Yuusif isanaayeeh itookkaan
45
01 Yuusif masi ugarooyuuh dehaay kaleewamti irib.
Udehayi suurii aree waawiya.
Ikishiya kasseeh isfar'a,
isanaayi geeb hadooh imhi.
Malya isanaayee dehaay,
<<Ani Yoosifu.>>
idi.
Beenhoob gaal han weer geeb kiihaay.
02 Malya baruuh akraab waawiya.
Tuwaawtooh Imasri imaasiwna,
whad'aay gawiib aree haay hadiidiyaan.
03 Yuusif isanaayee dehaay,
<<Ani Yuusifu!
Baabu masi dhhaniibu?>>
idi.
Isana laakiin winneet irkwiin akay naat han dehaay gwibiyaab kiikeen.
04 Malya Yuusif bareeyooh dehaay,
<<M'aanaheeb.>>
idi.
Baraah eeyaanihoob,
Yuusif <<Ani usanookna Yoosif ibaraakna Masreeb tidlibneebu!
05 Laakiin toona tisaktaaneet hooy baahasiikna tari igarooyookna dehaay baa'amooyaayna.
Ukwaasana uukna shuuk ishidhhiini jillaay tooy haay eeyaheeb.
06 Suur akay malu hawla hargwiitiib hasamiyaana.
Masi ay hawla gaal dir'aat aad kiidi,
tari harroob iiwik kiidi.
07 Laakiin Ukwaasana bareekna daayiib ishiidhhiini jillaaywa tubuuti kehii baagiib hookna in'iishi jillaaywa aneeb suurookna diigwatiyaheeb.
08 Aflaay aneeb tooy istoobi bareekna kittena laakiin Ukwaasana.
Baruuh Far'uuni makkaar ikwaaseheeb,
bariiyeeh dhiwaayi ankwana ikwaaseheeb.
Kastooh Masri kehii haakim ikwaaseheeb.
09 Oont'a dhaabaana baabu beena,
sooyaana,
<W'ooruuk Yuusif bak indi:
Ukwaasana kastooh Masri kehii haakim ikwaaseheeb.
Willa tooy m'aa!
Baadileela.
10 Baruuk Goosheeni haashiib y'areesookwa y'areeyeek ari geebwa ikwaar tindiya,
iidwilheeb tindiya.
T'anooteekwa,
tiyaateekwa,
eesh'eekwa,
kastooh toona tutibariyeet tooy haay ikwaar tindiya.
11 Masi ay hawla hargwiit daayi tindi,
ani beentooy amshabiib hookna.
Bak bisakayneek laakiin baruukwa,
indhiwaakwa,
ureewuukwa hargwiit idaar hookna tindi.>
diina.
12 Baraakna iknaayaakna rhiteena.
Ani bareekna bhaliisamaniib sidik Yoosif akatiyeet toona Binyaamiin usanu han rhiinni.
13 Baabu ani tooy Masreeb kak akraab akatiyeet toona sooyaana,
masi toona baraak rhitaaneet kastooh sooyaana.
Ashshigaana baabu tooy haay m'aana!>>
idi.
14 Yuusifwa Binyaamiinwa taktakeeb yhalabniit waawiyaan.
15 Yuusif isanaayeeh kasseeh gaal gaalnaay hooy f'iyanihoob masi waawiya.
Shaawti malya baraah Yoosif bhaliisamiyaan.
16 Yoosfiib isana eeyaaneet toona,
usakana Far'uuniib oogaw iktim.
Far'uunwa idaabtaayaahwa winneet afirhiyaan.
17 Far'uun Yoosfii dehaay,
<<Isanaayeek sooya:
Imakeehna ribiitiit Kan'aani haash ba'itkirifna.
18 Baabooknaawwa kasseeh indhiwaayeehwa tooy haay m'aanaheeb.
Masreeb whaashii hooy daayikaab iyaaw andi,
oon whaashiib teefeet tudaayiinaay kastooh tameeneet toona adgireen.
19 Masi isanaayeek sooya:
Tim'ateehwa y'areehwa kehii is'amiini tambil Masree ba'iyaayna.
Baabookna aree ibakii tooy haay m'aana.
20 Baraah oomraayoohna ishti d'iit bay'iin,
Masreet tudaayiinaay kastooh imaar iyadna.>>
idi.
21 Yaaguubiib y'ar Far'uun iideet toona kastooh hooy afirhiyaan.
Yuusif bareeh tambil yhii.
Far'uun sooyaneet toonaatiit aree t'iibaabtii dehaay balamiit dehaay isoomir.
22 Yuusif isanaayeeh gaalka gayi halaaka istookw.
Binyaamiin laakiin ay hooyi halaakaawwa mhay shi ashteeti mhallagaabwa yhii.
23 Ubaabaay dehaay aree tamin mak Masreet daayiinayt rabay dehaay diigwatiya.
Tamin mak warib aree harroobwa,
hadhiibwa,
weet m'ariiwwa rabay balamiit dehaay diigwatiya.
24 Malya isanaayeeh ifdig id'i,
bareeyooh dehaay,
<<Usalaliib baa'amhassaayna.>>
idi.
25 Aflaay Yuusfiib isana Masir y'ishni giigiyaan.
Ubaaba Yaaguub Kan'aani haashiib iifiib iktimna.
26 Baraah ubaabaay dehaay,
<<Yuusif masi dhhaniibi!
Baruuh Masri haakimu.>>
idiin.
Laakiin ubaaba winneet isgarib aree aamanaab kiiki.
27 Malya Yuusif idiyeeb ibhali kasseeh dehaay hadiidiyaan.
Itambil barooh yaksiini jillaay diigwatamaab rhiyanihoob,
winneet anfirhiya.
28 Malya Yaaguub <<Oont'a aamanan hookna!
W'ooru Yuusif sidik dhhaniibi,
ani ayaab baakaay aree barooh rhi andi.>>
idi.