Aashuuk Itageega W'iidiib eeyaan
2
01 Ay tamuunt yinaati har'ii w'iid eeyanihoob,
Ukwaasana aamaniin kassaah gaal mhiin iifiin.
02 Gaalhoob,
hiss akra baraam t'iiti tibreetee eeyaayt,
oogaw hooy iifiineeb itib.
03 Malya n'eeti miidalab tari balool kasteeh teejha beeti hiireeriin rhiyaan.
Gaalka aree miidalaab kehii ingad.
04 Baraah kassaah Eeshuuk Itageegaayee itabna.
Wari bhali hadiidiyaan.
Aashuuk Itageega hadiidisiyaaneeb ibhaliika aree hadiidiyaan.
05 Ukwaasanaay mirkwaay iibriin gwida Yahuudi Alguduseeb iifiin.
Baraah kasseeh yhashee y'aaba.
06 Baraah oon whiss imaasiwnihoob,
uudehay immararaayna.
Gaalka ibhaliyeeh eeknaayee hadiidamee imaasiwna aree winneet ajjabisiyaan.
07 Baraah winneet ajjabsee raatiyaan,
<<Aan baraah yhadiideen kassaah Jaliilee y'aab kiikeen han?
08 Laakiin gaalka ibhaliyeen hadiidee neemsiiweek?
09 Hinee gwadi Fartiiba,
gwadi Maadiiba,
gwadi Eelaamiiba.
Wari aree Iraageewwa,
Yahuudaaywa,
Kabbadookiyaaywa,
Boontuuseewwa,
Aasiyaay whaashiiwwa,
10 Fariigiyaaywa,
Baamfiiliyaaywa,
Masreewwa,
Liibiyaab Geerwaaniit tumadiina dawil mhiiniiwwa,
Roomaani rheesamanaawwa,
11 (Yahuudwa Yahuudiib akaabwa),
Kariiteewwa,
W'arabiiwwa y'aaba.
Bareeh Ukwaasana ikwaaseet t'ajaayib hadiidee gaalka ibhaliyeesoon nimaasiw.>>
idiin.
12 Gaalka ajjabamiya aree arbishamiya.
Gwadi masi taktak raraatamiyaan,
<<Tuun naan mitiyaatni?>>
idiin.
13 Laakiin dehay weer beentooy iifiin bareeyooh ifaayayidna,
<<Aan baraah askiraaba.>>
idiin.
Bitrus oodehay bhaliisamiya
14 Malya Bitrus ikwiriyaatay itamna gwiri geeb ingadaayt,
win hissii oodehay bhaliisamiya:
<<Y'arawaan Iyahuudiiwwa kassuuh uudehay Alguduseeb eefeebwa,
bak dehookna fassari andi,
ani andiyeet toona daayiib sinaakirna!
15 Gwadi bareesookna teekwinneet toona kitti,
uun uudehay askiraab kiikeen.
Oont'a fajiru,
tuus'a aree ashshadhig toobhaat teefi.
16 Laakiin beet toona tirhitaaneet gwidahoob Unabi Yuu'eel haay hadiidaabu:
17 Ukwaasna indi:
<T'aakharaati aamb'i y'eenihoob,
aniib Eeshuuk kassooh oodehayi kehii iifif andi.
Y'araaknaawwa t'artaaknaawwa bhaliib isaridna,
Yhankwilaayaakna eerhi rhi iyadna,
Y'eegrimaayaakna hawsoot hawsooyi iyadna.
18 Baliit tiyinaateeb Ishuuki ikishiyaayeewwa tikishiyaateewwa kehii iifif andi,
baraah han bhaliib iisirid iyadna.
19 Asti tibreeteeb ajaayibt iikwasi andi,
n'ati toobuutiib alaamaat iikwasi andi,
booywa,
n'eetwa,
kwaraari b'aluukwa iiktiin iyadna.
20 Been W'ankwanaay uumb'i uuwin umatuun ibari y'aab baakaay,
tuuyin thibnami tindi,
Tuutirig booy t'iiteet adaroot iikati tindi.
21 Malya kassuuh uudehay W'ankwanaay oosim waliikeen iidhhan iyadna.>
indi.
22 Yaa Y'israa'iili,
Yasuu'a W'annaasiraayiib hadiidi andiyeet toona sinaakirna.
Ukwaasana barooh m'uujisaatwa,
ajaayibwa,
alaamaateewwa ayyadiyaayt dehookna ifdig.
Beet toona aree kassaakna tikteenna.
23 Laakiin Ukwaasana tona iikti tiid ikan,
baruuh suur niyaamaab iiktiyeeb uumkir iki.
Bareekna amag da gaanuun baabariin ishamniit hookna,
barooh usaliibi kehii mismaraayee tith'aniit tidirna.
