Masir beeti t'iibaab tumalya
43
01 Kan'aanii whaashiib whargwi amaagkaab iikti,
02 Yaaguubi indhiwa wharru Masree haay eeyaaneeb kassooh tamiyaani har'ii,
Yaaguub masi y'areeyooh dehaay,
<<Masir agarnaat masi shalik harru dehoon dilibna ahaana.>>
idi.
03 Laakiin Yahuuda bariiyooh dehaay,
<<Uutak hinin shirtaayoonu,
<Usanookna haay eetiina bitdiineek,
shaawti karhitaanheeb.>
idi hoon.
04 Baruuk usanoon geeboon fandiigeek,
shaawti giigiit harroob dehook dilba niyaay.
05 Laakiin barooh geeboon batfadiigeek,
hinin giigni kindi.
Uutak suur akay,
<Usanookna haay eetiina bitdiineek,
shaawti ifiiri rhi kitdiina.>
idi hoon.>>
idi.
06 Yaaguub bareeyooh dehaay,
<<Naanhooy een igwirha haay eetaana?
Weer san tiibriineet toona barooh naanhooy sootaana?>>
idi.
07 Baraah <<Uutak hinin iknaayeen raatiya hoon,
indhiwaayeesoon gwidaana raatiya hoon:
<Baabuukna masi dhhaniibu?
Weer san tibariina?>
idi hoon.
Hinin baruuh raatiyaneet toona dehaay nidgi.
Baruuh <Usanookna tooy haay m'aana!>
iideet toona niktiin han?>>
idiin.
08 Yahuuda ubaabaay dehaay,
<<Binyaamiin soorimaheeb,
willa giigi andi.
Shaawti hininwa,
baruukwa,
y'araanwa gaal han hoon iiyyi kiidi.
09 Ani uknaayu bariiyooh um'asig dehook adminani.
Barooh haay y'iit hook suurook asingad baakaayeek,
kassooh umidhhanu diimaab amooyaayheeb.
10 Barooh geeboon giigsaab tiiktiyeek,
oon hadiit suur akay malu doora kitimiit nit'igir.>>
idi.
11 Malya ubaaba Israa'iil bareeyooh dehaay,
<<Binyaamiin ibakii geebookna giigi indiyeek,
whad'a whaashiisoon daayiina miyaaw sitoobna:
Shakwiinaatwa,
awitwa,
mirwa girinfulwa,
fuulwa,
looswa sitoobna.
12 Ashteeti mhallagaab warib shaawnaat haay giigaana,
ikiisaayeeb timriineeb imhallaga ibakii gamaamtii han agar ikatiina haay agarna.
13 Usanookna geebookna haay giigaana.
Shaawti ootak beeti difna.
14 Whaakimi shibuubiib giigteenihoob,
Ukwaasana W'alya ootaki suurii rhamaat ba'arhami hookna.
Aflaay whaakim aree usanookna ooraawwa Binyaamiinwa fandiigka geebookna haay eeteena.
Tuuyat aniib y'ar ibakii iyaay tindiyeek,
bak batiikti.>>
idi.
Yuusfiib isana Binyaamiini geeb Masree y'agarna
15 Aflaay isana oomiyaaw yakisiyaan,
Binyaamiinwa,
imhallagaayeet shawaaywa yakisiyaan.
Shaawti Masir ookiik ashshigiyaan.
Yoosfi suurii ingadna.
16 Yuusif Binyaamiin rhiyanihoob,
ugawiyooh shagaamiib ukishiya waliikiyaayt,
<<Een eenda aniib oogaw sitooba.
N'aayt haridaat daayiib tikwiya.
Baraah nabhoob anii geeb mhasi iyadna.>>
idi.
17 Oont'a ukishiya toona baruuh sooyaneet itkwikw,
bareeh Yoosfiib oogaw haay ibi.
18 Baraah usalaliib winneet irkwiin aree kwakwooniyaan,
<<Hinin beentooy haay istoobiyeeb toona baliin imhallaga ikiisaayeeb y'agarnaayi sababi.
Usijniib daasi hoon indi,
kishiyaab iikwasi hoon indi,
imakeen aree hoon iyaay indi.>>
idiin.
19 Malya Yoosfiib oogawi dheefaay ukishiyaay dehaay bhaliisamiyaan.
20 Baraah <<Duuruun,
Masir harrooy dalabiib gaalhoob y'aaba.
21 Laakiin whawaadiib mhiin gaal ningadaayt ikiisaayeen fadagnanihoob,
kasseeh imhallaga wharru haay niidlibeeb gaalka ukiisiyoon nimri.
Oont'a baliin imhallaga haay y'aaba.
22 Masi oont'a han wari mhallaga harroob haay nidalbeeb han nibari.
Baliib imhallaga aaw ikiisaayeeb daasiyaneeb kinkan.>>
idiin.
23 Ukishiya <<Gwirha kiihaayna!
Baahasiikna.
Baraakwa baabuuknaawwa t'abidneeb Ukwaasana imhallaga ibakii ikiisaayeeb daasaab ikati.
Imhallagaayeekna aree ani timmiimaab akay hookna akwisi.>>
idi.
Malya baruuh Shim'oon dehaay isfar'a.
24 Ukishiya bareeh Yoosfiib oogawiib shuumsiyaayt,
iragadaayeeh haay iishgwidhni yam yhii.
Eemak aree m'ariit yhii.
25 Baraah umyaawoohna Yoosfii dehaay niyaamiineeb nabhoob iyiwnee dehaay isoomirna.
Beenhoob baraah Yoosfi geeb m'ariit tamaa iidneet toona imaasiwna.
26 Yuusif oogaw eeyanihoob,
baraah oomiyaaw haay y'aab iiktiineeb yhiina.
Masi bariiyooh suurii whaashi kehii kuuramiyaan.
27 Yuusif baraah kak iifiineeb sakanaayani har'ii,
<<Baabuukna w'eegrim baraak haay hadiidtaani kwatiibu?
Masi dhhaniibu?>>
idi.
28 Baraah <<Baabuun,
ikishiyaayuuk masi dhhaniibu,
kwatiibi.>>
idiin.
Malya masi Yoosfi suurii kuuramiyaan aree asjidiyaan.
29 Yuusif nakamiyanihoob Binyaamiin oosan rhiya,
<<Uun baruuh aree ibakii usanookna oodis ibaraakna haay hadiidtiineeb ikati.
Ukwaasana tubaraka hook ba'iid'a,
w'ooruun!>>
idi.
30 Malya Yuusif Binyaamiin winneet areeyi akay ugawooh beeti dhaabiya.
Beentooy waawiya.
31 Malya ifiireeh ishigwidhaayt har'ii,
ishuukeeh tuwaawtii kaleewiyaayt,
<<Tim'ari haay m'aana!>>
idi.
32 Yuusif ood'ooh tamiya,
isana han gaalka ood'ooh tamiyaan.
Imasri igeeb iifiin Y'ibraayi geeb katamiyaan akay ood'ooh tamiyaan.
33 Yuusfiib isana usuurkinaay oodiskaab ookiik bariiyooh suurii iskattirni isoos'ana.
Baraah winneet isgaribniit taktakeeb nanakamiyaan.
34 Baraah Yoosfiit tim'riitii naat ittiyeewaayna.
Binyaamiin ay doora ookiik bareetooh tim'ariitiika gwidaakaat m'ari ittiyeewaay.
Oont'a baraah kassaah Yoosfi geeb tamiyaan aree gw'iyaan.
Kassaah aree hiddaab afirhiyaan.