Alguduseeb umajlis
15
01 Gali da Yahuudaay Antaakiyaab eeyaaniit eeraw allamiyaan,
<<Muusa allamaab iiktiyeet tehay'aatii itkwishibna bitdiineek,
midhhan imaar kitdiina.>>
idiin.
02 Een ibhaliiyi sabbii,
Buuluswa Barnaabaaswa bareeyooh geeb akraa amgwasuura ikwaasna.
Aflaay Buuluswa,
Barnaabaaswa,
wari aamananaawwa yakiit ilinguumiyaawwa,
tukaniisaati eegrimaayi geebwa hadiidiini jillaay,
Algudus istoobna.
03 Aanda tukaniisi diigwattaneeb Fiiniigiyaaywa Saamiraaywa hasamiinihoob,
Ijintiili Ukwaasanaay dehaay kak y'agarneeb oodehay sooyiin.
Uun usakana aree Ukwaasanaay y'aamanana kasseeh winneet afirhisiya.
04 Aanda Algudus iktimnihoob,
tukaniisaati dehaywa,
ilinguumamiyaawwa y'eegrimaawwa bareeh daayiib y'ashishna.
Baraah Ukwaasana dehaay id'iyeet toona kastooh bareeyooh dehaay hadiidiyaan.
05 Laakiin shalik Fariisi W'ankwana aamanaab iifiin.
Baraah yakiyaaniit,
<<Ijintiili W'ankwana aamaniyaan ibakii itkwashiibneet toonaatu,
Muusaay ooktaab aree haay shagaameeneet toonaatu.>>
idiin.
06 Ilinguumiyaawwa tukaniiseeti eegrimaawwa toon toonaatiib hadiidiini jillaay immarraayna.
07 Gwida had bhaliiyaani har'ii,
Bitrus bareeyooh dehaay,
<<Isanaayaan,
sh'iika Ukwaasana gwadib hookna waasiya.
Ijintiili usakana udaayiib aniib uyafii maaswiit han aamaneen.
08 Ukwaasana oodehayi gin'aayeeb teefeet toona ikteen,
Ijintiili oon hineet bareeh han Eeshuuk Itageega yhiit gabbalamiya.
09 Ukwaasana hininwa bareehwa farig ibitkeen d'iyaab kiiki,
igin'aayeehna aree w'iimaanii isinhas.
10 Oont'a een ikwiriyaatayi kehii hasaal d'iit naanhooy Ukwaasana jarrabteena?
Been whasaali yakisti hinin ka'adgirna hoobaan han ka'adgiriyaan.
11 Laakiin W'ankwanaayoon Yasuu'iit tin'imaatee nidhhaneet toona aamannay.
Ijintiili han bak idhhanna.>>
idi.
12 Barnaabaaswa Buuluswa tim'uujisaateet alaamaawwa t'ajaayibwa Ijintiili bitik Ukwaasana bareeyooh geebii ikwaaseet hadiidee imaasiwnihoob,
kassuuh umajlis diniyaan.
13 Baraah ibhali faayisiyaanihoob,
Yaaguub hadiidiya,
<<Isanaayaan,
sinaakirnaheeb!
14 Ukwaasana Ijintiilee dehaay awwal eeyaayt,
kak galib bareesooh dehayooh ikwaaseet toona Sim'oon sooya hookna.
15 Inabiyaayi bhali aree ooktaabiib kataabt toonaatiit ikatiin.
Uuktaab:
16 <Ani W'ankwana oonaay har'ii at'agiirka Daawidiib oogaw udhibaab iid'ir andi.
Oodhib hooy yaksiit,
shaawti masi iitkwikw andi.
17 Malya uudehay uuraaw han W'ankwana yhariwna,
aree kassaah Ijintiili aniib oosim yakseen,
indi W'ankwana baliit teena ikwasiib.
18 W'ankwana baliit teena sh'iika kwaasaabu.>
indi.
19 Aflaay aniib ir'ayeeb,
Ijintiili Ukwaasanaay deha it'agiirni kehii akra rabi bandaasayeet toonaatu.
20 Laakiin bareeh jawaab dehaay kitbiit waseenayeet toonaatu,
isanama day'aab ikatiineet tim'ari biitamayneet toona ibakii sooni,
oojkuunii it'afiineet toonaatu,
sikuutii atoodiraab ureewiit tooshaawwa oobooywa biitamayneet toonaatu.
