Diina akriree reewamta
34
01 Diina Yaaguubwa Leeyahaayt ooti.
Diina beentooy iifiin whaashiit m'at timuukini jillaay giigta.
02 Shakiim Haamuuri oor Whiiwaayi,
whaashi haakim batooh rhiya.
Baruuh t'oor dhibisiyaayt,
reewiya.
03 Laakiin Shakiim,
Diina Yaaguubiit oot ikehan.
Baruuh t'oor areeya aree nafit kalma bhaliisamiya.
04 Baruuh ubaaba Haamuurii dehaay,
<<Beet t'oor sid'iraheeb>> idi.
05 Yaaguub t'ootooh Diina tak dhibisiyaneet toona imaasiwihoob,
y'araah tidir'aatiib eesh'a geeb iifiin y'iineeb hadiit yhabar ikwibis.
06 Malya Shakiimiib ubaaba Haamuur,
Yaaguubi bhaliisamti jillaay giigiya.
07 Yaaguubiib y'ar tukwaati habar imaasiwnihoob willa eeyaan.
Shakiim winneet maagnaayt sakaa iifi akay baraah winneet yhaseen.
Beet tuuna Israa'iileeb winneet shingiraanaati.
08 Haamuur Yaaguubwa y'areeyooh dehaaywa <<Shakiim w'ooru winneet Diinaab areeyiini akay barooh tisid'iirneet toona aharriiw.
09 Baraakwa hinin nimdid'ir,
baraakna t'arteen d'irna,
hinin aree t'arteekna sid'irna hoon.
10 Baraak ibitkeen kwiriina,
uun whaash winneet mar'a haashi.
Kehii kwiriina,
kehii tijirna,
kehii hiireeraana,
kehii rayiimaana!>>
idi.
11 Shakiim Diinaay ubaabaawwa toondeetii dehaaywa <<Toon toona anii dehaay tikwikwna,
baraakna tehariwneet toona aree kastooh dehookna iid'a andi.
12 Idoobi tamanwa whalageen itehariwneebwa raataanheeb,
dehookna iid'a andi.
Laakiin baraakna Diinaab sid'irnaheeb.>>
idi.
13 Yaaguubiib y'ar tuukwa amaag atweeriyaati akay,
Shakiimwa ubaaba Haamuurwa winneet talasaay bhali bhaliisamiyaan.
14 Bareeh winneet itlisna,
<<Toon hinin kinweer,
tukwaatoon kwashaab baakaay tak kinsid'ir.
Beet tuuna winneet shingiraanaati.
15 Laakiin baruuk gaana saktiniyeek hinin tukwaatoon nisid'ir hook niyad:
Baruukwa tugabiilaatiyaak daawwa titkwashiibneek,
tukwaatoon nisid'ir hook niyad.
16 Malya t'arteen nisid'iir hookna,
baraakna han t'arteekna sid'irna hoon.
Ibitkeekna nikwaar niyad bareesookna gal niikati niyad.
17 Laakiin baraakna itkwishib bitdiineek,
tukwaatoon yaksiit giigi niyad.>>
idiin.
18 Haamuurwa Shakiim w'ooroohwa aan ibhali dehaay ishboobna.
19 Shakiim udehayyooh winneet hamooysama taki.
Baruuh Diinaab kehanaa iifi akay willa beet toona iid'eet yhariw.
20 Aanda mhalla tumadiinaati suurkina eeraw imriiniit dehaay hadiidiyaan.
21 Baraah <<Aan aanda sidik hinin araween ikeen.
Aan bareeh oon whaashiib ba'ikwaarna,
kehii ba'iitjirna,
uun whaash gwida gawa isid'iir haashi.
T'arteen eed'irneet adgireen,
hinin t'arteehna need'ireet toona adgirnay.
22 Laakiin baraah ibitkeen ikweernee dehaay gaana oobhaat hoon yhariwna.
Aandaan ibakii een bareetooh itkwashiibneet toonaati.
23 Igin'ookna hooy d'iina!
Umraayoohna nimaar niyad,
ireewoohna han nimaar niyad.
Baraah ibitkeen ba'ikwaarna,
hinin han baraah yhariwneet toona niitkwikw.>>
idiin.
24 Aflaay aanda kassaah een ibhali gabbalamiyaaniit,
kassaah ikwshabna.
25 Laakiin mhayt yinaati har'ii aanda y'ikwshab masi lhamiin.
Diinaay isana Sim'oonwa Laawiibwa b'adhadhaayeehna yakisiyaan,
tumadiina tatoolamee shuumiyaan,
eenda kasseeh idaarna.
26 Baraah Haamuurwa Shakiimwa han b'adhdhaayee idaarna.
Malya baraah Diinaab geebooh haay giigiyaan.
27 Yaaguubiib y'ar aaraw eeyaana,
aree eenda amharda imriin.
Baraah tukwaati sabbii illaatiyaaniit tumadiina kastooh isaalibna.
28 Baraah anootwa,
yaatwa,
makwa,
tumadiinaatiibwa tidir'aateeb tiifiit toona kastoohwa yakisiyaan.
29 Baraah kassooh oomraaywa,
teem'atwa,
y'arwa iyheen,
igawaayeeb iifiib oomraay kassooh iyheen.
30 Malya Yaaguub Sim'oonwa Laawii dehaaywa <<Baraakna tid'iineet toona shibibna!
Oont'a akra gwirha haay eetaana.
Oon whaashiib geeboon ikweer Ikan'aaniiwwa,
Ifarasiiwwa finaab dehoon iikwsiin iyadna.
Hinin shalika,
baraah hiddaab gadiit imooth'anuun,
aneebwa udehayoowwa kwidhsi hoon iyadna.>>
idi.
31 Baraah aree <<Baraah tukwaatoon bak iiwriineet tuuna daayiiti han?>>
idiin.