Isehaag Yaaguub Laabaan ookiik giigsiya
28
01 Isehaag Yaaguub waliikiya,
malya idehar:
<<Takat Kan'aaniit baad'iira.
02 Hoobook Beetehuul,
Baddan Araameeb eefeeb beeti giigaa!
Been tooysii,
duurook Laabaaniit t'arteeb gaat hooy waasaat d'iraa.
03 Ukwaasana W'akra babaaraki hook,
gwida firaay ba'iiyaaw hook.
Aflaay winneet akra dehay kwaasiit hook,
gwida dehayaayi hooba ba'iikwasi hook.
04 Ukwaasana Ibraahiim baarakiyaneet tibaraka iyaaw hook indi,
y'araak han baarakamaab ikatiin.
Aflaay oon whaash Ukwaasana suur Ibraahiim yhiyeeb,
oont'a na girbaab akay hooy teefeeneeb,
kwasaami tiyadna.>>
idi.
05 Isehaag malya Yaaguub Baddan Araam beeti ifdig id'i.
Ribeekaay Yaaguubwa Iisaawiit tuundi oosan Laabaani geeb iist'a jillaay giigsiya.
Laabaan Beetehuul W'araami ooriibi.
Iisaaw Ismaa'iiliit oot id'ir
06 Iisaaw masi Isehaag Yaaguubi oor ubaaba ideharaayt takati harawaay Baddan Araam beeti diigwatiyaneet toona imaasiw.
Yaaguub w'ooriyooh dehaay,
<<Takat Kan'aaniit baad'ira.>>
idi.
07 Yaaguub han ubaabaawwa toondeewwa isnaakiraayt,
Baddan Araam ibayeet toona imaasiw.
08 Iisaaw,
ubaaba Yaaguub Kan'aaneet taam'a winneet ribaab iiktiyeet toona ikan.
09 Shaawti Iisaaw giigiyaayt Ismaa'iili Ibraahiimi ooriit oot Mahlaat iidneet id'ir.
Mahlaat aree Nabaayootiit kwaati.
Baruuh suur han m'at warit iibri.
Yaaguub Beet Eeleeb hawsooya
10 Yaaguub Barsheebaab hooy giigiyaayt Haraan ibi.
11 Haash gaal iktimihoob,
tuuyin dhibtanihoob,
aweeb ugirmaay whii id'iit diwiya.
12 Hawsooteeb baruuh tibireetee toobuut iiktim sillim rhiya.
Ukwaasanaay malak aree been usillimi kehii astiiwwa n'atiiwwa iid rhiya.
13 W'ankwana usillimi kehii ingad.
Ukwaasana,
<<Ani Ukwaasana,
Ibraahiimwa Isehaagiibwa Ukwaasana.
Ani barookwa y'areekwa whaash oon baruuk kehii diwaab tikatiyeeb iyaaw hookna andi.
14 Bariiyaak y'ar whaashi haddiib iiktiin iyadna,
uyindhibwa,
uyintalawwa,
oos'iidwa,
tugiblaawwa kasteeh tijhaateeb itbirir iyadna.
Barookwa y'areesookwa uudehay kassuuh baarakami iyadna.
15 Ani geebookna eefi,
giigteena mhiiniika aree iigw'ad hookna andi,
oon whaash kirafi haay y'i hookna andi.
Uwaadiya geebookna abkeeb faaysaniyeeb ookiik kaa'ish hookna.>>
idi.
16 Yaaguub tin'ariitii ib'arihoob,
<<W'ankwana sidik oon oomhiin eefi,
laakiin ani kanaab kaaki.>>
idi.
17 Yaaguub irkwi,
<<Oon oomhiin mirkwaay eefi.
Baruuh ibakii Ukwaasanaayi mhiin ikati,
baruuh ibkii tibireeti dheefa ikati.>>
idi.
18 Yaaguub tooyin tumalya w'awi kehii diwiyaneeb yaksiya,
aree sileelti mhiin ikwaas.
Malya been w'awi y'atim aree Ukwaasanaay miyaaw akay saytuuni saliit kehii ifif id'i.
19 Been oomhiin baruuh <<Beet Eel>> iisim.
Oonaay suurii laakiin been uumhiin <<Luus>> atoosmaabi.
20 Yaaguub akraab waadiyaab Ukwaasanaay dehaay y'abik,
<<Ukwaasana geebu daayiiniyeek,
malya na eebiyi salaliika ingw'iideetu,
m'ariit na iniiweetu,
halaakaab na iniiweetu,
21 shaawti whaashi asgaa angiireetu,
aflaay W'ankwana Ukwaasanaayu iikati indi.
22 Uun w'awi ani w'aamuudiit atmeeb gawook iikati indi,
kassooh oomraayii tutamnaat takwi dehook iifir'a andi.>>
idi.