Yaaguub Laabaanii dhaabiya
31
01 Yaaguub,
Laabaanii y'ar kwakwinhiyaana,
<<Yaaguub hineeb ubaabaay gabiya,
baabiyoon oomraay kassooh iiyhi.>>
diyee imaasiw.
02 Yaaguub han Laabaan ish'iya biikaayeet toona rhiya.
03 Yint gaat W'ankwana Yaaguubii dehaay,
<<Hoobeeyook whaash baya,
agaraa!
Ani geebook daayi andi.>>
idi.
04 Yaaguub Raaheelwa Leeyahaabwa dehaay diigwatiya.
Baruuh ooreew hooy eeshkwiyeet tidir'aati mhiin immarriineet toona sooya.
05 Baruuh bateeyooh dehaay,
<<Baabuukna hoosu badaalu,
suureet hoosu kiihaay.
Laakiin Ukwaasana baabu dehaay sileeliyeeb geebu eefi.
06 Ani baabookna akraab dehaay shagaamaneet toona bataakna tikteenna.
07 Laakiin baruuh aneeb gwida doora itliseheeb.
Aniib w'ijaar gwida doora gayyariya.
Laakiin Ukwaasana uukna toomaag sikatmaayi kiiki.
08 Baabuukna ooreew shartiit kehii teefiyi aniib w'ijaar ikwaasihoob,
kassuuh ureewi firaay shartiit kehii daata.
Kwiluuliit kehii teefiyeet aniib w'ijaar ikwaasihoob,
ureewi firaay kassuuh kwiluuliit kehii daataat iki.
09 Aflaay Ukwaasana baabookna ooreew hooy iiyhaayt aneeb yhiiiheeb.>>
idi.
10 Uureew oosamiini door ani hawsooyan.
Kasseeh eebak shartiit tari kwiluuliit,
am'almaa rhan.
11 Malya Ukwaasanaay malaktaayi tehawsooteeb,
<<Yaaguub.>>
idiheeb,
ani aree <<Awooh,
ani tooy eefi.>>
adi.
12 Masi baruuh <<Baruuk daayiib shibiba,
kasseeh y'arginaawwa eebak y'oosanaawwa kwiluuliit tari shartiit kehii teefi.
Laabaan bariiyook kehii id'iyeet toona kastooh rhan.
13 Ani Ukwaasana baruuk Beet Eeleeb dehaay sileeltaneebu.
Beentooy baruuk waadiyaab tims'abaakaheeb,
w'awi saliit kehii tifif tid'iit waadiyaab t'abika.
Oon oomhiin hooy difaa,
whaashook agara!>>
idi.
14 Raaheelwa Leeyahaabwa igwibiina,
<<Hinin baabiyoon oomraayii kwasaamnayeena naat kitehaay han?
15 Baruuh hinin girbaat m'at hiisiini hoon han?
Baruuh idlib hoon,
idoobi mhallaga han aamiya id'i.
16 Kassuuh uumraay Ukwaasana baabiisoon iiyhaneeb hininwa y'areeyoon ikati.
Aflaay baruuk Ukwaasana indiyeetook toona d'iya.>>
idiin.
17 Malya Yaaguub tim'ateehwa y'areehwa kam is'amaayt haay idif.
18 Yaaguub shaawti ureewoohwa kassooh oomraay Araamiib w'atmuuriib miraab iiktiyeebwa iiyhaayt,
ubaaba Isehaagiib whaash Kan'aan haay ibi.
19 Laabaan t'anootee mooniyi jillaay giigiyanihoob,
Raaheel ubaabaay ugawi sanama tigwhar.
20 Yaaguub aree Laabaan W'araami itil,
oogiig barooh sooyaab kiiki.
21 Yaaguub aflaay oomraayooh iiyhaayt ifoor.
Oobhar Furaat itlal,
irbaayi haash Jil'aad hadiit giigiyaan.
22 Laabaan aree Yaaguub giigaab iiktiyeet toona tooyin tumhaya ikan.
23 Baruuh ayaydeeh gal yakisiyaayt asaramaat yina Yaaguubiib oom'at y'abik.
Malya irbaayi haash Jil'aadeeb inaakib.
24 Been whawaadiib Ukwaasana Laabaan W'araamii dehaay hawsooteeb lawiyaayt,
<<Hisaabook d'iyaa!
Yaaguubii dehaay daayiina tari amaagna naat han baa'anfaraada.>>
idi.
25 Laabaan barooh inaakibihoob,
Yaaguub Jil'aad irbaayi haashiib gawooh d'iraa iifi.
Laabaanwa y'ayaydaahwa han oodar kookiyaana.
26 Laabaan Yaaguubii dehaay,
<<Naan saktaa?
Baruuk winneet titlisaheeb,
y'abuukiyaayeet t'arti hoosu haay giigta.
27 Naanhooy baasooyay hoon diiseet giigta?
Sooyaayoon tiiktiyeek,
firhaati giig giigsi hooka.
Biiboobwa baasankwoobwa dehook ishuuth'a,
malya daayiib isiisirha hook.
28 Baruuk t'arteewwa y'areehna salaamaab baakaay han hoosu haay giigta.
Been tuuna afreeba.
29 Ani bariiyook w'adaati adgirani.
Laakiin afa hawsooteeb baabiyuuk Ukwaasana rhan.
Baruuh <Hisaabook d'iyaa!
Yaaguub daayiina tari amaagna naat han baadiya.>
idiheeb.
30 Baabiyook whaash m'ageert harriiweet toona akteen.
Laakiin aniib isanama naanhooy tigwhara.>>
idi.
