Yaaguubwa Iisaawwa immararaayna
33
01 Yaaguub sagi mhiinii ishibibihoob,
Iisaaw fadhig shi da geeb haayee rhiya.
Aflaay Yaaguub y'areeh Leeyahaawwa,
Raaheelwa,
tikishiya timalootee dehaay y'aadhidh.
02 Tikishiya Silfaabwa,
Bilhaabwa hiddaab y'areesoohna dabaamiyaan,
Leeyahaabwa y'araah har'ii sakiin.
Raaheelwa Yuusifwa aree w'agiyaay sakiin.
03 Yaaguub uukna kasseeyooh suurii hiireeri.
Baruuh oosan idwilihoob asarama doora whaashi kehii asjidiya.
04 Laakiin Iisaaw Yaaguubii dehaay dhaabiya,
winneet hooy yhalabaayt shoobiya.
Malya mhalla isana waawiyaan.
05 Iisaaw y'arwa teem'atwa rhiyanihoob oosan raatiya,
<<Aan baraah aay ara?>>
idi.
Yaaguub <<Aan baraah aniiba.
Aneeb ukishiyaayook Ukwaasana winneet daayiinaayt iweerheeb,
een bareeh yhiiheeb.>>
idi.
06 Malya tikishiya timalu areesoohna eeyaaniit Iisaawi suurii asjidiyaan.
07 Malya Leeyahaabwa y'araah eeyaaniit suurii asjidiyaan,
w'agiyaay aree Yuusifwa Raaheelwa eeyaaniit suurii asjidiyaan.
08 Iisaaw Yaaguub raatiya,
<<Baruuk oon ooreew kassooh ani isalaliib am'ashaasheeb naan haay tisehariiwa?>>
idi.
Yaaguub <<Yaa w'ankwanaayu,
ani bareeh bariiteek firha haay asehariiw akay dehook diigwatan.>>
idi.
09 Iisaaw <<Laakiin usanuuy,
ani winneet gwida reew abari.
Een bareeh baruuk ugarooyook dehaay dibiya.>>
idi.
10 Yaaguub <<Abadan!
Anaahook een bareeh hoosu gabbalama,
shibootiit alaama ibitkeen ikatiin.
Bariiyeek ifiiri irhiti Ukwaasanaay eefiir rhani hasaabu.
Baruuk winneet daayiib t'ashishaheeb.
11 Anaa usanu!
Oon ooreew baruuk miyaaw akay hoosu gabbalama.
Ukwaasana winneet geebu daayiibi akay,
ani toona teharriiweet kastooh abari.>>
idiit Yaaguub winneet usaniib yhariw.
Iisaaw han hooy gabbalamiya.
12 Iisaaw <<Aflaay yakaana iibaabni,
ani han iitram hookna andi.>>
idi.
13 Laakiin Yaaguub <<Yaa w'ankwanaayu,
t'iibaab y'aree dehaay akraat tikatiyeet toona tikteena.
Masi aree ani ibakii t'anoowwa eesh'aawwa dirmani,
ufraayoohna idadis d'oorani.
Uureew gaat yintiib galeelamiiniyeek,
kassaah iyaayiin.
14 Oon usabbi,
baruuk suuroon giigaa.
Hinin aree diiseet y'arwa ooreewwa yaksiit Sa'iireeb nimmarri.>>
idi.
15 Iisaaw <<Aniib eendee gwadib geebookna ishat y'ani.>>
idi.
Yaaguub <<Een baaweera!
Ani bariiteek tifirha teebhat aharriiw.>>
idi.
16 Beet tooyin Iisaaw giigiya,
aree Sa'iir beeti y'agar.
17 Yaaguub Sukkoot beeti beeriya.
Baruuh beentooy gawooh d'iraa iifi,
ureewii dehaay aree makwaat shagaamaa iifi.
Oon usabbii aree whaash Sukkoot ittiyoodi.
18 Yaaguub Baddan Araamee giigiyaayt,
Kan'aani haashiib teefeet tumadiina Shakiim asgaa iktim.
Tumadiinaatiit mifr'atiib aree gawooh id'ir.
19 Yaaguub hooy kookiyaneeb whaash Shakiimiib whooba Haamuuri ari haashi.
Oon usabbii,
Yaaguub sheeb mhallaga ashteetii whaash idlib iyha.
20 Malya baruuh gawaayeeh idaa'ir.
Ukwaasana Y'israa'iili Ukwaasanaay dehaay karaamaati mhiin shagaamiya.