Istifaanuus umajlisiib hadiidiya
7
01 Malya ufagiiri uuwin Istifaanuus raatiya,
<<Baraah hook hadiideeneet tuuna sidiku?>>
idi.
02 Istifaanuus aree <<Isanaayaanwa baabaanwa,
sinaakirnaheeb.
Hoobuun Ibraahiim Haraaneeb kwiraab biikaayihoob,
masi Iraageeb haayee,
Ukwaasana W'alya dehaay lawiya.
03 Ukwaasana bariiyooh dehaay,
<Whaashookwa udehayookwa ishaat,
ani rhisi andiyook whaash ookiik giigaa!>
idi.
04 Aflaay Ibraahiim Kaldaani whaash hooy giigiyaayt,
Haraaneeb kookiya.
Baabuuh iyani har'ii,
Ukwaasana barooh oon whaash oont'a hooy tikweerneeb beeti ifdig.
05 Laakiin Ukwaasana barooh naat han hiiyyaab kiiki,
uragadooh kehii daasiyi haash han hiiyyaab kiiki.
Laakiin Ukwaasana baroohwa tidirriyaaytoohwa oon whaash iniiweet toona waadiyaab ims'abaak.
Oodoor beeb Ibraahiim ar biibariiyeek han Ukwaasana barooh waadiyaab ims'abaak.
06 Ukwaasana <Ibraahiimiib y'ar door gaal girba haashiib ikweerna.
Beentooy aree fadhig shi hawlaab kishiyaab iiktiin iyadna,
amaag itweeriin.
07 Laakiin oodehay bareeh amaag iwariin jasaayi andi.
Beenaay har'ii,
baraah been whaashii fir'iit aneeb y'ibid iyadna.>
diyaabu.
08 Malya Ukwaasana Ibraahiimi geeb ookwishuubi galad id'i.
Aflaay baruuh Isehaag ifriit,
tooyin t'asimha barooh ikwishib.
Malya Isehaag aree Yaaguub ifri.
Yaaguub aree y'areeh itamna malu ikwishib.
Baraah Israa'iileet tidirriyaayti hooba y'awwaliiba.
09 Aan isana itamna malu Yoosif haasadiyaan.
Barooh ukishiyaayt Masreeb idlibna.
Laakiin Ukwaasana bariiyooh geeb iifi.
10 Ukwaasana barooh kasseeh igwirhaayee ishidhhan.
Fagaratandiit yhii,
Masreeb whad'a Far'uun bariiyooh dehaay ishboobiib ikwaas.
Aflaay Far'uun barooh Masri kehii haakim ikwaas,
ugawooh kassooh han is'abik.
11 Malya kastooh Masreebwa Kan'aaneebwa hargwiit dhibta.
Hoobaan tamiineet m'ari han miraab kiikeen,
winneet gwirhaayeeb daayaan.
12 Yaaguub Masreeb harroob iifiyeet toona ikanihoob,
awwal iibaabtoohna akay hoobeen Masir istoob.
13 Oodoor umalya ibeenihoob,
Yuusif isanaayeeh itookkaan.
Far'uun han Yoosfiib indhiwa ikan.
14 Malya Yuusif ubaaba Yaaguubwa kasseeh dhiwaayeehwa waliikisiya.
Baraah kassaah asarama tamuunwa ay nafara iiktiin.
15 Aflaay Yaaguub Masir ibi.
Baruuhwa hoobaan aarawwa beentooy iyaan.
16 Kasseeh aree tiginaadaataah Shakiim ookiik itfayyaakna.
Ibraahiim Yhaamooriyaayee idlib iyhaneeb whaashiib aree itoobaasna.
17 Uudoor Ukwaasana Ibraahiim hiiyyaab iiktiyeeb iwaadiya eeya.
Beenhoob udehayuun Masreeb gwuudiyaan.
18 Malya weer had'a Masir yhakim.
Baruuh aree Yoosif kiikan.
19 Uun whad'a udehayoon itlis,
hoobeen amaag waraayi.