31 Yaaguub <<T'arteek akruurii hoosu tiniina adiit amrakwaay hook.
32 Laakiin bariiyaak isanama geeb itmariini nafar gaal han daayiiniyeek,
been baruuh ituudir indi.
Y'ayaydaak baadehiiba,
naat bariitook geeboon marriyeek yaksaa.>>
idi.
Yaaguub laakiin Raaheel isanama yaksaat tiiktiyeet toona kiikan.
33 Laabaan Yaaguubiib oogaw shuumiyaayt isanama yhariw.
Leeyahaay oogaw shuumiya,
tikishiya timalooti gaw shuumiya,
laakiin kasseeyooh naat han miraab kiiki.
34 Raaheel oont'a isanama yakistaayt ukaami kwooreeb daastaayt kehii tis'a.
Laabaan oogaw kassooh daayiib hooy yhariw laakiin masi naat han miraab kiiki.
35 Raaheel <<Baab,
hoosu baahasaaya,
ani baruuk haayee asa kaangad,
m'ati idir abari.>>
tidi.
Masi baruuh sanama ugawiib yhariw,
laakiin naat han miraab kiiki.
36 Yaaguub winneet hasaay akay,
<<Ani naat maag gwibbaabi?
Naanhooy w'amaag takiit tinshiikaheeb?>>
idiit Laabaan raatiya.
37 Baruuh masi <<Baruuk aniit teeda kasteeh fattashta,
bariitookna naan hooy timriya?
Naat miraab tikatiyeek,
oon oomhiin bariiyuuk uudehaywa w'aniibwa baadehiiba oon oomhiin suuroon daasa,
baraah ibitkeen bahadiidiin.
38 Ani tagwuugw hawla geebook shagaaman.
Ureewook gaat han hooy eefiraay gidaat kitti,
hoob han aree hooy tamaab kaaki.
39 Ureewook karaay tari b'ashoot soodraa b'eeb han haay y'aayook kaaki.
Gaat han hooy kwidhtiyeek baruuk tiskwisaheeba.
Masi ureewiib gaat han hawaad tari b'eeb hooy atgwhiraat tiikatiyeek,
<Kwisiya!>
tiidaheeb.
40 Ani oomb'i duuf ituudir,
whawaad mikw'araabwa sehariibwa ituudir.
41 Tagwuugw hawla bak geebook ahagit.
Eeneeb tamna fadhig hawla t'arteek imiiri jillaay shagaaman.
Asagwir hawla aree bariiteek t'anoowwa teeyawwa imiiri jillaay shagaaman.
Been oodoor baruuk aniib w'ijaar shiishalkee giigta.
42 Ukwaasana kassuuh rankwiyeeb,
Ibraahiimwa baabu Isehaagwa y'ibidneeb geebu biihaayeek,
baruuk neekalt anu giigsiheeb tiida.
Laakiin Ukwaasana igwirhaayi rhiya,
ishaga idaayaneeb rhiya.
Afa aree baruuk afray sakaab tiiktiyeeb sooya hook.>>
idi.
Yaaguubwa Laabaanwa waadiyaab id'iin
43 Laabaan Yaaguubii dehaay,
<<Taam'a aniit arita,
y'ar aniiba,
uureew aniibu.
Uun baruuk rhitniyi kassuuh aniibu.
Uun baruuk tibariyeeb uumraay kassuuh aniibu.
Laakiin t'arti tari y'areehna kak awariyeeb kaakan.
44 Oont'a baruukwa aneebwa galad nid'a.
Malya ugaladi kehii baadehiib ikatiin wawin awi taktaki kehii niidbil.>>
idi.
45 Yaaguub win awi yakisiyaayt y'atim.
46 Y'ayaydeeyooh dehaay,
<<Aweeb dibilna.>>
idi.
Aflaay baraah aweeb taktaki kehii idbilna.
Been oomhiin hiddaab m'ariit tamiyaan.
47 Laabaan y'awi taktaki kehii dabal <<Yagar Sahaduutaa>> iisim.
Yaaguub laakiin <<Jal'eedb>> iisim.
48 Laabaan Yaaguubii dehaay,
<<Uun y'aweeyi koom aneebwa barookwa amsi baadehiyoon ikati.>>
idi.
Oon usabbii aree,
<<Jal'eed>> itoosaam.
49 Laabaan han <<Uun y'aweeyi koom,
hinin mhallaan nimsaggiyihoob,
Ukwaasana ingw'iid hoon miyaadi.>>
idi.
Oon usabbii aree,
been whaash <<Misfaat>> itoosaam.
50 Malya Laabaan <<Baruuk aniit t'arit amaag tiwariyeek,
tari m'at warit tind'iireek,
ani karhan hook laakiin Ukwaasana rhiini hook baabaadhiina.
51 Uun y'aweeyi koomwa,
uun w'awi uuwinwa ibitkeen sh'aniit akay daasaaba.
52 Uun y'aweeyi koom ibitkeen alaamaat ikati.
Baruuk oon y'aweeyi koom tilaltiit maagtii baakitimaheeb,
ani han maagtii kaakitim hook.
53 Ibraahiimwa Naahuuriib Ukwaasana,
bareeyooh yhoobi Kwaasana,
ibitkeen bayhikim.>>
idi.
Aflaay Yaaguub ubaaba Isehaag y'ibdeeb Ukwaasana w'atrakwkwiyaanaay halafooya.
54 Malya Yaaguub reew Ukwaasanaayt karaamaateeb irbaayi haashiib karaamaat yharidaayt,
y'ayaydeeh m'ariitii dehaay waliikiya.
Been whawaad aree baraah beentooy naayaan.
55 Tooyin tumalya Laabaan t'arteehwa y'areehna salaamiya,
idehar,
malya whaashooh y'agar.