Bitruswa Yuhannaabwa Iyahuudi majlisi suurii
4
01 Ilinguumiya masi oodehay bhaliisamiinihoob,
ifagiiriyaawwa,
W'ankwanaay gawi gw'aadiigaayi suurkinaawwa,
Sadduugiibwa dehaay eeyaan.
02 Ilinguumiya oodehay allamiin,
<<Y'aya tooyattii yakeena,
Yasuu'iib uuyak aree beet toona akkadiini.>>
idiin.
Baliin aanda ilinguumiya bak diyee imaasiwina akay,
winneet yhaseen.
03 Uudoor himniit iikti.
Baraah Bitruswa Yuhannaabwa tooyin tooraaw ookiik oosjin id'iin.
04 Laakiin gwida dehay bareeyeeh ibhali imaasiw aamaniyaan.
Aanda y'aamaniyaan y'adadaah ay alfa iiktiin.
05 Tooyin tumalya yhaakmaawwa,
y'eegrimaawwa,
udiini koojaawwa Alguduseeb immarraayna.
06 Hannaas ufagiiri uuwin beentooy iifi.
Kayaafaaswa,
Yuhannaabwa,
Iskandarwa,
wari da ufagiiri oowinnaay dhiwaayee iiktiinwa beentooy iifiin.
07 Bitruswa Yuhannaawwa haay eeyaaniit suuroohna isingadniit raraatiyaan,
<<Naa akrireewwa aay simiiwwa beet toona tid'iina?>>
idiin.
08 Bitrus Eeshuuk Itageega itab,
malya bareeyooh dehaay,
<<Yhaakmaawwa oodehayi suurkinaawwa,
09 garbama takii dehaay nid'iyeet tudaayiinaayti sabbii waliiktaan hoon han?
Baruuh kak mheelamiyaneeb kanaant tehariwna han?
10 Aflaay baraakwa kassuuh Israa'iileeb uudehay kassaakna toon kanna:
Uun uutak n'iraa suurookna ingadiib,
Yasuu'a Uumasiihi W'annaasiraay baraakna tidirneenaay oosmii in'ir.
Baraak Yasuu'a saliibi kehii tidirna,
Ukwaasana laakiin barooh ishidhhan.
11 Uuktaab indi:
<Baruuh w'awi id'aariiga iribneeb,
malyaab toorkwinti awi oogaw yaksiiniib barooh ikati.>
indi.
12 Yasuu'aab nuun weer ishidhhiin kiihaay.
Tibreeti whii barooh nuun oodehay ishidhhiin sim weer kiihaay.>>
idi.
13 Umajlisi da Bitruswa Yuhannaaywa w'ash'artiib ajjabamiyaan.
Masi aan ilinguumiya imalu aree agriiya da biikaayneet toona ikanna.
Aan aanda suur Yasuu'i geeb iifiineet toona han ikanna.
14 Laakiin ootak umheelamiyaab bareeyooh daraag gadee rhiyaan akay,
umajlis naat han gwibiyaab kiikeen.
15 Aflaay bareeh umajlisii itfar'aneet toona sooyaan.
Malyaab isuurkina aakna tarootsamiyaan.
16 Baraah <<Een eenda kak niwari?
Alguduseeb ikweer uudehay kassuuh teen tim'uujisa ikteenna.
Beet toona nittawiyee dehaay aree ka'adgirna.
17 Laakiin uun usakana oodehayi bitik bii'atmassaawee dehaay een eenda shaawti Yasuu'i simii tak han bii'anfaraadneet toona sooni.>>
idiin.
18 Malya ilinguumiya imalu waliikiyaaniit,
shaawti Yasuu'i simii biibhaliiyayneet toona tari bii'allamayneet toona sooyaan.
19 Laakiin Bitruswa Yuhannaawwa <<Baraakna iknaayaakna hakimna:
Ukwaasana bareekna nisnaakiireet toona harriiw han barooh?
20 Hinin toona turhinaneetwa tunimaasweetwa tim kehii nikatiyee dehaay ka'adgirna.>>
idiin.
21 Y'eegrima bareeh akraab ifikna har'ii ifdigna.
Beenhoob uudehay kassuuh toona tutikeetiib Ukwaasana yhamidna akay,
bareeh amaag iiwriineet adgiraab kiikeen.
22 Uutak tim'uujisaatee in'ir fadhig tamuuni mhakwal hawlaab iibri.
Y'aamananaayeet siileel
23 Bitruswa Yuhannaabwa ifdagnahoob,
oodehayoohna ookna beeti y'agarna.
Ifagiiriya iwawinwa y'eegrimaawwa hadiidiyaaneeb ibhali kasseeh oodehay sooyaan.
24 Ukwaasana aamaniin aaraw een ibhali imaasiwnihoob,
hiddaab siileeliyaan,
<<W'ankwana Utageega,
toobuutwa teebreebwa manoota,
oobharwa tehooy teefi kastoohwa manoota.
25 Baruuk Eeshuuk Itageegaayee hooboon Daawid ukishiyaayook miidalaabii hadiidta.
Baruuk,
<Uudehay naanhooy itragiisna?
Uudehay naanhooy toomaag imakirna?
26 Tubuuti had'a oofinaay dehaay eetmiirna,
Imaalhi hiddaab ikatiin W'ankwana im'akiirna,
W'ankwanaawwa Umasiihooswa imoomiigna.>
tidiya.
27 Tooy Alguduseeb Heeroodiswa,
Biilaatoos Ubuntaayiiwwa,
Ijintiiliiwwa,
Israa'iileeb uudehaywa toon tumadiinaatiib immarraayniit,
Yasuu'a ukishiyaayook utageega baruuk waasaab tiiktiyeeb kehii maagt sakiini jillaay imkirna.
28 Baraah baruuk batiikti suur diyaab tiiktiyeet toona id'iin.
29 Oont'a W'ankwanaay,
bareeyooh oofaak maasiwa!
Hinin kishiyaayeeka akay ibhaliiyeek soonayi jillaay ash'araab kwaas hoon.
30 Oomheeli jillaay w'ayook fidhidhaa,
m'uujisaateet alaama kwaasa,
ukishiyaayook utageega Yasuu'iib oosmii ajaayibt kwaasa.>>
idiin.
31 Toon toosileelti har'ii,
uugaw ibaraah hooy iifiineeb katatiya.
Baraah kassaah Eeshuuk Itageega itabna,
winneet ash'araa aree Ukwaasanaay ibhali hadiidiyaan.
Y'aamanan oomraayoohna im'adhdhaadhna
32 Kassaah y'aamana gaal gin'iiwwa gaal girmaay sakiin.
Gaal han oomraay w'iibriyeeb waasaab kiiki.
Laakiin iibriineena kastooh im'adhdhaadhna.
33 Linguumama Yasuu'a tooyat hooy yakaab iiktiyeet toona akraab ibidehana.
Ukwaasanaayt tin'ima aree kasseeyooh geeb iifiin.
34 Bareeh eebtik aniw tak kiihaay.
Door doorii aree baliin whaash iibriin tari gawaab iibriin idaalibniit,
imhallaga haay y'iin.
35 Malya baliin imhallaga ilinguumaayi suurii oodehay w'aniw iyiwna.