8
01 Shaawil Istifaanuusi madareeb taafagiya.
Beet tooyin Alguduseeb tiifiit tukaniisaatiib akra amaag wara iki.
Ilinguumiya nuun aree kassuuh uudehay Yahuudaawwa Saamiraaywa yhasheeb ibrarna iyheen.
02 Ukwaasana aamaniin da gwadi eeyaaniit Istifaanuus ibisna aree winneet waawiyaan.
03 Laakiin Shaawil tukaniisaatii kat'iti yhariw.
Gaw gawiika giigi,
teem'atwa eendaawwa rarhoofiit oosjin istuub.
Fiilibus Saamiraay bhaliiya
04 Laakiin y'aamanana ibarar iifiin,
iibiini mhiinka usakana udaayiib sooyiina.
05 Fiilibus tumadiina Saamiraay tiifiit hadiit giigiyaayt,
oodehay Umasiihiib usakana sooyi.
06 Uudehay uugwida barooh imaasiwna,
aree tim'uujisaateet alaama t'ikwaaseet rhiyaanihoob,
baraah kassaah bariiyeeh ibhali daayiib isnaakirna.
07 Gwida dehay jin hooy iifiineeb mheelamiyaan,
aajin akraab aadhee hooy itfir'ana.
Gwida garbamaabwa ankwaliinwa han mheelamiyaan.
08 Aflaay tumadiina kastuuh afirhita.
Siimoon useharana
09 Beenhoob tumadiinaatiib Siimoon iidni tak seharana gaal iifi.
Baruuh sehart shagaami.
Saamiraay uudehay kassuuh hooy ajjabamiya.
Baruuh ugarooyooh win tak hiisi.
10 Kassuuh uudehay uuwinwa uudiswa barooh kwalala aree isnaakirna:
<<Uun uutak Ukwaasanaay Ootaad W'akraabu.>>
iidna.
11 Uutak gwidaat midda tusehartiisooh oodehay ajbaa iifi akay,
uudehay barooh iramna.
12 Laakiin oont'a uudehay Fiilibus Ukwaasanaayt tehad'aayeeti usakana udaayiibwa,
Yasuu'a Umasiihiib oosmiiwwa bhaliiyee imaasiwnihoob,
aandaawwa taam'atwa kassaah itoomaasna.
13 Siimoon uukna han aamaniyaayt itoomaas.
Malya baruuh Fiilibus iibiyeeb oomhiin geeb ibi.
Fiilibus iid'eet tim'uujisaawwa t'alaamaawwa barooh akraab ajibiyaan.
14 Alguduseeb iifiin Ilinguumiya Saamiraay uudehay Ukwaasanaay ibhali gabbalamiyaan miyaad imaasiwnihoob,
Bitruswa Yuhannaawwa bareeh beeti diigwatiyaan.
15 Ilinguumiya imalu Saamiraab iktimnihoob,
uudehay Eeshuuk Itageega imeerneet toona dehaay siileeliyaan.
16 Oonaay suurii gwadi W'ankwana Yasuu'iib oosmii atoomsaab iiktiineek han,
Eeshuuk Itageega gaal han miraab kiiki.
17 Malya Bitruswa Yuhannaawwa y'ayeehna oodehayi kehii dadaasiyaan.
Baraah aree Eeshuuk Itageega imriin.
18 Siimoon ilinguumiya y'ayeehna oodehayi kehii daasiyaanihoob Eeshuuk Itageega imriineet toona rhiyanihoob,
bareeh mhallagaab yhii.
19 Malya Yuhannaawwa Bitrusii dehaaywa <<Aneeb han een y'akrir hiinaheeb,
malya ani y'ayi kehii daasaniyeeb uudehay Eeshuuk Itageega imeerna.>>
idi.
20 Bitrus bariiyooh dehaay,
<<Ukwaasanaay miyaaw mhallagaayee itdaliibeeb hiistiniyeek,
baruukwa imhallagaayaakwa toon'i daayi tiyadna.
