Yuusfiit tehawsu
37
01 Yaaguub shaawti Kan'aani haash ubaaba hooy ikwiireeb baruuh han hooy ikwri.
02 Aan baraah aree Yaaguubi ara.
Yuusif tamna asarama hawla iibriyi door,
isanaayi geeb ooreew iishkwi.
Bilhaawwa Silfaaywa y'ari geeb ooreew iishkwi.
Laakiin baruuh diima isanaayeetooh maagt ubaaba sooyi.
03 Israa'iil y'areeh eeraweeka Yuusif winneet areeyi.
Yuusif ubaaba Yaaguub winneet eegrim akay ifriyeet toonaatii barooh akraab areeyi.
Masi Yaaguub Yoosfii dehaay daawri gamiis shagaamiya.
04 Laakiin Yuusfiib isana ubaaba bareesoohka barooh areeyakaab akay rhiyaanihoob,
Yoosif iribna.
Daayi bhali han barooh hadiidsamaab kiikeen.
05 Hawaad gaal Yuusif hawsooteeb rhiyaneet toona isanaayeeh sooya.
Baraah amaagkaab barooh iribna.
06 Yuusif bareeyooh dehaay,
<<Ani hawsooyaneet toona sooyi hookna andi,
sinaakirna:
07 Hinin tudir'aatiib niifi,
gamhiit habba aree nhiikwar.
Aniib imhakwar gaalhoob yakiyaayt y'atam.
Bareeyaakna imhakwara aniib imhakwarii dehaay idbalniit suurii kuuramiyaan.>>
idi.
08 Isanaayaah <<Aflaay baruuk sidik hineeb had'aab iikati tindiyaka hukwimi hoon tindiya han?>>
idiin.
Shaawti been oomb'i tehawsu sooyaneeb aree amaagkaab barooh imooraabna.
09 Yuusif masi warit hawsoot hawsooya,
teen han isana sooya,
<<Tehawsu teeraw sinaakirna!
Tooyinwa,
tootrigwa,
tamna gwir hayikwaabwa anii suurii asjidiyaan.>>
idi.
10 Yuusif tehawsooteeh ubaaba sooyanihoob,
ubaaba barooh idaanin,
<<Baliit tehawsu tehawsootaneet naanaata?
Deetuukwa,
aneebwa,
isanaayaakwa kassaan bariiyook suurii asjidni niyad miyaad ikati han?>>
idi.
11 Yuusfiib isana winneet iribna,
ubaaba aree winneet tehawsooteeb ikwin.
Yuusif idlab Masir haay ibeen
12 Yint gaat Yuusfiib isana Shakiim dawil mhiin ooreew ishaakwna.
13 Israa'iil aree Yuusfii dehaay,
<<Baruuk isanaayeek bayaa!
Baraah t'anooti geeb Shakiimeeb eefeen.>>
idi.
Yuusif <<Awooh,
ani giigat y'ani>> idi.
14 Aflaay ubaaba bariiyooh dehaay,
<<Uureewwa isanaayaak kak eefeeneeb diliiya.
Malyaab m'aat sooyaheeb.>>
idi.
Malyaab Habaruuneet t'abaatii barooh diigwatiya.
Yuusif Shakiim dawil mhiin iktim.
15 Baruuh dir'aati bitik hiirareeree,
tak imri.
Uutak <<Naan tehariiwwa?>>
idi.
16 Yuusif <<Ani isanaayeewwa reewoosnaawwa ahariiw.
Bareeh rhita?>>
idi.
17 Uutak <<Awooh,
laakiin baraah tooy kiihaayna.
Baraah <Dootaan niibi> diyee amaasiw.>>
idi.
Aflaay Yuusif isanaayi harawaay Dootaan ookiik giigiya,
bareeh beentooy imri.
18 Laakiin baruuh masi beentooy kitmaab kaakaay,
baraah sagi mhiinii barooh y'ee rhiyaanihoob,
madar niyaamiyaan.
19 Baraah taktakee dehaay,
<<Shibibna,
been tehawsooti kina tooy y'iini!
20 M'aana hinin barooh nidaar,
malya gwimadt reetiib niigid.
Malyaab <Malaaliit dhhani tamtaay tid'i> niyaad.
Shaawti baliit tehawsu kak sakeeneeb malya niishibib.>>
idiin.
21 Raa'oobiin een bhali imaasiwihoob,
Yuusif ishidhhineet toona yhiriw akay,
<<Abadan barooh nidaar kindi.>>
idi.
22 Raa'oobiin Yuusif ishidhhineet toona ubaabaay deha is'igreet yhiriw akay masi,
<<Baadirna tari baalhasaana!
Laakiin umingaayiib balamaat reetiib tikwisaana.>>
idi.
23 Yuusif isanaayi dehaay eeyanihoob,
baraah ugamiis udaawriib hooy ifir'ana.
24 Malya barooh y'abikniit balamaat reetiib tikwisiyaan.
Tuuri balamaatu,
yam han kitbari.
25 Yuusfiib isana m'ariiti kehii iisit'ana.
Nakamiyaanihoob,
Ismaa'iilaayi dhiwa kam gadh'amaab sikattira Gil'aadee y'ee rhiyaan.
Aakam gadh'i ameeribiyaaba,
Masir haay iibiin.
Aakam mheelwa,
shakwiinaatwa,
mirwa ameeribiyaaba.
26 Yahuuda isanaayeeh dehaay,
<<Hinin usanoon dirtiit ubooyooh na nikwabseek,
naan nimeer?
27 Yakaana,
oon barooh bindari,
Ismaa'iilaayee dehaay niidlib.
Baruuh han sanoonu,
booyoonwa basharoonwa ikatiyeet toona baabaadhinna!>>
idi.
Aflaay isana aaraw han ibhali haay dhibiyaan.
28 Imiidiyaani tijar eeyaanihoob,
Yuusfiib isana Yoosif tooreetii ifir'ana.
Tagwuugw mhallaga ashteetiineeb Y'ismaa'iilaayeeb barooh idlibna.
Y'ismaa'iili barooh Masir haay ibeen.
29 Raa'oobiin toori y'agarihoob Yoosif miraab kiiki akay gadabiyaayt yhalaakaayeeh batakiya.
30 Malyaab isanaayee dehaay eeyaayt,
<<W'oor giigaabi!
Ani aflaay kak saki andi?>>
idi.
31 Yuusfiib isana n'aayt yharidniit,
Yoosfiib ugamiis ubooyiib iraagiisna.
32 Beenaay har'ii,
ugamiis ubaaba haay ibeeniit,
<<Oon nimri!
Daayiib shibiba w'ooriiyook han kiiki?>>
idiin.
33 Yaaguub ugamiis Yoosfiib iiktiyeet toona ikanaayt,
<<Uun baruuh w'ooriyu gamiisi!
Yoosif dhhaniyaat idiirniit firkak ikwaasna han?>>
idi.
34 Yaaguub hasyaaytii yhalaakaayeeh batakiya id'i,
kiisi halaakaab ikwi,
malya gwidaat yinaa w'oorooh waawisiya.
35 Kassaah y'araah allaayrahamootiib yhariwna akay dehaay eeyaan.
Laakiin baruuh w'allaayrahamooti irib,
<<Abadan!
Ani w'ooru waawee umiimaash iibi andi.>>
idiit barooh waawiya.
36 Malya ib'iishraana,
Far'uuniib Bootiifaar iidneeb,
Masreeb whad'aay daabit iiktiib,
bariiyooh dehaay Yoosif iidlibna.