Yuusfiib isana Masir ibeen
42
01 Yaaguub Masreeb harroob iifiyeet toona ikanihoob,
y'areeyooh dehaay,
<<Naanhooy tooy taktak tishabibna?
02 Masreeb harroob eefi diyee amaasiw.
Difna hargwiit baa'atoodaarna,
harroob dilibna ahaana!>>
idi.
03 Malya Yuusfiib isana itamin harroob iidlibnee dehaay Masir ibeen.
04 Yaaguub laakiin Yoosfiib oosan oodis Binyaamiin bareeyooh geeb giigsaab kiiki.
Barooh naat gaat dehaay iikti tindi miyaadiib winneet dehaay yhasik.
05 Kan'aaneeb whaashiib akraat hargwi dhibaa tiifi.
Aflaay Yaaguubiib y'ar han been wharrooy harawaay Masir ibeen oodehehayi geeb iifiin.
06 Yuusif Masreeb whaashiib haakim iki.
Baruuh kassooh oodehayii dehaay wharru iidlib.
Aflaay Yuusfiib isana eeyaanihoob,
bariiyooh suurii ifiiree whaashi kehii asjidiyaan.
07 Yuusif isanaayeeh rhiyanihoob ikan.
Laakiin girba tak hooy massalamiya winneet akra bhali bhaliisamiya,
<<Naa haashii y'aabaana?>>
idi.
Baraah <<Hinin Kan'aani haashii y'aaba,
m'ariit dilba miyaay nhariw.>>
idiin.
08 Yuusif isanaayeeh ikaneek han,
baraah laakiin barooh kanaab kiikeen.
09 Yuusif tehawsooteeh suur hawsooyaab iiktiyeet sh'iya,
<<Baraak bassassaana!
Baraak whaashiyoon nigiya dheefaay shibuubiib y'aabaana.>>
idi.
10 Baraah <<Duuruun!
Een kiikeen.
Hinin kishiyaayeeka,
harroob dilba miyaayii dehaay oobhaad y'aaba.
11 Hinin kassaan sanaaba.
Ikishiyaayaak daayi dehaya,
bassas kinki.>>
idiin.
12 Yuusif <<Bak kiiki,
baraakna hineeb whaashiib nigiya dheefaay shibuubiib y'aabaana.>>
idi.
13 Baraah <<Duuruun!
Hinin tamna malu sana hooy eefeeni dhiwee y'aaba.
Uudiskaayuun beentooy baabiyoon geeb Kan'aaneeb eefee,
sanuun gaal aree ayaabu.>>
idiin.
14 Yuusif <<Ani adiyeet toonaatiitu,
baraakna bassassaana.
15 Sidkiib tikatiineeb bitkaayneeb iikan andi.
Ani whad'aay midhhanii halafooyaabu,
baraakna usanookna oodis haay eetiina bitdiineek,
oon ugawii giigsi hookna kaadi.
16 Gaal bareesookna giigiit oosan haay y'iiniib hayidna.
Baraak aaraw laakiin usjiniib tehagitna.
Aflaay baraak sidik hadiidteeneeb gwisir idaal hookna andi.
Laakiin gwisir hadiidteeneek,
ani whad'aay midhhanii halafooyaabu,
baraakna bassassaana!>>
idi.
17 Oont'a Yuusif bareeh kasseeh mhayt yina oosjin id'i.
18 Tooyin tumhaya Yuusif bareeyooh dehaay,
<<Ani Ukwaasana arankwi taku,
bak sakaana malya iidhhan tiyadna:
19 Baraakna sidki da tikatiineek,
gaal bareesookna usijniib hangiit,
aaraw laakiin wharru yaksiit indhiwaayeekna yhargwaab teebiina.
20 Laakiin usanookna oodis ibakii anii dehaay haay m'aana.
Shaawti malya oosdik hadiidteeneet toona iikan andi,
aree idaar hookna kaadi.>>
idi.
Aflaay baraah han beet toona gabbalamiyaan.
21 Yuusfiib isana taktakee dehaay,
<<Usanoon Yuusfi sabbii uun ujasa dehoon ikati.
