Hanaaniyaawwa Saafiiraawwa
5
01 Hanaaniya iidni tak tutakatuuh Saafiiraawwa han whaashoohna idlibna.
02 Laakiin baraah iitilnee dehaay imakkaarna,
mhallagaab galib isimhana,
ibaagi aree ilinguumiyaayi suurii daasiyaan.
03 Bitrus bariiyooh dehaay,
<<Hanaaniya,
uubliis whaashi mhallaga galib kak hook isimhi?
Naanhooy Eeshuuk Itageegaayee dehaay tigwaasira?
04 Whaash dilbaab baakaay bariiyook kiiki han?
Tidlibeenaay har'ii han imhallaga bariiyeek kiikeen han?
Bak t'iiteena saktiib naanhooy tikwinaa?
Dehayii dehaay gwaasraab kitta,
laakiin Ukwaasanaayi dehaay tigwaasirna.>>
idi.
05 Hanaaniya een bhali imaasiwihoob,
whaashii kehii dhibiyaat iya.
Kassuuh uudehay beet toona imaasiw akra mirkwaay hooy daaya.
06 Malya areereewa gwadi eeyaaniit barooh ishaamimna.
Tuginaada aree haay ifir'aniit ibisna.
07 Mhayt s'aati har'ii tutakatuuh eeta.
Batuuh laakiin utakooh naan dehaay tikayeeb kanaat kitti.
08 Bitrus batooh raatiya,
<<Uun baruuh batuukwa Hanaaniyaawwa whaashi dalabii timriineeb itaman kiiki han?
Sooyiiheeb!>>
idi.
Batuuh <<Aahaa,
aan imhallaga hinin whaashi dalabii nimriyeeba.>>
tidi.
09 Bitrus batiiyooh dehaay,
<<Baraakna W'ankwanaay Eeshuuk kak jarrabtiina?
Hanaaniyaab utakook ibis aanda udheefaay eefeen.
Batook han yaksi hook iyadna.>>
idi.
10 Batuuh han gaalhoob Bitrusi iragadaayi whii whaashiib dhibtaayt tiya.
Y'areereewa eeyaanihoob,
Saafiiraab ayaa rhiyaan.
Shaawti yakisiyaaniit utakiyooh daraag ibisna.
11 Tukaniisaati dehay kassooh akra mirkwaay dehaay dhibiya.
Uudehay baliit teena imaasiw han kassaah irkwiin.
Ilinguumiya gwida dehay mheeliyaan
12 Ilinguumiya oodehayi bitik gwidaat m'uujisaateet alaamaatwa ajaayibwa ikwaasna.
Ukwaasanaay aamanana kassaah diima udiini gawi dheefa Suleemaaniib umajlisi mhiin iidneenaay immiririin.
13 Uudehay kassuuh bareeh areeyiineek han,
gaal han ash'araa bareeyooh amshawawiyaab kiiki.
14 Laakiin gwida daawwa m'atwa W'ankwana aamaniyaaniit bareeyooh y'adadeeb imshawwaayna.
15 Uudehay baliib eelhaab n'alwa madhamaati kehii id'iiniit isalalaayeeb daasiin.
Bitrusiit hasamee tul'andalaatuuh han bareeh kantiimeek mheeltini miyaadiib daasiin.
16 Gwida dehay Algudus dawil yhasheeb iifiin,
udehayoohna eelhaab tari jin hooy iifiineeb haay y'iina.
Baraah kassaah aree mheelamiin.
Ilinguumiya amaag itweeraayna
17 Ufagiiri uuwinwa kassaah y'arawaahwa,
Isadduuki jam'a iiktiin winneet giiraat itabna.
18 Baraah ilinguumiya y'abikniit tumadiinaati sijniib id'iin.
19 Laakiin whawaadiib W'ankwanaay malak eeyaayt,
oosijni dheefa ifidigaayt bareeh isfar'a.
Bareeyooh dehaay,
20 <<W'ankwanaay gaw beenaa,
oon oomidhhan ugayiib oodehay kassooh sooyaana.>>
idi.
21 Baraah toona tusoomamaab iiktiineet sakiyaan,
karuumaab W'ankwanaay gaw shuumiyaaniit oodehayi allamti badooyaan.
Beenhoob ufagiiri uuwinwa y'arawaahwa eeyaanihoob,
Israa'iileeb y'eegrimaayi majlis waliikiyaan.
Malya ilinguumiya oosijnii haay y'eeneet toona sooyaan.
22 Laakiin oosjin iktimnihoob,
idaabta bareeh miraab kiikeen.
