Shaawil Ukwaasana aamaniya
9
01 Shaawil W'ankwaayi ikwiriya madaree ifik.
Malya ufagiiri oowin ibi.
02 Iyahuudi diini gawa Dimashgeeb iifiinnee dehaay jawaabi kituub hooy yhariw.
Baruuh beentooy m'atwa daabwa hagtaab iiktiineek,
bareeh aabiktiit Alguduseeb yhibseet toona yhariw.
03 Shaawil Dimashig idwili mhiin,
gaalhoob talaw tibreetee oodar talawiya.
04 Shaawil whaashi kehii dhibiya,
malya <<Shaawil!
Shaawil!
Naanhooy amaag tiwariyaheeb?>>
indi hiss imaasiw.
05 Shaawil <<Seedna,
baruuk aabwa?>>
idi.
Whiss <<Ani Yasuu'a baruuk amaag tiwariyeebu.
06 Oont'a yakaat tumadiina shuumaa,
ibakii toona tudaatiniyeet soomami tindiya.>>
idi.
07 Shaawili geeb iifiin aanda naat igamniit ingadna.
Whiss imaasiwna laakiin tak han rhaab kiikeen.
08 Shaawil whaashii asti ingadaayt igw'adeeh ingilhoob,
shaawti hamasheeya naat rhaab kiiki.
Aflaay barooh Dimashig ookiik salooliyaan.
09 Mhay imb'i hamasheeya,
tamaab kiiki,
tari gw'aab kiiki.
10 Beenhoob Dimashgeeb kwiriyaataayi gaal Hanaaniya iidneeb iifi.
Ukwaasana barooh rheeb dehaay lawaa iifi,
<<Hanaaniya!>>
idi.
Hanaaniya <<W'ankwanaay,
ani tooy eefi.>>
idi.
11 Ukwaasana <<Yakaat usalal ufadhaadh ittiyoodiib abika,
beentooy kantiimhoob Shaawil ittiyoodi tak Yuudaasiib ugawiib imaar tindiya.
Baruuh tumadiina Tarsuusee y'aabu.
Baruuh beentooy siileeliini.
12 Baruuh hawsooteeb tak Hanaaniya atoosmaab rhaabu.
Uun uutak y'iit y'ayeeh bariiyooh kehii daasiini.
Aflaay baruuh rhi indi.>>
idi.
13 Hanaaniya <<W'ankwana,
uun uutak Alguduseeb y'aamananaayeek id'iyeet toomaag aneeb gwida dehay sooyaanheeb.
14 Oont'a aree ifagiiriya iwawin bariiyook oosmii siileeliiniibka oosjin haay shuumsiiniyeet had'aayi hiyaabayt tooy y'aabu.>>
idi.
15 Laakiin Ukwaasana <<Difaa!
Oon ootak oodehay igirbaabwa,
yhad'aawwa,
Y'israa'iili dehaywa aniib oosmii bhaliisamiiniyi jillaay ani waasaabu.
16 Aniib oosmii anbiidee dehaay kak haddi gwirha ibakii hooy daayi iyadneet toona ani rhisi andi.>>
idi.
17 Hanaaniya giigiyaayt oogaw shuumiya.
Anaaniyaay y'ayeeh bariiyooh kehii daasiyaayt,
<<Shaawil usanuun,
usalaliib dehook lawiyaab W'ankwana Yasuu'a diigwatiyaheeb.
Aflaay baruuk masi rhi tindiya aree Eeshuuk Itageega iitab tindiya.>>
idi.
18 Bariiyeeh igw'adee gaalhoob shadhiidh t'iiteena dhibtaayt baruuh shaawti rhiya.
Beenhoob Shaawil yakiyaayt itoomaas.
19 Malya baruuh m'ariit tamiyani har'ii daayiib kwatiimiya.
Aflaay Shaawil b'eeb galib ikwiriyaatayi geeb Dimashgeeb is'a.
Shaawil Dimashigwa Alguduseebwa
20 Malya willa Iyahuudi diini gawaayeeb allamiya,
<<Yasuu'a Ukwaasanaay Ooru.>>
iid.
21 Uudehay barooh imaasiw kassaah ajjabamiyaaniit,
<<Uun uutak Yasuu'i simii siileeliin eenda Alguduseeb amaagna oodehay rhisaab barooh kiiki han?
Tooy oodehay aabkiit ifagiiriya iwawin istuubi jillaay y'aab kiiki han?>>
idiin.
22 Laakiin Shaawil gwidaakaat akraatii waliikiya aree allamiya.
Yasuu'a Umasiih iiktiyeet toona daayiib isookin.
Dimashgeeb iifiin Iyahuudi aree naat isoogim.
