Yaaguubiib y'ar
30
01 Raaheel ar kitbari akay winneet Leeyahaay kehii giiraat tiibri.
Malya batuuh,
<<Ar iyaawheeb batdiyeek,
ani ishuuki idaar andi.>>
tidi.
02 Laakiin Yaaguub batiiyooh dehaay hasaay akay,
<<Ani Kwaasanaab han?
Oofiraay yhanbiyook Ukwaasana.>>
idi.
03 Raaheel <<Toon tukishiyaati Bilhaab abikaa,
ar hooy firiya,
malya ani y'ar hooy iyaay andi.>>
tidi.
04 Malya Raaheel Yaaguub Bilhaab tisid'ir.
05 Bilha tinkwiit oor tifri.
06 Raaheel w'oor Daan tiisim.
Batuuh <<Ukwaasana aniit toosileel imaasiw,
baruuh ani kehii gaadiibuuyt yhakim,
oor yhiiheeb.>>
tidi.
07 Malya Yaaguubwa Bilhaabwa weer oor ifriina.
08 Raaheel <<Ani tukwaatu akraab am'alaag,
malya laakiin agrib.>>
tidi.
Oon usabbii,
w'oor <<Naftaali>> tiisim.
09 Leeyah shaawti ar bitfaryeet toona tikanihoob,
Yaaguub tukishiyaatooh Silfaab tisid'ir.
10 Baraah oor aree ifriin.
11 Leeyah <<Ani sidik maseeti!>>
tidi,
w'oorooh <<Jaad>> tiisim.
12 Leeyahiit tukishiyaawwa Yaaguubwa weer oor ifriinihoob,
13 Leeyah <<Ani oont'a winneet afirhaati.
Kastaah taam'a aree <Firhaat> waliikiinheeb iyadna.>>
tidi.
Oon usabbii,
w'oor Ashiir tiisim.
14 Igamhi waaki door,
Raa'oobiin tudir'a ibi.
Ooreeri hindia ituusim gadam imriit toondi Leeyahaab yhii.
Raaheel Leeyahaay dehaay,
<<Oon whindi firaayii shalikna hooy hiheebi!>>
tidi.
15 Laakiin Leeyah <<Batuuk aniib ootak tigwharii,
beet tuuna masi mhaatook kitti han?
Oont'a aree w'ooriyu whindi firaay harriiwii han?>>
tidi.
Raaheel masi <<Daayiitu,
amsi whawaad Yaaguub geebook diwsii,
aneeb aree whindi firaay hiiheebii.>>
tidi.
16 Been whawaad Yaaguub tudir'aatii eeyanihoob,
Leeyah bariiyooh ashuushiib tifir'a aree,
<<Baruuk amsi whawaad ani geeb diwi tindiya.
Amsi barooh w'ooriyu reeri hindi gadamii dilba ahaatookti.>>
tidi.
Been whawaad baraah hiddaab diwiyaan.
17 Ukwaasana Leeyahaayt toosileel imaasiwaayt oor ayyaab yhii.
18 Leeyah <<Yaaguub tukishiyaatu asid'ir akay,
Ukwaasana rayiisiyaheeb.>>
tidi.
W'oor Yassaakir tiisim.
19 Leeyah masi tinkwiit Yaaguubii dehaay oor asagwiraab tifri.
20 Batuuh <<Ukwaasana winneet daayiina yhiiheeb.
Oont'a utaku asagwir ar dehaay afri akay winneet daayiib iiwariheeb indi.>>
tidi.
Been w'oor Sabaluun tiisim.
21 Malyaab Leeyah oot tifri,
Diina aree tiisim.
22 Ukwaasana Raaheel sh'iya,
toosileeltooh isnaakir,
ooyaam dehaay ingil.
23 Raaheel tinkwiit oor tifri.
Malya batuuh <<Ukwaasana oonfir hoosu giigsiya.>>
tidi.
24 Batuuh w'oor <<Yuusif>> tisim.
Masi aree <<Ukwaasanaay dehaay sileeli andi.
Ukwaasana weer oor iyaawheeb indi.>>
tidi.