Baruuh hoon harwee,
gwirhaayeeb haayee,
hinin sinaakiraab kinki.
Oon usabbii aree aan igwirha oont'a dehoon ikeen.>>
idiin.
22 Raa'oobiin hadiidiya,
<<W'oor baalhasaana diyaayookna kaaki han?
Laakiin sinaakiraab kitteenheeb,
oont'a aree w'ayoon nimri,
bariiyooh oobooy nitooshiik.>>
idi.
23 Baruuh tirjumaanii hadiidsami.
Yuusif bhaliiyeehna afhamiyeet toona kanaab kiikeen.
24 Yuusif bareesooh fidnaab nakamiyaayt waawiya.
Laakiin masi bareeh nakamiyaayt bhaliisamiya.
Malya Yuusif Shim'oon isehaakwirt aaraw shibbee haay giigsiya.
25 Malya Yuusif ikishiyaayeeh sooya,
isanaayi kiisa harroob eetibneet toona sooya.
Gaalka imhallagaayeeh ukiisiib dehaay daaseeneet toona han sooya.
Masi balamiit han iyawneet toona sooya.
26 Baraah wharrooyooh imakeehna irbiiniit giigiyaan.
27 Whawaad hooy naayiini mhiin iktimnihoob,
gaal bareesooh umeekooh harroob iyiwi jillaay ukiisoos ifdigihoob,
imhallagaayeeh ukiisi yafiib rhiya.
28 Baruuh isanaayee dehaay,
<<Shibibna!
Imhallagaayi y'agarna,
tooy ukiisiib eefeen.>>
idi.
Bareeh kasseeh winneet mirkwaay hooy daayaayt katatiyaan,
<<Ukwaasana dehoon id'iyeet tuuna naanaati?>>
idiin.
29 Malya ubaaba Yaaguub Kan'aani haashiib iifiib beeti y'agarnihoob,
toona dehaay tikeet kastooh sooyaana.
30 Baraah <<Masreeb whaakim hinin akraab infaraad hoon,
bassas whaashi daagwiib y'aab hiisiya hoon.
31 Laakiin hinin bariiyooh dehaay,
<Hinin sidki da,
bassas kinki.
32 Tamna malu sana hooy eefeen indhiwaayee y'aaba,
uudiskaayuun Kan'aani haashiib baabiyoon geeb eefi.
Uuraaw aree ayaabu.>
nidi.
33 Malya Masreeb whaakim,
<Baraakna sidki da tikatiineeb bitkaayneeb iikan hookna andi.
Gaal bareesook tooy ishna,
aaraw wharru indhiwaayeekna haay beena.
34 Laakiin usanookna oodis tooy anii dehaay haay m'aana.
Aflaay baraakna sidki da tikatiineet toonaawwa,
bassas bitkaayneet toonaawwa iikan andi.
Malya ani usanookna usijnii iifdig andi.
Baraakna shaawti tooy b'iishraateena.>
idi hoon idiiniit ubaaba sooyaan.>>
idi.
35 Isana ikiisaayeeh kookiyaaniit wharru hooy shikwiyaanihoob,
imhallagaayeehna ikiisaayeeb imriin.
Baraahwa ubaabaawwa winneet iimhana.
36 Yaaguub <<Baraakna suur y'ari Yuusifwa Shim'oonwa hoosu tiyheena,
oont'a aree Binyaamiin tehariwna han?
Naatka aneeb timgwashiish han!>>
idi.
37 Raa'oobiin <<Baab,
ani Binyaamiin agari haay baay'ayeek,
aniib y'ar mhalleeh daara!
Aamanaaheeb,
haay it'igir andi.>>
idi.
38 Laakiin Yaaguub <<W'ooru bareeyookna geeb Masir kaasitoob.
Uusan Yuusif ayaabu,
baruuh ood'ooh imhi.
Barooh maagnaayt dehaay tikatiyeek,
lhanayt idaarheeb iyadna.
Baraakna aree araatamami tiyadna.>>
idi.