Yuusif Far'uuniit tehawsi sooyi
41
01 Malu hawlaayi har'ii,
Far'uun tehawsooteeb Ooniili daraag gadee ugarooyooh rhi.
02 Gaalhoob,
asarama sh'a dhhaab eeyaaniit,
iyami daraag iifiib oosiyaam tamiyaan.
03 Malya asarama sh'a nhawiib winneet shingiraab oobharii eeyaaniit,
eesh'a eerawi daraag oobhari ginnaaliib ingadna.
04 Malya eesh'a eedhhaab tamiyaan.
Beenaay har'ii shaawti Far'uun ib'ar.
05 Far'uun masi diwiya,
warit hawsu aree hawsooya:
Asarama gangara gwida harru hooy iifiyeeb,
gaal aggaay hindi kehii iifiin rhiya.
06 Malya asaramaab gangara warib,
oomhi baraam balamsaab iiktiyeeb w'agga ookinaay kehii rhiya.
07 Malya aan igangara y'asarama ibalama,
igangara wharru atab tamiyaani id'iin.
Whad'a aflaay ib'arihoob,
tuuna hawsoot akay rhiya.
08 Tooyin tooraaw whad'a winneet gadabaa mhiya.
Malya Masreeb tuseharti daawwa,
kanaaniigaawwa kasseeh waliikisiyaayt tehawsooteeb rhiyaneet toona sooya.
Laakiin gaal han bareesooh tehawsooti mitiya sooyaab kiiki.
09 Whaay gw'asanaayi suurkina Far'uunii dehaay,
<<Amsi gaana baadhinaab iikiyeet sh'ani.
10 Baruuk,
aneebwa yhadhiib taakwanaayi suurkinaawwa hoon tehasaayt udaabti gawiib oosjin tid'iyoonhoob,
11 hawaad gaal mhallaan hawsoona.
Hawsootka aree naat gaat mitiyaayiin.
12 Udaabti kishiya iiktiib Ibraayiib,
adhami oor beentooy whabsiib geeboon iifi.
Tehawsooteen soonanihoob,
baruuh gaalka daayiib dehoon fassariya.
13 Baruuh sooyaneet tuuna aree kastuuh sidik tiki.
Ani ushagaayu agar,
yhadhiib taakwanaayi suurkina aree itoodaar.>>
idi.
14 Far'uun Yuusif waliikisiya,
willa oosjinii haay eeyaan.
Baruuh itoomaan,
yhalaakayeeh gayyariyaayt Far'uunii dehaay eeya.
15 Far'uun bariiyooh dehaay,
<<Ani hawsooyan,
gaal han tehawsooti mitiya kanaab kiiki.
Baruuk tehawsu fassartiniya diyee amaasiw.>>
idi.
16 Yuusif <<Beet toona ani ka'adgiran,
laakiin baruuk harriiweet toona Ukwaasana dehook gwanbi.>>
idi.
17 Far'uun tehawsooteeh Yoosfii dehaay hadiidiya,
<<Tehawsooteeb Ooniili bhari dar angad,
18 Asarama sh'a dhhaab oobharii ifir'aniit,
iyami daraag iifiib oosiyaam tamee rhan.
19 Malya asarama sh'a nhawiib winneet shingiraab oobharii fir'ati y'iin.
Oonaay suurii masi han Masreeb bak t'iiti shingira sh'a rhaab kaaki.
20 Aash'a inhawi ishingira,
eesh'a y'asarama eedhhaab awwal eeyaan tamiyaani id'iin.
21 Laakiin beenaay har'ii han baraah suureet masi nhawiibwa shingiraabwa iiktiin.
Malya ani ab'ar.
22 Shalik doori har'ii,
masi warit hawsu hawsooyan.
Asarama gangara harrooy gaal aggaay kehii iifiin rhan.
Igirma winneet harroob ataba bashikwa.
23 Malya asarama iyay gangara wari,
oomhi baraam balamsaab iiktiyeeb w'agga ookinaay kehii iifiin.
24 Malya aan igangara ibalama,
igangara wharru hooy iifiyeeb ikwit'ani id'iin.
Tehawsooti tuseharti dehay sooyan,
laakiin gaal han imitiyaayeeh kanaab kiiki.>>
idi.
25 Yuusif Far'uunii dehaay,
<<Tehawsootaak gaana mitiyaayeen:
Ukwaasana weera iideet toona Far'uunii dehaay lawisiya.
26 Aash'a y'asarama aadhha:
Asarama hawla ikatiin,
wharrooy igangara y'asarama han asarama hawla ikatiin.
Taan bataah gat hawsoota.
27 Aash'a y'asarama inhawiibwa ishingiraabwa har'ii eeyaan:
Aan han asarama hawla ikatiin.
Igangara y'asarama oomhi baraamii balamaab han asarama hawla ikatiin.
Tehawsootaak bak fassarameen:
Asarama hawla hargwi y'aa hookna indi.
28 Tuun tuuna hallaay sooyaneet toonaatiit,
Ukwaasana weera iideet toona Far'uun rhisiya.
29 Asarama hawla kastuuh Masir gwida harru harrooyi tindi.
30 Laakiin asarama hawla wharru hooy itooniiweeb daayi iyadna.
Yhawla idaayi itbidhdhin iyadna.