Oofraayoohna isoogid,
aflaay inisrikaayaah iyeen.
20 Been udamaaniib Muusa ifri.
Baruuh winneet gibliibu,
ifarooyaah mhay tirga geeboohna isehamna.
21 Malyaab barooh barraab ishti d'uuy hooy iteharraawna,
whad'aayt oot aree barooh timriit oorooh tikwaas.
22 Muusa winneet daayi t'aliim Masreeb t'aliimamiya.
Baruuh winneet akra tak hadiidanaab iki.
23 Muusa fadhig tamuun hawla id'ihoob,
udehayooh Y'israa'iili iishtameet toona yhariw.
24 Yint gaat Masri gaal bareesooh amaag waraayee rhiya.
Barooh yhiibi jillaay giigiya,
Umasri idiraayt barooh ishidhhan.
25 Muusa,
Ukwaasana bareeh ishidhhiini jillaay barooh haay y'aab iiktiyeet toona udehayuuh aakna iktiinneeb hiisiya.
Baraah laakiin kanaab kiikeen.
26 Oomb'i ooraaw malu Israa'iili finaasamee rhiya,
eebtik aree adil id'i.
Baruuh <Yhaana,
baraakna sanaabaana,
naanhooy taktaki lhasti tehariwna?>
idi.
27 Laakiin uutak oofna badooyaab Muusaab har'a ikwit,
malya <Aaw barook haakimoon ikwaas hook,
aaw gaadiyoon ikwaas hook?
28 Iru Umasri tidireet toonaatiit aneeb han idaarheeb tindiya han?>
idi.
29 Muusa een ibhali imaasiwihoob,
Miidiyaan beeti ifoor.
Beentooy mitlaliib ikwiri,
malu ar aree ifri.
30 Fadhig tamuun hawlaayi har'ii,
iitlaw hindiyi balaloolee Muusaab malak dehaay lawiya.
Umingaayiib Oorba Siinaayi daraag dehaay lawiya.
31 Muusa toon toona rhiyanihoob,
winneet ajjabamiya.
Idiili jillaay giigiya.
Idwilihoob,
W'ankwanaay hiss imaasiw:
32 <Ani hoobaak Ibraahiimwa,
Isehaagwa,
Yaaguubwa y'ibidneeb Ukwaasana.>
idi.
Muusa katatiya,
iishbibee dehaay adgiraab kiiki.
33 W'ankwana Muusaay dehaay,
<Tigidh'aateek nash'aa!
Uumhiin baruuk hooy tingadiyeeb mugaddas haashu.
34 Ani udehayi Masreeb amaag atweeraayee rhan.
Tuwaawtoohna amaasiw,
aree bareeh ashidhhiini jillaay y'aabu.
Oont'a m'aa!
Masir beeti igir hook andi.>
idi.
35 Oon Muusaab ookna udehayuuh iribna.
Baraah <Aaw haakimoonwa gaadiyoon ikwaas hook?>
diyaa iifiin.
Muusa oodehayi haakim iiktiyi jillaaywa ishidhhini jillaaywa Ukwaasana uukna barooh diigwatiya.
Ukwaasanaay malak yhindiyi bitkeesii Muusaab bhaliisamiya.
36 Muusa oodehay Masree isfar'a,
oobhar w'adarooywa umingaayiibwa fadhig tamuun hawla ajaayibwa m'uujisaatwa ikwaas.
37 Muusa Y'israa'iili bak sooya:
<Ukwaasana udehayiisookna oon aniit nabiib gaal dehookna diigwati indi.>
idi.
38 Muusa udehayoon umingaayiib idbil,
umalak aree oorba Siinaayeeb baroohwa hoobeenwa bhaliisamiya.
Baruuh aree Ukwaasanaay ibhali idhhaniib iyhaayt beetoon hassiya.
39 Laakiin hoobaan barooh sinaakraab kiikeen.
Barooh iribna,
igin'aayee Masir m'ageert yhariwna.
