Ashteeti kaas ukisiib iifiib
44
01 Oont'a Yuusif ugawi kishiyaayooh sooya,
<<Een eenda kiisa m'ariit tibaa!
Imhallagaayeehna aree ikiisaayeeb dehaay daasa!
02 Malya aniib w'ashteeti kaas oosan w'adhamiinaay kiisiib daasa!
Wharrooy imhallagaayeeh han ukiisiib dehaay daasa!>>
idi.
Baruuh han Yuusif sooyaneet toona itkwikw.
03 Tooyin tumalya karuumaab,
aanda shaawti imakeeh isoo'amniit iibaabisiyaan.
04 Laakiin Yuusif ukishiyaayooh sooyihoob,
baraah timadiinaatii sigiyaab kiikeen.
Yuusif ukishiyaayooh dehaay,
<<Eenda naakiba!
Kantiimihoob,
<Tudaayiinaay iwariyookna naanhooy toomaag jasaateen?
05 Oon ookaas yam eebhat haay kaagw'iya,
laakiin naan iikti tindiyeeb han haay ikteen.
Baraakna winneet amaagna tid'iina.>
diyaabu.>>
idi.
06 Ukishiya bareeh iktimihoob,
Yuusif sooyaab iiktiyeeb ibhali sooya.
07 Baraah <<Baruuk naanaatiib een bhaliitiniya?
Hinin bak aslan kinweer!
08 Hinin imhallaga ikiisaayeeb nimriyeeb Kan'aani haashii dehookna agraab kinki han?
Ashteet tari dim'araab w'ankwanaaysook naanhooy neegwhari?
09 Oon ookaas hineeb gaalnaay geeb marriyeek dira!
Hinin eeraw aree kishiyaab kwaasa hoon.>>
idiin.
10 Uutak <<Daayiitu!
Baraak tiyadneet toona iiwari andi.
Laakiin ookaas gwiharaab ootak barooh kishiyaab iikwasi andi.
Baraakna aaraw giigteenee dehaay adgirteena.>>
idi.
11 Isana gaalka ukiisooh whaashiib daasiyaaniit ifdigna.
12 Ukishiya Yoosfiib oosan oowinnaay ookiisii,
oodisnaay ookiis ookiik yhariw.
Malyaab Binyaamiiniib ookiisi door eeyanihoob,
ookaas hooy imri.
13 Tuun tuuna isana akraab gadabista,
hasiyaaytii yhalaakayeeh batakiyaan.
Baraah shaawti imakeehna irbiiniit toomadiina ookiik y'agarna.
14 Yahuudaawwa isanaayaahwa beentooy eeyaanihoob,
Yuusif masi ugawiyooh iifi.
Baraah Yoosfi suurii whaashi kehii kuuramiyaan.
15 Yuusif bareeyooh dehaay,
<<Baraakna kak saktaana?
Aneeb t'iiteeb uutak toona tukwabaas marriyeet toona kitkanna han?>>
idi.
16 Yahuuda Yoosfii dehaay,
<<Duuruun!
Naan niyad?
Nhas nikatiyeet toona kak soonay hook?
Gwabab nibariyeet toona Ukwaasana rhisiya hoon.
Aflaay uun uukaas geeb itmariyeebwa hinin iknaayaanwa bariiyeek kishiya niikti niyad.>>
idi.
17 Yuusif bareeyooh dehaay,
<<Ani kasseekna amaag kaaweer.
Laakiin uukaas geeb y'abakeeb ootak kishiyaab iikwasi andi.
Baraakna aaraw asgaa difna,
baabookna beena!>>
idi.
18 Yahuuda Yoosif ibaayt,
<<Duuruun!
Baruuk had'aay akrir tibariya,
ani aree kishiyaayook akati.
Hadiidsaaheeb hoosu baahasaaya.
19 Baruuk baabuun masi dhhaniib iiktiyeeb biikaayeeb haay raatamta hoon.
San niibriyeeb binbariyeeb haay raatamta hoon.
20 Hinin aree <Baabuun eegrim taku,
umatuuniib aree oor ifri.
W'oor uusan ayaabu,
toondeeti geebii gaal oori.
Ubaaba aree barooh areeyiini.>
nidi.
21 Baruuk <Barooh rhi andi,
tooy haay m'aana.>
tidiya hoon.
22 Binyaamiin hooy giigiiniyeek,
baabuun iyaayyeet toona soona hook.
23 Laakiin baruuk <Usanuukna uudiska geebookna tooy biiy'ayeek,
shaawti aniib eefiir rhi kitdiina.>
tidiya hoon.
24 Malya baaboon ukishiyaayuuk dehaay n'agaraayt,
bariiyeek ibhali soona.
25 Malyaab baabuun <Agarnaat masi shalik harru dilibna ahaana.>
idi hoon.
26 Laakiin hinin bariiyooh dehaay,
<Usanuun uudis geeboon biiyakayeek Masir niibi kindi.
Usanoon oodis haay biny'ayeek utaki fiir shaawti rhi kindi.>
nidi.
27 Baabuun ukishiyaayuuk aree,
<Tutakatu malu ar firaat tikatiyeet toona tikteenna.
28 Gaal bareesooh suur kwidhiya,
sh'ii dooriika lawaab kiiki.>
idi hoon.
Baabuun w'oor dhhaniyaat tamaat hiisiini.
29 Masi baruuh <Ani eegrim taku,
baraak Binyaamiin haay giigiit naat dehaay tikatiyeek,
ani uugn'u kit'iit iiyyi andi.>
idi hoon.
30 Aflaay ani w'oor anu baabiyu dehaay at'agiireet toona ka'adgiran.
Baabiyuun umidhhan w'oori midhhaniib hakwaaru.
31 Binyaamiin geebu biiy'ayeek baabuun iiyyi indi.
Ikishiyaayaak aree ubaaba ukishiyaayook w'eer hamu gadabsiit umiimash shuumsiin iyadna.
32 Masi ani baabu w'oor asgaa haay at'agiireet toona waadiyaayan.
Shaawti w'oor haay baa'agaareek,
baabu kassooh umidhhanu imooyiheeb.
33 Duuruun!
Ani kishiyaayooku.
Binyaamiin fidgaat aneeb oomhiin ahaaheeba!
Barooh isanaayi geeb s'agira.
34 Binyaamiin anu kak baabu am'ashiish?
Ani baabu bak gadaba rhaniyeet ka'areeyan.>>
idi Yahuuda.