24 Laakiin Ukwaasana barooh tooyatii yakisiyaayt ishidhhan.
Tuyatiit lhanaytee isfadig.
Tuuyat bariiyooh w'abuuk ka'adgirta.
25 Daawid bariiyooh bak diyaabu:
<Ani kassoohoob Ukwaasana geebu rhani.
Baruuh umaygwadu eefi akay katati kaadi.
26 Aflaay uugin'u afirhaabu,
umiidalaabu barooh yhammiid,
ugarooyu s'ayaay ikwaar andi.
27 Baruuk y'ayaani bitik iiy'ishheeb kitdiya.
Utageegaayook oongaal umiimashiib suusiisi kitdiya.
28 Baruuk umidhhani salal rhistaheeb,
suurook firhaat iitibheeb tindiya.>
idi Daawid.
29 Yaa isanaayaan,
hoobuun Daawid iiyaayt itoobaas,
umiimashuuh aree amsi ookiik tooy eefi andi hookna.
30 Laakiin baruuh nabiibu aree Ukwaasana bariitooh tidirriyaaytii gaal bariiyooh oomhiin had'aab ikwasiyeet toona iktiin.
Beet toona Ukwaasana dehaay halafooyaayt barooh waadiyaaya.
31 Daawid tuun akaa tiideet toona iktiin.
Umasiihiib ooyak aree hooy hadiidiya.
Ukwaasana barooh umiimashiib isha biidiyeet toona tari ugarooyooh suusiisi biidiyeet toona hadiidiya.
32 Ukwaasana Yasuu'a tuyattii ishidhhaneet toona kassaan baadehiiba.
33 Ukwaasana barooh tuyatii yaksiyaayt umaygwadooh win tageega mhiin isoos'a.
Ubaaba d'iyaab iiktiyeeb iwaadiyaayt Eeshuuk Itageega ittiyeewaayiit aree hini kehii ifif id'i.
Oont'a beet toona baraakna rhiteena aree teemsiiwna.
34 Daawid teebri reewaab kiiki.
Baruuh masi een ibhali diyaabu:
<W'ankwana aniib W'ankwanaay dehaay:
W'ayu umaygwadiinaay s'aa!
35 Y'ashooyeek iragadaayeek whii eetameen akwasiyeeb ookiik s'aa.>
idi.
36 Aflaay Y'israa'iili kassaakna bak kanna:
Ukwaasana oon Yasuu'a baraakna usaliibi kehii tidirneeb Ankwanaabwa Masiihwa ikwaas.>>
idi Bitrus.
37 Uudehay een bhali imaasiwnihoob,
baraah akraab gadabiyaan.
Bitruswa ilinguumiya eerawwa raatiyaan,
<<Isanaayaan!
Oont'a naan nid'eet toonaati?>>
idiin.
38 Bitrus igwibi <<Baraakna Ukwaasanaay dehaay agarna,
Yasuu'a Umasiihiib oosmii atoomaasna!
Malya tumaagnaaytuukna afoomtini.
Shaawti Eeshuuk Itageegaayi miyaaw imaar tiyadna.
39 Uun uwaadiya bareekwa y'areekwa,
kasseeh baliib isagiib Ukwaasana waliiki indiyeebwa,
bareeyookna dehaay daayaabu.>>
idi.
40 Bitrus masi bareeh gwida bhali warib han sooya.
Malya baruuh <<Oon ootaas toomaag shagaameen ugarooyookna hooy shidhhanna.>>
idi.
41 Been oomb'i mhay alfa iiktiin dehay hooy imashawawaayna,
tudiigwattooh gabbalamiyaaniit aree itoomaasna.
Y'aamanana immarraayna
42 Aan baraah malya ilinguumiya agriisiineet toona hadiriini jillaay igarooyoohna waasiyaan.
Bareeh araweesamiyaan,
hadhiib ikit'ana,
hiddaab sileeliyaan.
43 Kassuuh uudehay t'ajaayibwa t'alaama teegwidaat ilinguumiya id'iineet rhiyaan winneet ajjabamiyaan.
44 Kassaah y'aamaniyaan hiddaab iifiin,
toona t'iibriineet kastooh im'adhdhaadhna.
45 Teena t'iibriineetwa oomraayoohwa iidlabna,
imhallaga oodehay ishanha iyiwna.
46 Kassoohoob oodiini gawi hooshiib hiddaab daayiin.
Igawaayeeb yhadhi iikt'ana,
afirhaa hiddaab tamiin,
igin'a rayhamaa iifiin.
47 Ukwaasana yhamidna,
uudehay kassuuh geeb ishboobna.
Ukwaasana aree baliib shidhhana iideeb oodehay bareeyooh ishaawiit gaguudisiya.