakaa!
Een haardaat tamaa.>
idi.
08 Ani <W'ankwanaay,
toon kaad'i!
Ani masi han amaagna nhast baakaayt kataman.>
adi.
09 Whiss tibreetee masi kwinhiyaheeb <Ukwaasana sinhasaab ikatiyeena,
nhast kitti baadiya!>
idi.
10 Tuun tuuna mhay doora tiki.
Malya naatka masi teebri beeti t'agar.
11 Malya mhay da Gaysariyaay ani hooy iifiyeeb ugawi suurii willa ingadna.
12 Aashuuk Itageega een eenda geeb eetehak anu giigiyeet toona sooyaanheeb.
Aan y'aamanana y'asagwir han geebu giigiyaan.
Ootaki gaw aree shuumna.
13 Baruuh ugawiyooh malak dehaay y'aa iifiyeet toona sooyi hoon.
Umalak bariiyooh dehaay <Yaafaab beeti daab diigwata,
Siimoon Bitrus ittiyoodi tak waliiksaa.
14 Malya Bitrus baruukwa kassuuh udehayuukwa kak iidhhan tiyadneet toona sooyiini hookna.>
idi.
15 Ani bhaliiyee,
oon hinin Eeshuuk Itageega awwal nittiyeewaayeet toonaatiit,
baraah han ittiyeewaayna.
16 Ani W'ankwana diyaab iiktiyeeb ibhali sh'an <Yuhanna yamee iimis,
baraakna laakiin Eeshuuk Itageegaayee titoomiisna.>
idi W'ankwana.
17 W'ankwana Yasuu'a Umasiihi aamannanihoob,
Ukwaasana yhiyeetoon toona oodehay ugirbaab han yhii.
Aflaay Ukwaasana kak am'akiir?>>
idi.
18 Uudehay beentooy iifiin Bitrus een ibhali diyee imaasiwnihoob,
t'amgwasirooy y'ishniit Ukwaasana yhamidna.
Baraah <<Ukwaasana Ijintiili han oomidhhan imeerni jillaay tuubisiya.>>
idiin.
Antaakiyaayt tukaniisi
19 Aamanana gwadi Istifaanuus itoodaari har'ii ikeen igwirhaayi sabbii ibrarna iyheen.
Gali Fiiniigiyaabwa,
Kubirooswa,
Antaakiyaaywa yhasheeb ibrarna iyheen,
usakana udaayiib laakiin Iyahuudi eebhat sooyiin.
20 Shalik aamanana Kubirooswa,
Geerawaaneebwa iifiin,
Antaakiyaab ibeeniit Yasuu'iib usakana udaayiib Ijintiili sooyiin.
21 W'ankwanaayi y'akrir bareeyooh geeb iifiin,
gwida dehay tuubiyaaniit,
W'ankwana aamaniyaan.
22 Uun usakana Alguduseeb tiifiit tukaniisi iktim.
Malya Barnaabaas Antaakiyaab beeti diigwatiyaan.
23 Barnaabaas beentooy iktimihoob,
Ukwaasanaayt tin'ima rhiya,
winneet aree afirhiya.
Malya baraah kassooh ugin'iisoohna W'ankwana aamaneeneet toona hooy yhariw.
24 Barnaabaas daayi taku,
Eeshuuk Itageega ataabu.
Gwida dehay W'ankwanaay dehaay y'agarna.
25 Malya Barnaabaas Shaawil harwee,
Taarsuus ibi.
26 Baruuh Shaawil imriit,
Antaakiyaay haay eeya.
Beentooy tukaniisaatiib hawil timmiimaab gwida dehay allamiyaan.
Been Antaakiyaay iifiin W'ankwanaay y'aamanana awwal <<Masiihiin>> atoosmaab bareeh ikatiin.
27 Been udamaneeb nabiya gali Algudusee Antaakiyaab beeti eeyaan.
28 Bareesooh gaal Agaabuus iidna.
Baruuh Eeshuuk Itageegaayee isirid,
kasseeh yhasheeb hargwi hooy daayi indiyeet toona oodehay sooyi.
Gaysar Kilaawdiyoosi damaaniib aree tehargwi sidik tiki.
29 Ikwiriyaatay Antaakiyaay iifiin,
imiirneenaaka shamaamt akaay Yahuudaay y'aamanana istuubna.
30 Baraah beet toona id'iin.
Oomiyaawoohna Barnaabaaswa Shaawili geeb Alguduseet tukaniisaati eegrima istoobna.