21 Muusa sh'iika kasteeh timadiinaateeb bhaliiya.
Utooraat toosabka Iyahuudi diini gawaayeeb agriimamiya.>>
idi.
Ijintiil aamananaayee dehaay jawaab diigwatamiya
22 Malya ilinguumiyaawwa,
y'eegrimaawwa,
kassaah tukaniiseeti dehaywa daab gwadib waasiyaaniit,
Buuluswa Barnaabaasi geeb Antaakiyaab ookiik giigisiyaan.
Baraah W'ankwanaay y'aamananaayi bitik winneet hamooysama da maloob waasiyaan.
Yuudaas (Baarsaabbaas) atoosmaabwa,
Siilaaswa waasiyaan.
23 Malya baraah oon jawaab iktibna:
<<Hinin ilinguumiyaawwa y'eegrimaawwa,
isanaayaakna,
kasseekna Ijintiili W'ankwana aamaneen Antaakiyaay eefeenwa,
Suuriyaay eefeenwa,
Kiiliikiyaay eefeenwa tishiboonay salaamnay hookna.
24 Daab gali hinee giigiyaaniit amag bhaliiyee isehasneetookna toona nimaasiw.
Bareeh laakiin hinin giigsaab kinki.
25 Aflaay hinin nimmarraayiit kassaan daab gal waasna.
Een bareeh Y'araween ifagara Buuluswa Barnaabaasi geeb dehookna diigwattiib nimkir.
26 Aan aanda W'ankwanaayoon Yasuu'a Umasiihiib oosmi jillaay ishuukeehna bidh'iib d'iyaaba.
27 Aflaay hinin han Yuudaaswa Siilaaswa nifdig neefi.
Baraah hinin niktibeet toona aakna iyafaayeesooh sooyeen hookna.
28 Hininwa Aashuuk Itageegaawwa tuwaajibtiyookna kehii masi weer rabi kehookna bandaasayeet toona daayiit hiisnay.
29 Laakiin baraakna isanama attiyeewiyaat tim'ari ibakii baatamaana.
Toosha uubooy kehii eefiyeet baatamaana,
tari ooreew sikuutii atoodiraanaayt toosha baatamaana,
baajikinna.
Teen bateeh timooriibneek,
daayiib ishbuub tiyadna.
Uuraaw umidhhanookna!>>
idiin.
30 Aanda Algudusee giigiyaaniit Antaakiyaab ibeen.
Malya tukaniiseeti da majlisii dehaay waliikiyaaniit ujawaab yhiin.
31 Ujawaab agriimamiyaanihoob,
uudehay kassuuh afirhiyaan akrakaab ikeen.
32 Yuudaaswa Siilaaswa aakna nabiyaaba.
Gwida doora W'ankwana aamaniin oodehay gwidaana sooyiina aree is'ikirna.
33 Yuudaaswa Siilaaswa shalikt midda Antaakiyaay is'ana.
Malya eenda ibareeh diigwataab beeti it'igirnihoob,
y'aamanana um'asgii ideharniit giigisiyaan.
34 Laakiin Siilaas beentooy mhaayiib yhariw.
35 Buuluswa Barnaabaaswa aree Antaakiyaay imhiin.
Beentooy aree baraahwa gwidaab waribwa W'ankwanaay ibhali allamiyaan aree sooyaan.
Buuluswa Barnaabaaswa imshammaadhna
36 Shalik doori har'ii,
Buulus Barnaabaasii dehaay,
<<Agartiit kasteeh timadiinaateeb W'ankwanaay ibhali sooniyeeb y'aamanana niibi.
Shaawti baraah kak eefeeneeb nidaal.>>
idi.
37 Barnaabaas,
Yuhanna <<Maarkoos>> atoosmaab bareeyooh geeb giigiyeet toona yhariw.
38 Laakiin Maarkoos suur bareeh Baamfiiliyaay y'ish hooy giigaa iifi,
ushaga bareeyooh geeb soorarmaab kiiki akay,
Buulus barooh iitrameet harwaab kiiki.
39 Buuluswa Barnaabaaswa winneet imgwassaarna.
Malya laakiin imshammaadhna.
Barnaabaas,
Maarkoos iyhaayt falluukaatii Kubiroos beeti giigiya.
40 Buulus laakiin Siilaas waasiyaayt giigiya.
Y'aamanana bareeh W'ankwanaayt tin'ima isehasibniit giigisiyaan.
41 Baruuh Suuriyaawwa Kiiliikiyaaywa yhash beeti iibaabiya,
aree tikanaayis is'aakakir.