Yaaguub Laabaaniib oogaw iktim
29
01 Yaaguub usalalooh abkee Haaraani haash iktim.
02 Baruuh beentooy reet umingaayiib anooteega anooteesooh waar'aab oodar imb'ee rhiya.
Mhay hooyi reew toori kwalala.
Tuuri wawin aweeyee assamaati.
03 Kassuuh uureew immararaayihoob,
y'anooteega w'awi tooreeti kehii iifiib kwaaleelsiyaan.
Uureew gw'iyanihoob,
y'anooteega w'awi tooreeti kehii y'agirna.
04 Yaaguub y'anooteega raatiya,
<<Yhaana,
baraak keeya haashii y'aabaana?>>
idi.
Baraah <<Hinin Haaraanee y'aaba.>>
idiin.
05 Malya baruuh han masi raatiya,
<<Naahooriib w'oori oor,
Laabaan tikteenna?>>
idi.
Baraah <<Awooh nikteen.>>
idiin.
06 Yaaguub <<Baruuh kak eefi?>>
Baraah <<Baruuh daayiib eefi.
Tooy t'ootuuh Raaheel t'anooti geeb eetni.>>
idiin.
07 Yaaguub bareeyooh dehaay,
<<Tuuyin masi tageegaatu,
ooreew baahimnaasaana,
ooreew gw'asaanaat oosiyaami mhiin beeti agirna.>>
idi.
08 Baraah <<Toon toona ka'adgirna,
uureew kassuuh ammararaayiit w'awi tooreetii kwaaleelsinayeeb ookiik nhagit.
Malya ooreew gw'asni niyad.>>
idiin.
09 Yaaguub masi bareeh anfaraadee,
Raaheel ubaabaayt t'anooti geeb toori eeta.
10 Yaaguub aree uduura tundeeti san Laabaaniit oot Raaheelwa,
Laabaaniit t'anoowwa rhiyanihoob,
w'awi tooreeti kehii iifiib kwaaleelsiyaayt uduuraayt anu gw'asiya.
11 Malya baruuh Raaheel shoobiya,
firhaatee aree winneet waawiya.
12 Baruuh,
toodira Ribeekaay oor iiktiyeet toona Raaheel sooya.
Oont'a batuuh dhaabtaayt ubaaba sooti.
13 Laabaan een yhabar imaasiwihoob,
Yaaguub tukwaati oori ashuushiib dhaabiya.
Baruuh Yaaguubiib yhalabaayt salaamiya,
malyaab ugawooh haay ibi.
Yaaguub han tikeenaaka dehaay hadiidiya.
14 Laabaan <<Baruuk kwaatiyoon oorwa,
aniib dhiwaayee gaalwa.>>
idi.
Yaaguub Leeyahwa Raaheelwa id'ir
Tirig gaal Yaaguub beentooy is'at har'ii,
15 Laabaan bariiyooh dehaay,
<<Baruuk anii ayaay tak tikatiyeet toonaati sabbii,
ijaar anu geebu shagaamtiniya?
W'ijaar wharriiweeb sooyaheeb.>>
idi.
16 Oont'a Laabaan maloot arit iibri.
T'oor toowinkaat Leeyah iidna,
toodiskaat aree Raaheel iidna.
17 Leeyah aagw'ad afreeyaa iifiin.
Laakiin Raaheel winneet daawri mingideetu aree daawriiti.
18 Yaaguub Raaheel areeya akay bariiyooh dehaay,
<<Baruuk Raaheel tisid'iireetu,
asaramaat massi balaashii dehook shagaami andi.>>
idi.
19 Laabaan <<Ani weer asid'iireenaatiika barook aniiweet hanyiis.
Tooy geebu daayaa!>>
idi.
20 Yaaguub asaramaat massi Raaheeli d'ari jillaay Laabaanii dehaay shagaamiya.
Laakiin baruuh t'oor kehanaa iifi akay yhawla shalikt yina dehaay ikeen.
21 Malya Yaaguub Laabaanii dehaay,
<<Aflaay tutakatu hiyaheeba,
y'asarama hawla faayamiyaan!>>
idi.
22 Oont'a Laabaan aduumaat id'i,
kasseeh ishawweeh waliikiya.
23 Laakiin been whawaad eeyanihoob,
Laabaan t'ootooh Leeyah Yaaguubii dehaay haay eeya.
Yaaguub batooh id'ir geeb diwiya.
24 Laabaan han Leeyahaab kishiyaat Silfaab iidneet yhii.
25 Tooyin tumalya Yaaguub Leeyahaab d'iraab iiktiyeet toona ikan.
Malya baruuh Laabaan raatiya,
<<Naanhooy bak saktaa?
Naanhooy tiitilaheeb?
Ani Raaheeli harawaay kassooh ushaga daayaab kaaki han?>>
idi.
26 Laabaan <<Hineeb whaashiib t'oor tuuwin hankaab nisid'iir.>>
idi.
27 <<Baruuk toon idoobeet asarama hassaa,
malya aree t'oor toodis niyaaw hook niyad.
Toon han laakiin asarama hawla dehaay shagaami tindiya.>>
idi.
28 Yaaguub een ibhali hooy dhibiya.
Asaramaat gaat Leeyahaay geeb id'i.
Laabaan masi Raaheel t'ootooh Yaaguub isid'ir.
29 Laabaan tukishiyaatooh Bilhaab,
Raaheel yhii.
30 Yaaguub Raaheeli geeb diwiya.
Baruuh batooh Leeyahaayka areeya.
Masi Laabaanii dehaay asarama hawla warib shagaamiya.
31 Ukwaasana Yaaguub Raaheel Leeyahaayka areeyakaab iiktiyeet toona iktiin akay Leeyahaab firaay yhii.
Raaheel laakiin firaay hiiyyaab kiiki.
32 Leeyah oor tifri,
barooh Raa'oobiin tiisim.
Batuuh ugarooyooh dehaay,
<<Ukwaasana aniib igadab hoosu giigsiya.
Oont'a utaku aneeb Raaheeli mhakwal areeyiheeb indi.>>
tidi.
33 Leeyah weer oor han tifri,
barooh Sim'oon tiisim.
Batuuh ugarooyooh dehaay,
<<Utaku bii'areeyayeeti toona W'ankwana imaasiwheeb.>>
tidi.
34 Leeyah oor mhayaab tifriyihoob,
batuuh <<Oont'a utaku daayiib y'ibikeheeb indi.>>
tidi.
Oon usabbii,
w'oor Laawiib tiisim.
35 Masi batuuh oor weer tifri,
oon aree <<Yahuuda>> tiisim.
Batuuh <<W'ankwana ahamid!>>
tidi akay oon oosim tiisim.
Shaawti giduudiit tiki.