Bitruswa Koorneelyooswa
10
01 Gaysariyaay tak Koorneelyoos ittiyoodi iifi.
Baruuh Roomaani dheeshi daabiti.
02 Uun uutakwa kassaah indhiwaayaahwa Ukwaasana iriikw dehaya.
Baruuh diima Ukwaasanaayi dehaay siileeli,
oodehay whamraab aree gwida mhallaga iyiw.
03 Himniyaayt gaat tuus'a mhayt tiifi,
baruuh hawsooya.
Tehawsooteeb Ukwaasanaay malak dehaay eeyaayt,
<<Koorneelyoos!>>
idi.
04 Koorneelyoos rikwiyee ishbib,
malya <<Naan teefi,
W'ankwanaay?>>
idi.
Umalak bariiyooh dehaay,
<<Toosleeltookwa yhamraani umiyaawookwa Ukwaasana gabbalamiya.
Umiyaawuuk sh'aniiteet karaama akay Ukwaasanaay dehaay reewiya.
05 Oont'a daab Yaafaay dehaay diigwata.
Siimoon been Bitrus ittiyoodiib ootak haay m'aa!
06 Baruuh Siimoon oosar maalti,
oobhari dar ugawuuh eefiyeeb,
bariiyooh geeb eefi.>>
idi.
07 Umalak een idiit giigiya.
Koorneelyoos ishagaamanaayeesooh maloobwa,
Ukwaasana iriikw kajaraayi diimaab imuurmeebwa waliikiya.
08 Bareeh kastooh toona sooyaayt Yaafaab ookiik ifdig.
Bitrusiit tehawsu
09 Tooyin tumalya aan aanda nabhoob Yaafaab idwilna oodoor,
Bitrus siileeliyee dehaay gaw reewiya.
10 Baruuh yharagw aree m'ariit tamiyeet yhariw.
Tum'ari shagaamamee aree baruuh han'aariya aree hawsooteeb daaya.
11 Teebri nigalee rhiya,
naat gaat win halaak fadhigtee tishinkiitee hakwaar t'iiteena toobuuti kehii tikwee rhiya.
12 Oon whalaaki kehii kastaah tidhhaniyaawwa,
ibuutranfiifaawwa,
aakilaywa iifiin.
13 Hiss Bitrusii dehaay eeyaayt,
<<Bitrus,
yakaa!
Een haardaat tamaa.>>
idi.
14 Bitrus laakiin <<W'ankwanaay,
ani een awariyee dehaay ka'adgiran!
Ani naat nhast baakaayt tari amaagna masi kataman.>>
idi.
15 Whiss masi dehaay igwibi,
<<Ukwaasana sinhasaab ikatiyeena,
baruuk nhast kitti baadiya.>>
idi.
16 Tuun tuuna mhay doora tiikti,
malya whalaak gaalhoob teebri y'agar.
17 Bitrus beet tuuna naan tiiktiyeeb winneet ajjabamiya.
Koorneelyoos diigwatiyaneeb aanda Siimooniib oogawi mhiin imriiniit,
udheefaay ingadna.
18 Baraah waliikiyaaniit raatiyaan,
<<Siimoon Bitrus ittiyoodi tak tooy eefee?>>
idiin.
19 Bitrus masi tehawsu tirhaab iiktiyeet masi hooy kwakwoonee,
Aashuuk Itageega dehaay eeyaaniit,
<<Siimoon,
mhay da barook yhariw eefeen.
20 Ashshiga dehaay tikwaa.
Baahasiika aree bareeh ani diigwataabu.>>
idiin.
21 Bitrus hoogiyaayt eenda infaraad:
<<Ani baraakna tehariwneeb ootaku,
naanhooy y'aabaana?>>
idi.
22 Baraah igwibiin,
<<Koorneelyoos udaabit diigwataayoonu,
baruuh daayi tak,
Ukwaasana rankwiibi.
Yahuudi dehay kassaah han barooh hamooyseen.
Ukwaasanaayi malak itageegaayee gaal Koorneelyoos ugawooh beeti eetniyi jillaay dehook diigwatisiya.
Shaawti ibhaliiyeek itindiyeeb isnaakiir.>>
idiin.
23 Bitrus bareeh yhadar,
whawaad beentooy naasiya.
Tooyin tumalya Bitrus bareeyooh geeb giigiya.
Yaafaay iiktiin Ukwaasanaay aamanana gwadi han geeb giigiyaan.
24 Tooyin tooraaw baraah Gaysariyaab iktimna.
Koorneelyoos bareeyooh w'aay yhigit.
Baruuh y'ayaydeehwa y'araweehwa han waliiksaa iifi.
25 Bitrus oogaw shuumiyani oodoor,
Koorneelyoos barooh y'ashish.
