Yaaguub Masir beeti iibaabiya
46
01 Aflaay Israa'iil iibriyeena kastooh ishaawawiit Masir hadiit giigiya.
Beersheebaab tumadiina iktimihoob,
ubaaba Isehaagiib Ukwaasanaay dehaay karaamaati yharid.
02 Been whawaadiib Ukwaasana barooh hawsooteeb infaraad,
<<Yaaguub!
Yaaguub!>>
idi.
Yaaguub han <<Ani tooy eefi>> idi.
03 Ukwaasana <<Ani Ukwaasana,
baabiyook Ukwaasana.
Masir imabay baarikwiya.
Ani beentooy akra dehay iikwasi hook andi.
04 Ani Masir geebook iidif andi.
Malyaab barook tooy is'igir hook andi.
Baruuk tiyaayyihoob Yoosif w'ooruuk iishmam hook indi.>>
idi.
05 Malya Yaaguub Beersheebaab hooy giigiya.
Yaaguubiib y'ar aree y'areesoohwa tim'ateesoohwa baliin itambil Far'uun dehaay diigwatiyaneeb kehii y'amna.
06 Aflaay Yaaguubwa kassuuh ufraayuuhwa Masir ibeena.
Ureewoohwa kassooh Kan'aani haashiib iibriineeb oomraaywa haay giigiyaan.
07 Baruuh y'areehwa,
y'areeyeeh arwa,
t'arteehwa,
t'arteet aritwa kassooh ufraayooh Masir haay ibi.
08 Aan baraah Y'israa'iili ara sima (Yaaguubwa y'areehwa):
Raa'oobiin Yaaguubi w'oor usuurkina.
09 Raa'oobiiniib y'ar:
Haanookwa,
Faaluubwa,
Hasruunwa Kaarmiibwa iidna.
10 Shim'ooniib y'ar:
Yaamuu'eelwa,
Yaamiinwa,
Oohaadwa,
Yaakiinwa,
Suuharwa,
Shaa'uulwa iidna.
Suuharwa Shaa'uulwa Kan'aaniitiib faraya.
11 Laawiib y'ar:
Geershoonwa,
Gahaatwa,
Maraariiwwa iidna.
12 Yahuudaay y'ar:
Eerwa,
Oonaanwa,
Shaalaabwa,
Faaraswa,
Saarahaawwa iidna.
Eerwa Oonaanwa laakiin Kan'aani haashiib ayaaba.
Faarasiib y'ar aree Hasruunwa Haamuulwa iidna.
13 Yassaakiriib y'ar:
Tool'aabwa,
Fawwatwa,
Yoobwa,
Shimroonwa iidna.
14 Sabaluuniib y'ar:
Saaradwa,
Eeloonwa,
Yahal'eelwa iidna.
15 Aan baraah Yaaguubwa Leeyahaawwa Baadaan Araameeb ifriineeb y'ara.
Bareetooh tookwa aree Diinaab iidna.
Aan kassaah Yaaguubiib y'ar Leeyahaay ifriyeeb mhay tamuunwa mhayib ikatiin.
16 Jaadiib y'ar:
Sifiyoonwa,
Hajjiibwa,
Shuuniiwwa,
Asboonwa,
Eeriiwwa,
Aroodiiwwa,
Ar'eeliiwwa iidna.
17 Ashiiriib y'ar:
Yimnaabwa,
Yashiwaabwa,
Yashwiibwa,
Barii'aabwa iidna.
Tukwaatoohna Saarahaab iidna.
Barii'aay y'ar:
Haabarwa Malkii'eelwa iidna.
18 Aan baraah Silfaabwa Yaaguubwa ifriineeb y'ara.
Silfa Laabaan t'ootooh Leeyahaab hiyaab iiktiyeet tukishiyaatu.
Y'ar kassaah tamna asagwira.
19 Yaaguubiit tutakat Raaheeliib y'ar:
Yoosifwa Binyaamiinwa iidna.
20 Yuusfiib y'ar Masreeb ifreen:
Manassaawwa Afraayimwa.
Bareetooh toondi aree Asnaat Bootiifaariit oot iidna.
Bootiifaar Hiilyooboolisi fagiiri iikti.
21 Binyaamiiniib y'ar:
Baal'aabwa,
Baakarwa,
Ashbeelwa,
Geeraabwa,
N'uumaanwa,
Eehiibwa,
Rooshwa,
Muufiimwa,
Huufiimwa,
Ardaawwa iidna.
22 Yaaguub Raaheeliib ifriyeeb y'ar kassaah tamna fadhiga.
23 Daaniib w'oor:
Huushiim iidna.
24 Naftaaliib y'ar:
Yahasii'eelwa,
Guuniibwa,
Yasarwa,
Shilleemwa iidna.
25 Een y'ar y'asarama Yaaguub Bilhaay ifriyeeba.
Bilha Laabaan t'ootooh Raaheel hiyaab iiktiyeet tukishiyaatu.
26 Kassaah Yaaguubi geeb Masir ibeen,
y'areeteeh m'at anu asagwir tamuunwa asagwir nafara iiktiin.
27 Yuusfiib y'ar Masreeb ifreen malooba.
Yaaguubiib indhiwa Masir eeyaan kassaah asarama tamuun iiktiin.
28 Yaaguub w'oorooh Yahuudaab suurooh Yoosfii dehaay iifdig.
Yuusif Goosheeneet toojhaati mitiya haay isehiriw.
29 Yuusif itambileeh y'amaayt ubaaba Israa'iil Goosheeneeb im'ashaash.
Baraah beentooy imarraaynihoob,
Yuusif ubaabaayt alaatiib yhalab,
gwidaat midda waawiya.
30 Yaaguub Yoosfii dehaay,
<<Ani oont'a barook dhhanii rhan akay,
shaawti tooyat dehaay amaari.>>
idi.
31 Yuusif isanaayeehwa kasseeh geeb eeyaanwa <<Ani oont'a Far'uun ibakii baraak Kan'aanee y'aab tikatiineet toona sooyani.
32 Ani masi barooh baraakna reew kinaab tikatiineet toonaawwa,
ureewookna kassooh haay y'aab tikatiineet toonaawwa,
kassooh oomraayookna haay y'aab tikatiineet toonaawwa han sooyani.
33 Far'uun waliiki hookna indi,
tishagaamteeni raati hookna indi.
34 Baruuh raatiiniyuukna,
<Hinin reewkinaaba,
w'adhmuumiisoon oont'a ookiik itawaayuun anoota.>
diina.
Een tiyadneek,
Goosheeni haashiib kooksi hookna indi.
Ureewkina Masreeb takweet kiibari.>>
idi.