32
01 Yaaguub whaashooh ookiik agaree,
Ukwaasanaay malak dehaay eeyaan.
02 Yaaguub bareeh rhiyanihoob,
<<Uun Ukwaasanaay m'askari.>>
idi.
Aflaay baruuh been whaash <<Mahanaayima>> iisim.
03 Yaaguub Adoom,
Sa'iireeb whaashiib iifiib oosan Iisaaw beeti diigwatkinaab diigwatiya.
04 Yaaguub tidiigwata Iisaawii dehaay,
<<Toon tudiigwat w'ankwanaayu Iisaaw sooyaana:
<Ani ukishiyaayuuk Yaaguub,
Laabaani geeb agnif.
Masi aree beentooy eefi.
05 Ani gwida sh'aabwa,
makwa,
anootwa,
gwida kishiyaabwa kishiyaatwa abari.
Oont'a ani een idiigwatkina dehook afandiigiib baruuk deha n'akwmanaatiib hook aharriiw.>
diina.>>
idi.
06 Idiigwatkina y'agarnihoob,
Yaaguub sooyaana,
<<Usanook Iisaaw nibi.
Oont'a baruuh fadhig shi da yaksaa beetook sakiini.>>
idiin.
07 Yaaguub winneet irkwi aree yhasik.
Malya oodehaywa,
eesh'aawwa,
t'anoowwa,
eekamwa malu mhiin y'adhidh.
08 Baruuh <<Iisaaw gwadib inth'eek,
aaraw ifooriin.>>
idiit ikwin.
09 Malya Yaaguub sileeliya:
<<Yaa hoobu Ibraahiimiib Ukwaasana,
baabu Isehaagiib Ukwaasana,
baruuk sootaheeb.
<Whaashook agaraa,
udehayook bayaa!
Shaawti libaabsi hook andi.>
tidiyaheeb.
10 Tudaayiinaay baruuk tiweereeti kastooh ani ukishiya ka'astehalan.
Ani Uurduni bhar atlalihoob,
kwoolay nuun weena naat kaabari.
Oont'a laakiin malu m'askara dehaywa reewwa abari.
11 Oon amsi usaniisu shidhhanaheeb.
Baruuh aneeb oobhaat kaaki,
laakiin y'arwa teem'atwa han biith'eena rikwaabu.
12 Laakiin baruuk waadiyaataheeb,
<Libaabsi hook andi,
y'areek oobhari w'issiit baa'adhdhagwiib iikwasi andi.>
tidiyaheeb.>>
idi Yaaguub.
13 Yaaguub been whawaad beentooy naaya.
Malyaab been ureewiisooh usanii dehaay miyaaw isoomir.
14 Malu sheeb n'ayt kwaatwa,
tagwuugw bakwa,
malu sheeb anoot kwaatwa,
tagwuugw arginaabwa waasiya.
15 Mhay tamuun kamit hiiwaayeesoohwa,
fadhig tamuun sh'aabwa,
tamin yoobwa,
tagwuugw makt kwaatwa,
tamin mak rabaabwa masi ureewii waasiya.
16 Baruuh ooreew ikishiyaayeeh isigw'ad,
reewka hadooh isingad,
malya ikishiyaayee dehaay,
<<Baraakna ani dabaay difna,
ooreew gaalka uraawii masaafaat siisagna.>>
idi.
17 Malya Yaaguub ooreew dabaamiyaab ukishiyaay dehaay,
<<Iisaaw tim'ashiishihoob,
aay kishiya tikatiyeeb raatiini hook.
Naad teebiyeeb,
uureew igaleeltiniyi aay reew ikatiyeet toona raati hook indi.
18 Baruuk bak sooyaa,
<Uureew ukishiyaayook Yaaguubiibi.
Oon ooreew bariiyook miyaaw akay w'ankwanaayu Iisaaw dehook diigwatiya.
Baruuh aree y'aa hook indi.>
diina.>>
idi.
19 Yaaguub ikishiya ureewi kit'ana w'awwaliibwa,
umalyaawwa,
eerawwa doorka gaal gaalnaay sooya,
<<Iisaaw timeernihoob kassaakna gal bhali hadiidaana.
20 Iisaaw timeernihoob,
<Ukishiyaayuuk Yaaguub har'oon sakiini.>
diina.>>
idi.
Baruuh Iisaaw uumiyaaw afirhisiit bareeh rhiiniyihoob daayiib y'anshiisheet toona haay isehariw.
21 Yaaguubiib ikishiya reewiisooh dabaamiyaana.
Baruuh uukna laakiin been whawaad um'askariib naaya.
Yaaguub Ukwaasana im'alaag
22 Yaaguub whawaadi tarabeeb yakiya.
Tim'ateeh timaloowwa,
tikishiyaateeh timaloowwa,
y'areeh itamna gwirwa Yabbuukeeb oobhar haay itlal.
23 Malya baraah oobhar oodar ooraaw iktimni har'ii,
umraayooh kassooh han oodar ooraaw iskatim.
24 Yaaguub oont'a ood'ooh imhi.
Beentooy uumha mhiyaneeb hadiit tak gaal barooh im'alaag.
25 Uutak Yaaguub giriba biidiyeet toona rhiyanihoob,
Yaaguubiit tukwadhaam iith'a.
W'am'aluugaay sabbii aree tukwadhaam umhiiniisooh isfar'a.
26 Baraah karuumaab ookiik im'allaagna,
malya uutak Yaaguubii dehaay,
<<Fidigaheeb,
shaawti uumha mhiya,
giigi andi.>>
idi.
Yaaguub aree <<Iideharaheeb batdiyeek,
giigsi hook kaadi.>>
idi.
27 Uutak Yaaguub raatiya,
<<Uusmuuk aabu?>>
Yaaguub <<Uusmu Yaaguubi.>>
idi.
28 Uutak <<Baruuk shaawti uusmuuk Yaaguub kiiki,
laakiin oont'a <Israa'iil> iyadna hook.
Usabbu aree,
baruuk Ukwaasanaay geebwa udehayi geebwa tim'alaagaayt tigirba.>>
idi.
29 Yaaguub <<Oont'a baruuk aneeb oosmook sooyaheeb!>>
idi.
Uutak <<Baruuk ani aab akatiyeet toona kitkana han?>>
idi.
Malyaab baruuh Yaaguub idehar.
30 Yaaguub <<Ani Ukwaasanaay fiir rhan akay,
ani masi dhhaniibi!>>
idi.
Aflaay Yaaguub been oomhiin <<Fanii'eel>> iisim.
31 Yaaguub Fanii'eel hasamiyanihoob,
tuuyin tifr'a.
Baruuh tukwadhaam atooth'aat akay ankwali.
32 Barooh tukwadhaamti bashar lhamaa tiifi.
Oon usabbi,
reewiit kwadhaamtiit sha oon amsi hadiit Y'israa'iili katamiyaan.