Bitruswa Yuhannaabwa garbama tak mheeliyaan
3
01 Yint gaat Bitruswa Yuhannaabwa tuus'a mhayt asir tikayihoob siileeliinee dehaay Ukwaasanaayi gaw ibeen.
02 Ifrayeekka garaabaay tak,
W'ankwanaay oogawi dheefa W'indaawriib ittiyoodiib beeti itfiyikneeb iifi.
B'eebka aree oon udheefaay yaf daasiina.
Been oodehay W'ankwanaay oogaw shuumiin iin'ili jillaay barooh beentooy daasiina.
03 Uutak Bitruswa Yuhannaabwa W'ankwanaay oogaw shuumee rhiyanihoob,
naat mhallagaab hooy yhariw.
04 Baraah laakiin hasiit liiliyaatee igwaalilniit,
<<Gwaalila hoon!>>
idiin.
05 Uutak naat iyiwneeb hiisiyaayt bareeh igwaalil.
06 Laakiin Bitrus <<Ashteet tari dim'araab kaabari!
Laakiin toona t'abariyeet iiyaaw hook andi.
Yasuu'a Umasiihi W'annaasiraay simi,
yakaat hiireeraa!>>
idi.
07 Malya Bitrus ootak w'ayi umaykwaab y'abikaayt isingad.
Gaalhoob utaki ragadaawwa tikwilbaawwa y'akirna.
08 Uutak asti fariya,
shaawti hiireeriya.
Baruuh W'ankwanaay oogaw ookiik Bitruswa Yuhannaabwa iram,
hiireeree fafaree Ukwaasana hamdee giigiya.
09 Kassuuh uudehay barooh hiireereewwa,
Ukwaasana hamdeewwa rhiyaan.
10 Baraah ootak in'aaliiga W'ankwanaay oogawi dheefa W'indaawri ittiyoodiinaay iist'a iiktiyeet toona ikanna.
Toona bariiyooh dehaay tikeet winneet hooy ajjabamiyaan.
11 Uutak in'aaliiga Bitruswa Yuhannaaywa y'abik kaleewiya.
Uudehay kassuuh aree Suleemaaniit Tifooti Mhiin ittiyoodiib oomhiin ookiik ajjabamee dehaay dhaabiyaan.
12 Bitrus toon toona rhiyanihoob oodehayii dehaay,
<<Israa'iili ar,
uun naanhooy ajjabsiini hookna?
Oon ootak hini akrireewwa shibootiiwwa hiireersaab eendeet naanhooy hasiit liiliyaatee teegwiliilna hoon?
13 Ibraahiimiib Ukwaasana,
Isehaagwa Yaaguubiib Ukwaasana,
hoobaan y'ibidneeb ukishiyaayooh Yasuu'a tageegisiya.
Baraakna barooh tooyattii dehaay nuuntaana.
Biilaatoos barooh fidgi d'uuy yhariweek han,
baraakna tiribna.
14 Baraakna Yasuu'a Utageega Oonhas tiribna.
Madoor tak bariiyooh oomhiin itfadiigeet toona tehariwna.
15 Oodehay umidhhan mitiyaayiib aree tidirna.
Ukwaasana laakiin tooyat hooy yakisiya.
Beet toona aree kassaan dehaay baadehiiba.
16 Oon ootak rhiteena,
daayiib aree tikteenna.
Yasuu'iib oosmii aamaniyaayt y'akir.
Uudehay kassuuh shibbee,
Yasuu'ii w'aamanti oon ootak akraab isin'ir.
17 Y'arawaan,
baraakwa yhad'aayaakwa naan saktiineeb kanaab bitkaayneet toona ani akteen.
18 Laakiin Ukwaasana kasseeh inabiyaayeeh Umasiih lhamiiniyeet toona suur sooya,
oont'a aree been iwaadiya faayisiya.
19 Aflaay tuubaana,
Ukwaasanaay dehaay agarna,
tumaagnaay gadna d'iina,
afoomi tiyadna.
20 W'ankwana aree Yasuu'a Umasiihi dehookna diigwati indi.
Baruuh bareeyookna dehaay suur waasamaabu.
21 Laakiin Ukwaasana naakta tankwiikweeb ookiik Yasuu'a ibakii tibreeteeb hangiit.
Suur inabiyaayeeh itageegaayi geebii waadiyaayaab iiktiyeet toonaatiit tikati.
22 Muusa <W'ankwana Ukwaasanaayuukna udehayiisookna gaal nabiib ikatiyee dehaay waasi indi,
oon aneeb waasiyaneet toonaatiit waasi indi.
Baruuh indiyeet toona kastooh daayiib sinaakirna!
23 Oon unabi baasinaakiir udehayiisooh itkit'a indi.>
idi.
24 Saamuu'eelwa kassaah inabiya aaraw har'ii eeyaanwa,
oont'a tikatiit toona suur haay hadiidiyaan.
25 Baraakna baliin inabiyaayi ar tikatiina.
Ukwaasana hoobeeyookna geeb id'iyeeb ugaladiib teefeena.
Baruuh Ibraahiimii dehaay,
<Tubuutiib eefeeb uudehay kassuuh bariitook tidirriyaayti geebii baarakami iyadna.>
idi.
26 Ukwaasana ukishiyaayooh yakisiyanihoob,
awwal bareeyook dehaay diigwatiya.
Bareekna toomaagti salalii y'angiiree dehaay barooh baarakiyaayt diigwatiya.>>
idi.