40 Uudehay Haaruunii dehaay,
<Sanamaab galib suuroon sakeen dehoon d'iyaa.
Muusa Masree isfar'a hoon,
oont'a laakiin naan ikayeeb nigam.>
idiin.
41 Beenhoob lagaayt hay'aatii sanam id'iin,
oon ulaga karaamaat dehaay iifir'ana,
oon ushaga idaayaaneeb aree winneet haay afirhiyaan.
42 Ukwaasana oodehayii fidnaab ankamiyaayt,
yhayikw y'ibidni jillaay bareeh ingad id'i.
Inabiyaayi kitaabiib bak kataabtu:
<Yaa Y'israa'iili,
baliin ifadhig tamuun hawla umingaayiib tiifiineeb,
anii dehaay karaamaatwa miyaawwa haay eetaana?
43 Baraak usanam Mooleekiit tukheema tifiyakna,
ukwaasanaayookna Reefaaniib whayuukw yakistaana.
Baliib isanama t'abidni jillaay shagaamtaana.
Aflaay bareekna Baabilyooni gidehii hasiibiyaab iikwasi hookna andi.>
idi.
44 Hoobaan umingaayiib Tibadehaateet kheema ifiyakna.
Beet tukheema Ukwaasana Muusaab mitiyaayaayt rhisaab iiktiyeet tehay'aatii shagaamamta.
45 Malya Jooshiwa hoobeeyoon maalhi iiktiyihoob,
beet tukheema baraah iyheen.
Ukwaasana baliin yhasheeb iifiin oodehay hoobeeyoon suurii iskwiit yhash bareeh yhii.
Hoobaan been Daawdiib udamaan ookiik beet tukheemaatiib Ukwaasana y'abidna.
46 Daawid Ukwaasanaay gibuul imri.
Yaaguubiib Ukwaasanaay dehaay gaw yhariw.
47 Laakiin whad'a Suleemaan been oogaw Ukwaasanaay dehaay id'ir.
48 Laakiin Ukwaasana Winneet Utageega,
uudehay shagaamaab ikatiini gawaayeeb kiikwiri.
Unabi bak indi:
49 <Taabri kwirsiib aniita,
tuubuut aree anii mingidi mhiinu,
kak eefi gaw deha iid'ir tiyadna?
Tari keeya haashiib fiinsiheeb tiyadna?
50 Teen teena kasteeh ani shagaamaab kaaki han?>
indi.
51 Baraak hadaniyaab tibariina,
akra girmaayaana!
Kassoohoob Eeshuuk Itageega finaateena,
hoobaakna han suur bak weeraaba.
52 Hoobaakna amaag weeraab biikaayni nabi eefi han?
Ooshiboob Oongaalnaay w'aay sooyiin inabiya han idaarna.
Oont'a aree barooh titilniit tidirna.
53 Ukwaasanaay imalak hag sooyaan hookna,
laakiin sinaakiraab kitteena.>>
idi.
Istifaanuus rajamoomiya
54 Umajlisi da Istifaanuusiib ibhali imaasiwnihoob,
winneet yhaseeniit gadabiyaan.
55 Laakiin Istifaanuus been Eeshuuk Itageega itab.
Teebri ishbibihoob,
Ukwaasanaay Umatuun rhiya.
Yasuu'a aree Ukwaasanaay umaygwadii dehaay gadee rhiya.
56 Istifaanuus bareeyooh dehaay,
<<Teebri nigalee rhani,
W'aadami Oor aree Ukwaasanaay maygwadii dehaay gadee rhani.>>
idi.
57 Umajlisi da akraab kwinhiyaan,
y'angwileeh y'aabikna.
Kassaah Istifaanuusii dehaay fariyaan.
58 Barooh tumadiinaatii ifir'aniit aweeyee geediyaan.
Uudehay bariiyooh kehii gwisree bidehaa iifiin,
yhalaakaayeehna Shaawil iidni oori ragadaayi whii daasiyaan.