Ibraahiimiit tooyat
25
01 Ibraahiim takat weet Gatuura iidneet id'ir.
02 Ibraahiim batiiyooh Simraanwa,
Jakshaanwa,
Madaanwa,
Miidyaanwa,
Yashbaakwa,
Shuuhaawwa hooy ifri.
03 Jakshaan,
Sheebaabwa Dadaanwa ifri.
Dadaan aree Ashuuriimwa,
Latuushiiwwa,
La'ummiimwa ifri.
04 Miidyaan aree Eefaabwa,
Eefarwa,
Haanookwa,
Abiid'aabwa,
Eeld'aabwa ifri.
Aan baraah kassaah Gatuuraay ara.
05 Ibraahiim kastooh toona tu'iibriyeet Isehaagii dehaay y'ish id'i.
06 Laakiin baruuh masi dhhaniibi akay Haajirwa Gatuuraaywa iibriyeeb y'ar han gwida miyaaw iyiw.
Malya Isehaag hooy iifiyeeb umhiinii oomhi ookiik bareeh giigsiya.
7 Ibraahiim sheebwa asarama tamuunwa ay hawla id'i.
8 Ibraahiim eegrim akay iya.
Shaawti indhiweeyooh geeb itoobaas.
09 Y'araah Isehaagwa Ismaa'iilwa Maakfeelaay w'amariib Maamar dawil mhiin ubaaba ibisna.
Eefrooniit tudir'aatiib ibisna.
Eefroon Suuhar Yhiitaayeet tugabiilaati ooru.
10 Ibraahiim Yhiitee idlib iyhaneeb whaashiib tutakatuuh Saara hooy titoobaaseeb oomhiin baruuh han hooy itoobaas.
11 Ibraahiimiit tooyatti har'ii,
Ukwaasana Isehaag w'oorooh baarakiya.
Baruuh been oodoor Beer Laahaay Rooyi dar ikwiir.
Ismaa'iiliib y'ar
12 Aan baraah aree Ismaa'iiliib y'ara.
Ismaa'iil Ibraahiimwa Haajiri ooru.
Haajir Tumasri,
Saaraayt kishiyaatu.
13 Ismaa'iil tamna malu ar iibri.
Baraah aree:
Nabaayoot suurkinaabu,
Geedaarwa,
Adab'iilwa,
Mibsaamwa,
14 Mishmaawwa,
Duumaawwa,
Maassaawwa,
15 Hadaadwa,
Teemaawwa,
Yatuurwa,
Naafiishwa,
Geedmaawwa ittiyoodiin.
16 Ismaa'iiliib y'ar itamna malu gaalka gabiilaati suurkina akay iifiin.
Bareeyooh har'ii yhash dehaay soomamiyaan.
17 Ismaa'iil sheebwa mhay tamuunwa asarama hawlaab id'iit iya.
Indhiweeyooh geeb itoobaas.
18 Ismaa'iiliib y'ar Hafiilaay Shuur ookiik,
oon whaash eebtik ikwriina.
Shuur Masreet toosil dawil mhiinu,
Aashuur beeti iifi haashu.
Baruuh isanaayeeh eeraw kasseeh ashooshamiya.
Yaaguubwa Iisaawwa
19 Aan baraah aree Isehaagiit dirriyaatu.
20 Baruuh Ribeekaab id'irihoob,
fadhig tamuun hawla iibri.
Ribeeka Beetehuuliit ootu,
Laabaaniit kwaati.
Beetehuul W'araami,
Baddan Araamee y'aabu.
21 Isehaag tutakatuuh Ribeeka ar masi kitbari akay,
W'ankwanaay dehaay sileeliya,
<<Ribeekaab firaay hiya.>>
idi.
W'ankwana han bariitooh toosileel imaasiw.
22 Ribeeka tinkwi,
tiitaab aree oof'iib haay hissiita.
Aajna uyaamiib taktak kootiyaan akay tiitaab iiktiineet toona batuuh tikan.
Malya batuuh <<Naanhooy tuun deha tikati.>>
tidiit W'ankwana raatamta.
23 W'ankwana batiiyooh dehaay,
<<Itiitaayaak imalu,
Gaalka gabiilaat iiktiin iyadna.
Tugabiila tuungaat akrakaat iikti tindi.
Usuurkinaayt gabiila oodisnaayt gabiila kishiyaasi indi.>>
idi.
24 Ribeeka tifriyihoob,
tiitaab tifri.
25 W'oor usuurkina adaroob,
adari hamooyeeb akay ifri,
kassuuh ubashar hamooyi halaakiit hamooyu.
Oon usabbii,
Iisaaw isimna,
whamooyi miyaadu.
26 Oonaay har'ii ifreeb uusan w'ayiisooh Iisaawiib itiigas abkaa ifri akay Yaaguub isimna.
Ribeeka een y'ar tifiirihoob,
Isehaag asagwir tamuun hawlaab tiibri.
27 Y'ar aflaay yhameena.
Iisaaw aree winneet fagar shookana iiktika mingaay y'abik.
Yaaguub laakiin daayiib thathamiyaayt is'a,
reewkinaab iki.
28 Iisaaw tidhhaniya tishookiyeet daariit ubaabaay dehaay haay y'i,
ubaaba han winneet barooh areeya.
Yaaguub laakiin tuundi Ribeeka winneet areeti.
29 Yint gaat Yaaguub m'ariit tikwiyee,
uusan Iisaaw hargwaa imingaayii eedhiwa eeya.
30 Baruuh Yaaguubii dehaay,
<<Beet tum'ari t'adarootii willa naat hooy hiyaheeba,
winneet hargwaabu!>>
idi.
Toon toonaatii dehaay baruuh han Adoom ituusim.
31 Yaaguub bariiyooh dehaay,
<<Usuurkinaay whaggook aniib diliba!>>
idi.
32 Iisaaw aree <<Shibiba!
Ani hargwiit tidirheeb.
Usuurkinaay hag aneeb naan rayiisiiniheeb?>>
idi.
33 Laakiin Yaaguub <<Awwal deha halafooya.>>
idi.
Baruuh han dehaay halafooya,
usuurkinaay whag Yaaguubii dehaay iidlib.
34 Toon toonaati har'ii,
Yaaguub barooh hadhiibwa lamt adasiitwa yhii.
Baruuh aflaay tamiya gw'iya,
malya yakiyaayt giigiya.
Shaawti Iisaaw toofrayti whaggooh abaabiya.