Yaaguubwa Laabaanwa
25 Raaheel Yuusif tifriyeenaay har'ii,
Yaaguub Laabaan uduuraay dehaay,
<<Oont'a shaawti fidga d'iyaheeb ani whaashu iibi andi.
26 Bariiyook whii dehaay shagaamaneeb teem'atwa y'areewwa shaawti hiiyyaheeb,
aflaay ani giigi andi.
Akra shaga dehook shagaamaab akatiyeet toona baruuk tikteena.>>
idi.
27 Laabaan laakiin bariiyooh dehaay,
<<Baruuk sidik anii araaw tikatiyeek tooy s'aa.
W'ankwana bariiyook sabbii baarakiyaheeb.
28 Naan harriiwa?
Toona baruuk harriiweet iyaaw hook andi.>>
idi.
29 Yaaguub <<Ani kak akraab dehook shagaamaneeb rhitaa,
ureewuuk ani geeb guudiya.
30 Ani y'aab baakaay shalik reew tiibriya.
Laakiin W'ankwana ani shagaamaneena kastooh dehook baarakiya.
Oont'a laakiin ani shaawti indhiwaayi dehaay shagaami andi.>>
idi.
31 Laabaan Yaaguubii dehaay,
<<Naan aniiw hooka?
Naan harriiwa?>>
idi.
Yaaguub <<Naat baahiiwheeb!
Gaana bas deha tankwiikweek,
ureewook dehook iishkwi andi.
32 Amsi ani bariiyook ooreewi bitik hiireersaheeb.
Malya teen'aywa t'anoowwa kwiluuliyaat kehii eefeeneet tari t'eerkabaawwa,
yhu yhadalaawwa hooy wawaasa.
Aan baraah anii ijaar ikatiin.
33 Ani nhas gin'ii dehook shagaamiyeet toona iikan tindiya.
Hallaay shibiba,
ureewii gaat han kwilaaliit baabariit tari eerkaabt baakaay hooy eefeeneek shibiba,
tari yhu hadaalaab baakay eefeeneek han shibiba.
Een biikaayneek aflaay gwiharti reewi.>>
idi.
34 Laabaan <<Tuun daayiitu>> idi.
35 Laakiin been oomb'i Laabaan eebak kwilaaliyaat iibriin tari y'eerkab wawaasiya,
teeya tikwiluuli iibriint tari t'eerkab tari eeraana kehii tiifiyeet wawaasiya.
Kasseeh y'argina yhadala hooy waasiyaayt y'areeh isigw'ad.
36 Malya baroohwa Yaaguubwa eebtik mhayt yina sakamtiit masaafa hooy isgi.
Yaaguub aree Laabaaniib ooreew ishaakw.
37 Yaaguub mhay hooyi hindiyi l'iid ikit'a,
ushadhiidh eeraat kwiluuliitwa shartiitwa kehii y'aalim.
38 Malya baliit tikwiluuliiwwa tishartiiwwa taayaawwa t'anoowwa rhiini mhiin yami dirkwi daraag daasiya.
Uureew nigraa yami gw'ii dehaay y'iiniyeek,
rhiini jillaay udirkwi daraag daasiya.
Uureew beentooy oosamiyaan.
39 Beet tikwiluuli tari tisharti suurii haayee,
uureew taktak oosiyaan akay,
uufraay kassuuh shartaat tari kwiluuliyaat kehii haayee ifreena.
40 Yaaguub yhu ooreewii wawaasiya.
Ooreewi suurdaba Laabaaniit teeya t'eerkabaawwa tehadalaawwa beeti naksi.
Malya baruuh ooknaay dehaay reew wawaasiya aree Laabaaniib ureewiib shaawaab kiiki.
41 T'anu t'akraat oosamiinihoob,
been ool'iid tikwiluuli tari tisharti kehii tiifiyeeb suurii daasi.
Aflaay bataah ool'iidi daraag oosamiin.
42 Laakiin baruuh,
oodoor uureew inhawi oosamiyeeb been ool'iid suurii kadaasiya.
Aflaay Yaaguub ooreew w'akraab iibri.
Laabaan aree ooreew oonhaw iibri.
43 Yaaguub oont'a winneet gaba tak iki,
gwidaat anootwa,
yaatwa,
kamwa,
makwa id'i.
Gwida kishiya han id'i.