Malya Bitrusiib iragadaayi suurii dhibiyaayt asjidiya.
26 Bitrus laakiin barooh y'abikaayt,
<<Yakaa!
Ani bariitook aadamiibu.>>
idi.
27 Koorneelyoosi geeb hadiidee oogaw shuumiya.
Bitrus beentooy gwida ammarriyaa rhiya.
28 Malya bareeyooh dehaay,
<<Yahuudi tak Jintiiliib ka'araweesamiya tari barooh han ugawiyooh kiibi.
Beet tuuna whaggiyoon bitehaayeet toona tikteenna.
Laakiin gaalnaay dehaay han,
<Nhas kiiki tari nijisu.>
iyaad kaadi,
beet toona Ukwaasana rhisiyaheeb.
29 Aflaay waliikamanihoob,
gabbalamanaayt y'an.
Oont'a naanhooy waliiktaanheeb?
Sooyaanheeb.>>
idi.
30 Koorneelyoos igwibi,
<<Fadhigt yinaati suurii,
tuus'a mhayt tiiktiyihoob himniit ani ugawiib siileeli.
Gaalhoob tak eera halaakaayi suuri ingad.
31 Uun uutak <Koorneelyoos,
Ukwaasana toosleeltookwa oodehay whamraani umiyaawookwa gabbalamiya.
32 Oont'a Yaafaab beeti diigwata,
Siimoon Bitrus ittiyoodiib waliiksaa.
Baruuh Siimoon yhakooyi shagaamana ubhari dar ugawuuh eefiyeenaay geeb eefi.>
idiheeb.
33 Oon usabbui,
ani willa dehook diigwatan.
Eetaneek aree daayiib tiweera.
Oont'a kassaan tooy Ukwaasanaay suurii neefi.
W'ankwana sooyaneetook toona kastooh neemsiiweet nhariw.>>
idi.
34 Malya Bitrus hadiidiya:
<<Ukwaasana oodehay kassooh gaal shibuub shanbiibeet toona oont'a akan.
35 Laakiin oodehay barooh rikwiit tooshibu shagaameen kasseeh yhashee gabbalamiini.
36 Ukwaasana Israa'iileeb oodehayii dehaay ifdigeet tudiigwat tikteenna.
Kasseeyooh Ankwana ikatiib,
Yasuu'a Umasiihi geebii um'asgi sakana udaayiib sooya.
37 Yahuudaay naan tikayeeb baraakna tikteenna.
Yuhanna oodehay itoomiisneet toona sooyani har'ii,
beet tuuna kastuuh Jaliileeb badoota.
38 Ukwaasana Eeshuuk Itageegaawwa y'akrirwa Yasuu'a Annaasiraay yhii.
Ukwaasana bariiyooh geeb iifi akay,
Yasuu'a kasseeh yhasheeb hiireeriya,
eejin iibriin oodehay mheeliya.
39 Yasuu'a Israa'iileebwa tumadiina Alguduseebwa id'iyeet toona kassaan rhina.
Yasuu'a saliibi kehii itoodaar.
40 Laakiin Ukwaasana barooh mhayt yinaati har'ii,
tooyat hooy yakisiyaayt lawisiya.
41 Kassooh oodehay rhamaab kiiki.
Badehiib ikatiini jillaay Ukwaasana waasiyaneeb,
hinin eebhat rhamiya.
Baruuh tooyattii yakiyanihoob,
geeb tamna geeb gw'ina.
42 Yasuu'a oodehay y'ayaabwa idhhaniibwa kehii Ukwaasana gaadiib ikwaaseet toona nibadehi jillaay sooyi hoon.
Udehayoon soonayi jillaay aree sooyi hoon.
43 Kassaah inabiya bariiyooh ibadehana.
Barooh aamaneen uudehay kassuuh bariiyooh oosmii tumaagnaay afoomeen.>>
idi.
44 Bitrus masi hadiidee,
Aashuuk Itageega een ibhali iimsaw oodehay kasseeyooh daayaan.
45 Shalik Yahuudi Ukwaasana aamaniin Bitrusi geeb eeyaan.
Aashuuk Itageega Ijintiili kehii han daayaaneet toona winneet ajjabisiyaan.
46 Bareeh wari bhali hadiidee imaasiwna.
Ukwaasana aree hamdee imaasiwna.
Malya Bitrus bareeyooh dehaay,
47 <<Aan baraah shaawti Eeshuuk Itageega oon hineet ittiyeewaayna.
Oon oodehay yamee atoomsooyt yhanbi han eefee?>>
idi.
48 Aflaay baruuh Yasuu'a Umasiihiib oosmii itoomiisneet toona bareeh sooya.
Baraah han Bitrus shalikt yina geeb hangiiteet toona hooy yhariwna.