23 Malya gwidaat yinaati har'ii,
Iyahuudi Shaawili madar niyaamiyaan.
24 Laakiin Shaawil beet toona soomamiya.
Bariiyeeh madari harawaay oomb'eewwa whawaadwa tumadiinaati dheefa iigw'adneet toona ikan.
25 Laakiin y'arawaah barooh whawaadiib biileeb winnaay daasiyaaniit teheetaati mooyii n'ati tikwisiyaan.
26 Shaawil Algudus iktimihoob,
tikwiriyaatooh iitrameet toona jarrabiya.
Laakiin baraah kassaah barooh irkwiin.
Baruuh sidik kwiriyaataayiib iiktiyeet toona aamanaab kiikeen.
27 Malya Barnaabaas barooh ilinguumiyaayee dehaay haay eeya.
Shaawil kak usalaliib W'ankwana rhiyaneet toona bareeh sooya.
W'ankwana aree kak barooh bhaliisamiyaneet toonaawwa,
Dimashgeeb iifiyihoob mirkwaay anu Yasuu'iib oosmii hadiidiyaneet toonaawwa han bareeh sooya.
28 Aflaay Shaawil bareeyooh geeb is'a,
Alguduseeb hiirareeriya.
Oodehay kassooh aree Ukwaasanaayi bhali winneet sooya.
29 Baruuh diima Yahuudi Yoonaani bhali hadiidiin imgwisir akay,
baraah barooh madar yhariwna.
30 Y'aamanana beet toona ikannihoob,
Shaawil Gaysariyaab beeti giigisiyaan.
Beentooysii aree tumadiina Tarsuus istoobna.
31 Tukaniisa kastuuh Yahuudaaywa,
Jaliileebwa,
Saamiraaywa tiifiit m'asig timri.
Aashuuk Itageega batooh is'akirna aree ishamna.
Tukaniisi y'adadaah gwuudiyaan,
W'ankwanaay mirkwaayiib aree tikwiri.
Eeniyaaswa Doorkaaswa
32 Bitrus haash haashii iibaabiya,
Ukwaasanaay y'aamanana Luddaay iifiin ibi.
33 Beentooy tak Eeniyaas iidneeb imri.
Uun uutak asimhay hawla lhaa iifi,
whiireer ka'adgiriya.
34 Bitrus Eeniyaasii dehaay,
<<Yaa Eeniyaas,
Yasuu'a Umasiihi mheeliya hook!
Yakaa,
oon'aalook tikwikwaa.>>
idi.
Uun uutak gaalhoob yakiya.
35 Kassuuh uudehay timadiina Luddaabwa Shaaroonwa ikwiir,
Eeniyaas rhiyaaniit W'ankwana aamaniyaan.
Bitrus takat ishidhhan
36 Yaafaay aamananaat Taabiitaab iidneet tiifi.
Iyoonaani bhaliiyeeb oosmooh Doorkaas iidna.
Doorkaas <<Ganaayt>> miyaadu.
Batuuh kassoohoob oodehay daayiinaayt tiiwri.
Oodehay whamraab han tiishtam.
37 Batuuh laakiin lhitaayt tiya.
Malya batooh ishaagwidhniit amaaraati gaw mhakwaliinaayiib daasiyaan.
38 Yaafa Luddaay daraag tiifi.
Aflaay ikwiriyaatay Bitrus beentooy iifiyeet toona imaasiwnihoob,
malu daab dehaay diigwatiyaaniit,
<<Willa m'aa hoon!>>
idiin.
39 Bitrus willa bareeh iram.
Aanda Bitrus t'amaara oodoor umhakwaliib haay reewiyaan.
Gwidaat m'at ibraatfaatkiit waawee dehaay eeyaan.
Doorkaas ayaat baakaay bateeyooh dehaay d'iyaat tiiktiyeeb yhalaakaawwa igamiswa barooh rhisiyaan.
40 Bitrus oodehay kassooh oogawii barraab isfar'a har'ii,
ignafaayt siileeliya.
Malya Doorkaasii tuginaadaatiib nakamiyaayt,
<<Taabiita yakii!>>
idi.
Batuuh eegw'ad tingil.
Bitrus rhitanihoob,
shaawti tis'a.
41 Baruuh w'ayi y'abikt iragadaayee dehaay isingad.
Bitrus teem'at t'ibraatfaatki waliikiya,
y'aamanana eeraw han waliikiya.
Malya Doorkaas tooyat hooy tidhhaneet toona rhisiya.
42 Yaafaay iifiin uudehay oon usakana imaasiw gwida W'ankwana aamaniyaan.
43 Bitrus Yaafaay tak sar maaltiib Siimoon iidneenaay gawiib middaat yhagit.