Uudehay Masreeb kassuuh hargwiit hooy daayi tindi.
31 Tuun tehargwi akraat iikti tindi akay,
uudehay suur daayi hawla hasamaab iiktiineet toona kash'iyaan.
32 Ukwaasana tehawsooteeb maloot doora rhisiya hook,
beet tehalaagaay Ukwaasana kwaasaab ikatiyeet toona rhisiya hook.
Baruuh aree willa beet toona iikwasi indi.
33 Aflaay oont'a Far'uun kanaant ibari tak fagar harriiweet toonaati.
Malyaab barooh Masir isehakiim.
34 Malya wharrooy yhawla y'asaramaayeet ayyaat takweet oodehay isfar'i wakiilaab waasiini.
35 Baraah een yhawla idaayiib igayii y'eenneeb wharru timadiinaateeb ideebnee dehaay baruuk had'aayeet hiiyya.
36 Oon wharru Masreeb whaashiib tehargwi hooy daatiniyeeb y'asarama hawlaayee dehaay ideebna.
Aflaay oodehay hargwiit idaar kitdi.>>
idi.
37 Far'uunwa idaabtaayaahwa een ibhali d'am hooy imriin.
38 Aflaay Far'uun bareeh raatiya,
<<Oon ootak t'iiteeb weer nimeer?
Oon barooh sidik Ukwaasanaay aashuuk geeb eefeen.>>
idi.
39 Far'uun Yoosfii dehaay,
<<Ukwaasana uukna baliit teena rhisiya hook.
Bariisookka kanaaniigakaab tari fagarkaab kiihaay.
40 Oont'a aniib ugawiib had'aab iikwasi hook andi.
Kassuuh uudehay aree ibhaliyeek isnaakiir.
Bariisookka tageegaaka aneeb nuun weer aree kiihaay.
41 Oont'a barook kastooh Masri kehii haakim akwaas hook.>>
idi.
42 Far'uun whad'aay ukhaatim ifir'aayt,
Yoosfiit tugiibalaaytiib id'i.
Malyaab barooh daawri halaaka istookw,
dim'araayt shinshil aree t'alaatiib yhakwir.
43 Barooh utambiilooh umalya is'am.
Uudehay waliikiyaan,
<<Yoosfi suurii asjidaana!>>
idiin.
Shaawti Yuusif Masri kehii haakim iki.
44 Far'uun Yoosfii dehaay,
<<Ani Far'uunu,
laakiin kastooh Masreeb baruuk sooyaab baakaay gaal han w'ayiisooh naat shagaami kiidi tari gaal han tiilaal iiftik kiidi.>>
idi.
45 Malya barooh Saafnaat Faaniiha iisim.
Barooh aree Ooneeb ufagiiri Bootiifaariit oot Asnaat isid'ir.
46 Yuusif Mareeb whad'a Far'uuni whii haakim ikayihoob,
w'imruuh mhay tamuun hawla iikti.
Far'uunii giigiyaayt kastooh Masreeb hiirareeriya.
47 Wharrooy yhawla y'asarmaayeeb whaash winneet gwidaana harrooya.
48 Yuusif een Masreeb wharrooy yhawla y'asaramaayeeb kassooh wharru timadiinaateeb idibi.
Madiinaatiibka aree tidir'a idarag iifiint yaksaat iiktiineeb wharru hooy daasiya.
49 Yuusif winneet gwida harru idibi.
Wharru guudtii ubhari issi t'iiteeb iki.
Winneet guudiyaayt aree baa'adhdhagwgwiib iki.
Yoosfiib y'ar
50 Tehargwiiti hawla y'aab baakaay Yuusif tutakatooh Asnaat,
Ooneeb ufagiiri Bootifeeraayt ootiib malu ar iibri.
51 W'ooruuhna usuurkina Manassa atoosmaabi.
Manassa <<Ukwaasana kasseeh igwirhaawwa kasseeh baabiyu dhiwaawwa ishbaadhinheeb.>>
miyaadi.
52 W'oorooh ooraaw Afraayima atoosmaabi.
Yuusif <<Ukwaasana igwirhaayi haashiib ansiriyaheeb.>>
idi.
53 Malya wharru oogwidaanaay y'asarama hawla inhadna.
54 Y'asarama hawla tehargwiiti aree Yuusif iideenaatiit eeyaan.
Kasseeh yhash eeraw hargwiit tiifi.
Laakiin kastooh Masreeb gwida harru iifi.
55 Malya oodehay Masreeb akra hargwi hooy dhibiyanihoob,
Far'uuniib m'ariit yhariwniit waawiyaan.
Baruuh udehayii dehaay,
<<Yoosif beena.
Baruuh indiyeet toona sakaana!>>
idi.
56 Tehargwi kastooh Masreeb whaash tiktim aree winneet t'akirihoob,
Yuusif imikhsana wharru hooy dibiyaab iiktiyeeb ingil.
Wharru udehayiib idaalib.
57 Tehargwi oodehay winneet amaag abkaa tiifi akay,
uudehay harrooy harawaay kasseeh yhashee Masree dehaay eeyaan.