Yuusif hawsoot sooyi
40
01 Shalik doori har'ii,
malu Masreeb whad'aay kishiya,
w'ankwanaayoohna Far'uun isehasna.
Kishiya gaal Far'uuniib whaay gw'asanaayi suurkina,
uuraaw aree yhadhiib taakwanaayi suurkina.
02 Far'uun whaay gw'asanaayi suurkinaawwa,
yhadhiib taakwanaayi suurkinaaywa winneet yhasi.
03 Bareeh han been oomhiin Yuusif hooy sajaan iiktiyeeb,
usijni daabti gawiib shuumisiya.
04 Baraah usijniib gwida daman is'ana.
Udaabit aree bareeh Yoosfi whii id'i.
Yuusif bareeh shagaamiya.
05 Hawaad gaal aanda imalu hawsooyaan.
Tehawsootaahna laakiin gaatka naat gaat tuuliin.
06 Tooyin tooraaw,
Yuusif eenda iishbibee dehaay giigiya.
Bareeh winneet haskaa rhiya.
07 Baruuh bareeh raatiya,
<<Amsi ifiiraakna hamaashaaba,
naanhooy tehasikna?>>
idi.
08 Baraah aree <<Mhallaan hawsoona,
laakiin tehawsu fassariini gaal han kiihaay.>>
idiin.
Yuusif bareeyooh dehaay,
<<Ukwaasana tehawsooti fassarana Ukwaasana kiiki han?
Oont'a naan hawsootaana sooyaanheeb.>>
idi.
09 Been whaay gw'asanaayi suurkina tehawsooteeh Yoosif sooya,
<<Ani tehawsooteeb inabi hindi suuru rhan.
10 Uun whindi mhay l'id iibri,
willa aree faad yakisiya,
faar id'i,
malya inab id'i.
11 Malya ani Far'uuniib ookaas abikaayt,
w'inab hooy admim,
malya ookaas Far'uun nuunsan.>>
idi.
12 Yuusif <<Tehawsootaak bak miyaad ikatiin:
Aal'id aamhay mhay imb'i miyaad ikatiin,
13 Far'uun barook mhayt yinaateeb afooyi hook indi.
Masi umhiinook y'igir hook indi,
barooh kaas nuunsi tindiya,
suureetook whaay kaas t'a han gw'asi tindiya.
14 Laakiin naatka tishboobiyihoob sh'aaheeb,
shiboot weeraheeb.
Far'uun deha sooya baabaadhinheeb!
Oon usijnii fir'aheeb.
15 Ani Y'ibraayi haashii yakaman,
tooy Masreeb laakiin sijin astehaleen gwabab gwibbaab kaaki.>>
idi.
16 Been Far'uuniib yhadhiib taakwanaayi suurkina Yuusfiib ifassarti itehawsooti dehaay ishboobihoob,
<<Ani han hawsooyan.
Ani waawi,
mhay biili hadhiyeeb ugirmaayu kehii yaksaa iifi.
17 Ubiili umhakwaliinaay Far'uunii dehaay takwaayt gwidaat m'ari hooy tiifi.
Laakiin beet tim'ari kilay tamiin.>>
idi.
18 Yuusif bariiyooh dehaay,
<<Tehawsootaak bak miyaad ikatiin:
Ibiili aamhay mhayt yina ikatiin.
19 Mhayt yinaateeb whad'a ugirmaayook iikit'a indi,
ugarooyook hindiib iish'ag indi.
Aakilay aree y'iit ugarooyook tamiin iyadna.>>
idi.
20 Uumb'i umhaya whad'aayt toofrayti w'iid iikti.
Baruuh kasseeh idaabtaayeeh aduumaat dehaay id'i.
Whaay gw'asanaayi suurkinaawwa,
yhadhiib taakwanaayi suurkinaawwa usijnii haay eeya.
21 Oon wha gw'asanaayi suurkina ushagaayooh dehaay y'agir.
Aflaay baruuh masi ookaas Far'uun nuunisiya.
22 Yhadhiib taakwanaayi suurkina Yuusif sooyaneet toonaatiit Far'uun iskit isoodir.
23 Laakiin whaay gw'asanaayi suurkina Yoosif ibaadhin,
sh'aab han kiiki.