Aflaay baraah y'agarniit beet toona sooyaan.
23 Idaabta <<Uusjin akraab hakwaaru,
igw'aadiiga aree idheefaayeeb gadaa iifiin.
Laakiin idheefa nifdigaayt shuumnanihoob,
tehooyteeb gaal han miraab kinki.>>
idiin.
24 W'ankwanaay oogawi gw'aadiigaayi suurkinaawwa,
ifagiiriya iwawinwa naatgimaay daayaan,
ajjabisiyaan <<tuun tehalaagaay kak ingid tindi?>>
idiin.
25 Malya tak eeyaayt,
<<Baraakna oosjin tid'iineeb aanda oont'a W'ankwanaay oogawi hooshiib gadaa oodehay allameen.>>
idi.
26 Malya igw'aadiigaayi suurkina idaabtaayi geeb giigiyaayt ilinguumiya haay eeya.
Oodehayi rajamooti irkwiini sabbii,
bareeh akriree haay y'aab kiikeen.
27 Ilinguumiya umajlisi suurii haay eeyaanihoob,
ufagiiri uuwin bareeh raraatamiya.
28 Ufagiiri uuwin <<Hinin Yasuu'iib oosmii oodehay bit'allamayneet toona akraab sooni hookna.
Laakiin Algudus it'aliimiisookna titab.
Oon ootaki booyi s'abuuk tehariwna hoon.>>
idiin.
29 Laakiin Bitruswa ilinguumiya aarawwa igwibiin,
<<Hinin ibakii Ukwaasana nisnaakiir nuun oodehay kinsinaakir!
30 Yasuu'a saliibi hindi kehii mismaraayee tidirna.
Laakiin Ukwaasana hoobaan y'ibidneeb barooh tuyattii yakisiya.
31 Malya Ukwaasana barooh had'aabwa ishidhhiinwa ikwaasiit umaygwadiyooh mhiin yhii.
Shaawti Israa'iili dehay tuubsiit idinuubeehna afoosi indi.
32 Hinin teen teenaati baadehiiba.
Ukwaasana isnaakiir oodehay attiyeewiyaab,
Aashuuk Itageega han baadehiiba.>>
idiin.
33 Umajlisi da een imaasiwnihoob,
winneet yhaseeniit ilinguumamaayi madar yhariwna.
34 Laakiin bareesooh gaal Fariisiib Gamaal'eel iidneeb hamooysama kooja iifi.
Shalikt midda ilinguumiya ugawii barraab isfar'a.
35 Malya bareeyooh dehaay,
<<Israa'iili dehay,
een eendeeb timakirneet toona daayiib ugin'ookna hooy d'iina.
36 Shalikt middaati dabaay Toodaas lawiya.
Baruuh fagar tak massalamiya,
fadhig shi da aree barooh iramna.
Malya laakiin itoodaar.
Kassaah ibarooh iram aree ibrarna iyheen,
shaawti mishiit ikeen.
37 Malya bariiyooh har'ii,
whaashiyuun uudehay idhdhagwgwaayeeb eemb'i,
Yahuuda Ujaliilaayi lawiya.
Gwida dehay oofnaay dehaay barooh iitram imri.
Laakiin baruuh han itoodaar.
Barooh iram aree ibrarna iyheen.
38 Aflaay aniib oomkir sinaakirna:
Een eenda hooy sigiina!
Bareeh ishna d'iina!
Aan baraah niyaameeneet tuuna tari tishagaameeneet uudehay aakna id'ani gadar ikatiineek,
ibakii kat'ami tindi.
39 Laakiin Ukwaasana sooyaab ikatiyi shaga ikatiyeek,
baraakna Ukwaasana finaasami bitdiineek beet toona tisingiidnee dehaay ka'adgirtaana.>>
idi.
Umajlisi da een ibhali haay dhibiyaan.
40 Ilinguumiya waliikiyaaniit winneet kwirbaajii ithab'ana.
Malya bareeyooh dehaay,
<<Shaawti Yasuu'iib oosmii baahadiidaana!>>
idiiniit ifdigna id'iin.
41 Ilinguumiya umajlisii afirhaa giigiyaan.
Ukwaasana bareeh Yasuu'iib oosmi jillaay ilhamti astehaleen ikwaaseet toonaatii afirhiyaan.
42 Baraah diima Ukwaasanaay gawi hooshiib daayaan,
gaw gawii dadaayaan.
Yasuu'a Masiih iiktiyeet toona,
usakana udaayiib,
oodehay allamiin aree sooyiin.
Beet toona door han sigadaab kiikeen.