47
01 Yuusif giigiyaayt Far'uun sooya,
<<Baabuuwwa isanaayaawwa reewiisoohna,
kassooh iibriineeb oomraayiisoohna Kan'aani haashii eeyaan.
Oont'a tooy Goosheeneeb eefeen.>>
idi.
02 Yuusif ay isanaayeesooh ayib waasiyaayt Far'uuni suurii isingad.
03 Far'uun bariiyeeh isana raatiya,
<<Ishanhuukna naanaatu?>>
idi.
Baraah <<Reew shaakwanaaba,
hoobaan han reewkinaaba.
04 Laakiin whaashiyoon uusiyaam balamiya,
uureew tamiyeena kitehaay.
Oont'a hinin ikishiyaayaak tooy eena.
Anaahook Goosheeni haashiib kooksa hoon.>>
idiin.
05 Far'uun Yoosfii dehaay,
<<Baabuukwa isanaayaakwa eeyaan hook.
06 Masreeb whaash suurook eefi.
Baabookwa isanaayeekwa whaashiib hooy daayikaanaay kooksa.
Goosheeneeb sikwara.
Naatiit kanaant ibariib hooy tikteeniyeek aree aniib ooreew ookna s'abika.>>
idi.
07 Malya Yuusif ubaaba Yaaguub haay eeyaayt Far'uuni suurii isingad.
Yaaguub Far'uun idehar.
08 Far'uun Yaaguub raatiya,
<<Barook w'imruuk naakaabu?>>
idi.
09 Yaaguub bariiyooh dehaay,
<<Ani sheebwa mhay tamuun hawlaab eebhat abari,
haash gaalnaay ooraaw hadiit babeeri.
Hoobaan han haash gaalnaay weer hadiit babeeriin.
Laakiin baraah gwida hawla ikwiirna.
Whaaluuhna han hineeb whaaliit amaag kiiki.>>
idi.
10 Malya Yaaguub whad'a masi ideharaayt hooy giigiya.
11 Aflaay Yuusif whad'a sooyaneet toonaatiit,
ubaabaawwa isanaayeehwa Masreeb whaash udaayikaab Ra'amsiisiib whaash yhii.
12 Yuusif ubaabaawwa,
isanaayeehwa,
kasseeh indhiwaayeehwa galka y'adadeesooh m'ariit dehaay ibaasir.
13 Kassooh oomhiin Masreebwa Kan'aaniibwa winneet amaag hargwi hooy dhibaa tiifi.
14 Yuusif wharrooy dalabii imreen imhallaga Masreebwa Kan'aani haashiibwa iifiin kasseeh idbil.
Malyaab Far'uuniit tikhasnaatiib daasiya.
15 Laakiin Masreebwa Kan'aaneeb uudehaywa imhallaga hooy inhadnihoob,
Imasri kassaah Yoosfii dehaay eeyaaniit,
<<M'ariit hiiyya hoon!
M'ariit iyaaw hoon bitdiyeek willa niiyyi niyad.
Imhallaga kassaah hoon ingadna.>>
idiin.
16 Yuusif <<Aflaay baraakna mhallagaab bitbariineek,
ureewookna hiinaheeb,
malya harroob iyaaw hookna andi.>>
idi.
17 Malya baraah ureewoohna haay eeyaan.
Yhatayeehwa,
t'anooteehwa,
tiyaateehwa,
eesh'eeh,
imakeeh kasseeh haay eeyaaniit harrooy biduuliib Yoosif yhiina.
Yuusif gaal hawliib ooreew Masreeb iifiib kassooh islawiw iyhi.
18 Malya been whawil hasamiyanihoob,
uudehay dehaay eeyaaniit,
<<Hinin oosdik hook niikwibis kindi.
Imhallagaayaan inhadna,
reew aree shaawti kinbari,
igarooyoonwa whaashoonwa nuun naat han weena kinbari.
19 Hinin hargwiit baasoodira hoon,
whaash han baaday'isa.
Harroob tamnayeebwa,
teeraab teeraanayeebwa iyaaw hoon tindiyeek,
igarooyoonwa whaashoonwa whad'aay dehaay niidlib niyad.
Bariiyeeh kishiya niikti niyad.>>
idiin.
20 Aflaay tehargwi winneet amaagkaat tiki.
Imasri kassaah tidir'aateeh idaalibna,
akra hargwi hooy daaya.
Yuusif aree kassooh whaash Imasreeb Far'uunii dehaay idlib iyhi.
21 Yuusif oodehay Masreeb yhiduud fardaab gaalnaay ooraaw ookiik iifiin kasseeh timadiina beeti hantaaysiya.
Masreeb uudehay kassuuh aree Far'uuni kishiya ikeen.
22 Far'uun ifagiiriya haash ahaab kiiki.
Baraah Far'uunii m'ariit imiirna akay whaashoohna dilbaab kiikeen.
23 Malya Yuusif udehayii dehaay,
<<Baraakwa whaashuuknaawwa whad'aay tikatiina.
Oont'a ani teeraab aniiw hookna.
Aflaay whaashookna teeraayaan.
24 Laakiin ukwaaki door wharrooyt t'ayyaat takwi ibakii whad'a tiyawna.
Wharru ooraaw laakiin indhiwaayeekna haay sim'arna tari teeraab kwaasna.>>
idi.
25 Baraah <<Duuruun!
Baruuk tishidhhana hoon.
Far'uuni kishiya nikatiyeet toona gabbalamna.>>
idiin.
26 Malya Yuusif kassooh whaashiib amsi ookiik gaanuun id'i.
Uudehay ayyaat takweet wharrooy kassoohoob whad'aay dehaay ifar'aneet toona sooya.
Ifagiiriyaayi haash uubhaat Far'uuniib akaab kiiki.
27 Y'israa'iili Goosheeni haashiib,
Masreeb igawaayeehna idaa'irna.
Beentooy winneet hooy gabiyaan,
hooy guudiyaan.
28 Yaaguub beentooy tamna asarama hawlaab ikwiri.
Sheebwa fadhig tamuunwa asarama hawla aree id'iit iya.
29 Yaaguub shaawti gwidaat kwiriya biidiyeet toona ikanihoob,
Yoosif waliikiyaayt,
<<Sidik shiboot iiwariheeb tindiyeek,
w'ayook aniib uragadi kehii daasaat malya halafooya.
Masreeb iibiseheeb bitdiyeet toona halafooya.
30 Ani ayaayihoob,
Masree giigsaaheeb,
aniib yhooba hooy atoobsaab ikatiineeb oomhiin bisaaheeb.>>
idi.