Asarama da waasamiyaan
6
01 Been udamaaniib W'ankwana aamaniin uudehay gwuudiya.
Een bareesooh gali Iyahuud Iyoonaani baliin Iyahuud Y'ibraaniyee ashkiimiyaan.
Taam'at aandaah ayaab iiktiineet Tiyoonaani,
oomb'ika iyiwneet tim'ariitii w'adhdhooh miraat kiikeen akay,
baraah ashkiimiyaan.
02 Ilinguumiya itamna malu oodehay w'aamaniin kassooh hiddaab waliikiyaan,
<<Ukwaasanaay ibhaliyi sooti m'ariiti jillaay ishti nid'eet tuuna daayiit kitti.
03 Isanaayaan,
asarama da hamooysamaab,
fagaraab,
Ukwaasanaay Shuuk atab waasaana.
Teen teena nis'ibik niyad.
04 Ukwaasanaay ibhaliyi agriistiiwwa toosileeltiibwa idamaneen hassini.>>
idiin.
05 Een ibhali kassaah areeyaan.
Malyaab Istifaanuus waasiyaan.
Baruuh winneet akra iimaan iibri,
Eeshuuk Itageegaayee aree ataabu.
Malya aree Fiilibuswa,
Birookhooruswa,
Niikaanoorwa,
Tiimoonwa,
Barmiinaaswa,
Niikoolaas Antaakiyaay whaashii iiktiib Yahuudiib ikeebwa,
waasiyaan.
06 Malya baraah een eenda ilinguumiya beeti haay eeyaan.
Ilinguumiya sileeliyaaniit y'ayeehna bareeyooh kehii daasiyaan.
07 Aflaay Ukwaasanaay ibhali ibrarna.
Alguduseeb iifiin y'aamanana willa gwuudiyaan,
winneet gwida fagiiriya W'ankwana aamaniyaan.
Istifaanuusiit t'abuuki
08 Ukwaasana Istifaanuus n'imaatwa akrirwa yhii.
Baruuh oodehayi bitik akraat ajaayib ikwaas.
09 Malya Ikishiya Ifadagnaayi Iyahuudi Diini Gawii gwadi bareeh imgwashaashna.
Geerawaaneewwa Iskandariyaaywa iiktiin Yahuudi gwadi han ikishiya ifadag ishamna.
Kiiliikiyaaywa,
Aasiyaaywa iiktiin wari han bareeh ishamna.
Aan aanda Istifaanuus imgwasaarna.
10 Laakiin gaal han bareesooh barooh nadiirsami kiihaay.
Baruuh Aashuuk Itageega hiiyyaab iiktiineet fagaratiyaatee hadiidi.
11 Malya baraah daab galib balsaat yhiiniit hadiidisiyaan.
Baraah <<Istifaanuus kifuuri bhali Muusaabwa Ukwaasanaay kehiiwwa hadiidee nimaasiw!>>
idiin.
12 Aflaay baraah oodehaywa,
y'eegrimaawwa,
whaggi koojaawwa Istifaanuusiib iisbibna.
Malya Istifaanuus y'abikniit umajlisi suurii haay eeyaan.
13 Baraah gwisreet badeha ibidehaniit,
<<Uun baruuh oomhiin umugaddaswa Utooraati kehiiwwa toomaagti bhaliitii door han gadaab kiiki.
14 Masi aree <Yasuu'a Annaasiraay y'eetiit oon whaash kwidhsi indi,
Muusa hiyaayoon ikatiyeet t'aada gayyari indi.>
diyee nimaasiw.>>
idiin.
15 Kassuuh uudehay been umajlisiib iifiin winnneet Istifaanuus iishbibna.
Bariiyaah aafiir umalaki fiir t'iiteeb akay rhiyaan.