21 Oon ushanhiib baruuk naat adhidh hooy kitbariya.
Ukwaasana aree amaag gin'iib tikatiyeet toona rhiini hook.
22 Tumaagnaaytook hooy tuubaat W'ankwanaay dehaay siileela.
Ugin'iyook tibariyeet tehadaatniya kisib afooyiini hook.
23 Hamiinaayt ataabwa,
idinuubaak abkaayeek akay rhani hook.>>
idi.
24 Siimoon <<Aflaay tuuna baraakna tiyadneet deha bit'akaayi jillaay,
baraakna W'ankwanaay dehaay siileelaana.>>
idi.
25 Bitruswa Yuhannaabwa Ukwaasanaay ibhali sooyaani har'ii,
Algudus beeti y'agarna.
Gwidaat Saamiraay gariyaateeb aree usakana udaayiib sooyiin.
Fiilibuswa Whabashiiwwa
26 Ukwaasanaay malak Fiilibusii dehaay,
<<Yakaa oos'iid bayaa!
Algudusee Gazzaab eebiib umingaayi salalii sakaa!>>
idi.
27 Aflaay Fiilibus idif.
Usalaliib habashiib win daabit tanbiil iibriib imri.
Uun uutak Whabashiit Tehad'a Kandaakaati oomraayi wakiili.
Baruuh han siileeltii dehaay Algudus bayaa iifi.
28 Oont'a aree utanbiilooh amaa it'igir.
Unabi Ish'aayaay ooktaab aree agriiyi.
29 Aashuuk Itageega Fiilibusii dehaay,
<<Suurbayaa,
been utanbiil diwilaa.>>
idiin.
30 Fiilibus utanbiil idwilihoob,
uutak Ish'aayaay ooktaab tageega hissii agriiyee imaasiw.
Fiilibus barooh raatiya,
<<Toona t'agriitiniyeet afhamtiniya?>>
idi.
31 Uun uutak <<Weer iishatamheeb biidiyeek,
kak afhamani?>>
idi.
Malya baruuh Fiilibus utanbiiliib geebooh eesit'eet toona hooy yhariw.
32 Uutak ooktaabiib een ibhali agriiyi,
<<Baruuh wharuudi arginiit saloolamiya.
W'argin w'itoomiinnaayt diniya,
aflaay uyafooh han nigilaab kiiki.
33 Baruuh amaag itweeraay,
adil miraab kiiki.
Umidhhanuuh tubuutii yakamiyaneek,
aaw tidirriyaatooh sooyiini?>>
idi.
34 Uun Whabashi Fiilibusii dehaay,
<<Unabi ugarooyooh haay tuuliini han,
hana weer tak?
Sooyaheeb.>>
idi.
35 Malya Fiilibus oon unabi kitaabii badooyaayt,
barooh Yasuu'iib usakana udaayiib sooya.
36 Baraah masi usalal abkee,
yami mhiin eeyaan.
Uutak Fiilibusii dehaay,
<<Shibiba!
Tooy yam eefeen.
Tooy atoomiiseek naan hanbiheeb?>>
idi.
37 Fiilibus <<Kassooh ugin'iisook haay aamantiniyeek titoomiisee dehaay adgirtiniya.>>
idi.
Uutak <<Ani Yasuu'a Umasiihi Ukwaasanaay oor ikatiyeet toona aamanani.>>
idi.
38 Aflaay baruuh utanbiil isingad.
Malya baraah hiddaab eeyam beeti tikwiyaan.
Fiilibus aree ooraaw imis.
39 Eeyamee ifir'anihoob,
W'ankwanaay Aashuuk gaalhoob Fiilibus giigisiyaan.
Whabashi shaawti barooh rhaab kiiki.
Baruuh laakiin wineet afirhaa usalalooh sakiya.
40 Door weer,
Fiilibus Asootuus iidneet madiinaatiib lawiya.
Kasteeh timadiinaateeb hiireeriya,
Gaysariyaab iktimeeb ookiik oodehay Yasuu'iib usakana udaayiib sooyi.