Yuusifwa Bootiifaariit tutakatwa
39
01 Y'ismaa'iila Yuusif Masir hadiit haay giigiyaan,
barooh Bootiifaar,
whad'aay daabtii dehaay idlibna.
Uun udaabit whad'aay gaw iigw'idiin oodehayi kehii had'aabu.
02 W'ankwana Yoosfi geeb iifi.
Baruuh w'ankwanaayooh Umasri geeb ikwiirihoob,
W'ankwana barooh iid'eenaatiibka ansiriya.
03 Bootiifaar,
W'ankwana Yoosfi geeb iifiyeet toona ikan.
Yuusif iid'i shagaayka W'ankwana ansiraab iiktiyeet toona han rhiya.
04 Bootiifaar Yoosif dhibsamiya,
shamaamiigaayooh aree ikwaas.
Ugawoohwa kassooh oomraayoohwa barooh wakkaliya.
05 Bootiifaar oodoor Yoosif ugawoohwa kastooh toona t'iibriyeetwa is'abkeenaay,
baarakamiya.
W'ankwana Yoosfi sabbii Bootiifaarwa,
kastooh toona t'iibriyeetwa,
indhiwaayeehwa,
tudir'aatoohwa dehaay baarakiya.
06 Bootiifaar kastooh toona Yoosfii kehii y'ish id'i.
Yuusif beentooy haayee baruuh tum'ariitooh nuun yhiskeena weena kitehaay.
Yuusif daawri mingidi taku aree gibliibi.
07 Beenaay har'ii Bootiifaariit tutakat Yoosif rhitanihoob,
<<M'aa geebu diwaa!>>
tidi.
08 Laakiin baruuh irib,
<<Aniib w'ankwana oogawi amiin ikwaaseheeb,
ibariiyeenaaka kastooh aree is'abikeheeb.
09 Tooy oon ugawiib aniika hayiska tak kiihaay.
Batook tutakatooh nuun naatka yhiiheeb.
Aflaay bak t'iiteet maagnaayt Ukwaasanaay suurii kak sakani?>>
idi.
10 Laakiin batuuh barooh w'aash tirib,
diimaabka ubasharooh hooy tehariw.
Baruuh laakiin diwlaab han kiiki.
Batuuh tehirweet toona dehaay iirib.
11 B'eeb gaal Yuusif shagaayooh iid'ee dehaay Bootiifaariib oogaw shuumiya.
Wari shagaamana aree beentooy kiihaayna.
12 Bootiifaariit tutakat Yuusfiib ugamiis t'abikaayt,
<<Oon'aal geebu reewaa!>>
tidi.
Yuusif laakiin ugawii dhaabiyaay ifir'a.
Laakiin ugamiisuuh batiiyooh w'ayiib imhi.
13 Baruuh whalaakooh batiiyooh w'ayiib y'ishaayt ugawii dhaabiyaneet toona rhitanihoob,
14 ikishiyaayeeh waliiktaayt,
<<Shibibna!
Uun W'ibraayi haay kashiiniyoon dehaay y'aabu.
Akruurii ubasharu hoosu yhariw.
Laakiin ani oodehay waliikan.
15 Baruuh aneeb waliikee imaasiwihoob,
ugawii dhaabiyaay ifir'a,
ugamiisooh aree ani geeb y'ish.>>
tidi.
16 Bootiifaariit tutakat Yuusfiib ugamiis utakuuh eeyaneeb ookiik haay tehagit.
17 Malya batuuh utakiyooh dehaay,
<<Been ukishiyaayuuk W'ibraayi ubasharu hoosu yhariw.
18 Laakiin ani oodehay aweenheeb adiit waliikanihoob,
ugamiis y'ish id'iit ugawii dhaabiyaay ifir'a.>>
tidi.
19 Bootiifaar beet toona <<Ukishiyaayuuk bak iweerheeb>> miyaad tutakatiisooh imaasiwihoob winneet yhasi.
20 Malya whad'a oodehay hooy yhibseeb oosjin Yoosif hooy shuumisiya.
21 Laakiin W'ankwana Yoosif y'awi,
winneet aree dehaay ishboob.
W'ankwana been usijni aabki Yoosif areesiya.
22 Usijniib iifiinwa,
usijniib tiifiit toona kastoohwa Yoosif is'abik.
23 Usijni had'a ishaga Yoosif s'abkaab iiktiyeeb haay haasabaab kiiki.
W'ankwana aree Yuusfi geeb iifi,
iid'i shagaayka ansiriya.