Isehaagwa Ribeekaabwa
24
01 Ibraahiim oont'a winneet eegrimamiya.
Ukwaasana barooh gaba tak kwaasa iifi,
teena tishagaamiyeet winneet hooy ansirami.
02 B'eeb gaal Ibraahiim winneet aamaniyi kishiyaayooh oowwin waliikiyaayt,
<<Oont'a waadiyaab deha abikaa!
03 Baruuk aniib w'ooru Isehaagii dehaay een indhiwa geeb neefiyeeb Kan'aani haashii takat dehaay batehariiweet toona halafooya.
Ukwaasana toobuutwa teebireewwa kwaasaanaay simii halafooya.
04 Laakiin aniib whaashwa y'ayaydeewwa baya,
malyaab beentooysii Isehaag takat dehaay miriya!>>
idi.
05 Ukishiya barooh raatiya,
<<Tutakat malya whaash oon hinin hooy neefiyeeb kaabi tindiyeek,
kak niwari?
Isehaag beentooy takat harriiwi jillaay giigsani han?>>
idi.
06 Ibraahiim <<W'ooru beentooy door han baagiigsaa!
07 Ukwaasana teebiri kwaasaab aneeb dhiwaayeesoowwa y'ayaydehayiisoowwa tooy haay eeyaheeb.
Malya na galad deha shuumiya,
<Y'areek oon whaash iyaaw andi.>
idiheeb.
Baruuh uukna malaktaayiib suurook iifdig indi,
beentooy aree takat w'ooriyu dehaay imaar tindiya.
08 Tutakat geebook tooy w'aay tinriibeek,
baruuk toon tehalafooy t'aniit haay baashagaamaa.
Laakiin w'ooru door han beentooy haay baagiiga.>>
idi.
09 Aflaay ukishiya toona Ibraahiim sooyaneet kastooh tankwiikweet toona halafooya.
10 Shalik doori har'ii ukishiya tamin kam w'ankwanaayeeh iiyhaayt giigiya.
Daayiinaaka baruuh iibriyeet ukishiya haay giigiya.
Baruuh Naahuur Ibraahiimiib usaniit madiina whaash Araam Nahaariimiib tiifiit ibi.
11 Eekam tumadiinaati kwayaay tiifiit reeti dar ganafiya.
Oodoor beeb tuuyin dhibaa tiifi,
taam'at toori iiwir'ani door akay iifi.
12 Baruuh siileeliya,
<<Yaa W'ankwana,
Ibraahiim w'ankwanaayu Ukwaasana ansiraaheeba!
Oon amsi Isehaagii dehaay takat simaraheeb!
13 Shibiba,
ani oont'a een iyami thawi geeb angadi.
Tumadiinaati dehayiit arit yami harawaay y'eena.
14 Ani gaat bateesooh yam gw'iib raatami andi.
Yam tiniiweeti,
eekam na deha gw'astiniyeek,
malyaab tuun batuuh ikishiyaayook Isehaagii dehaay haydaab tikatiyeet tutakat batooh tikatiyeet toona iikan andi.
Aflaay baruuk w'ankwanaayu geeb abkaab tiiktiyeeb ugalad faayistaneet toona han akteen.>>
idi.
15 Baruuh toosleel faaysaab baakaay,
Ribeeka yami gidir wharkaay kehii fiyakee tikwibar eeta.
Batuuh Beetehuul,
Milkaay ooriit ooti.
Milkaa Ibraahiimiib oosan Naahuuriit takati.
16 T'oor winneet daawriitu,
adhamiitu oonaay suurii tak han katim kiiki.
Batuuh iyameet suuri tikwtaay eeta,
tudaatooh yameestaayt masi reewta.
17 Ukishiya batiiyooh dehaay dhaabee eeyaayt,
<<Yam gw'asiiheebi!>>
idi.
18 Batuuh <<Winneet gw'aa,
duuruun!>>
tidi.
Willa oogidir y'ayi kehii tiyimt gw'asti.
19 Batuuh eeyam gw'astaayt har'ii,
<<Eekam han eel'aneeb ookiik dehook gw'asi andi.>>
tidi.
20 Batuuh ugidariib iifiin eeyam willa udirkwiib tifif,
toori ookiik dhaabta,
gwida yam tigaalil aree kasseeh ikameeh gw'asta.
21 Uutak bhaliib anu batuuh tiid'eet toona iishbib.
Malya tuun batuuh Ukwaasana haydaab ikatiyeet bitkaayeeb iishbib.
22 Aakam gw'iyaani har'ii,
uutak dim'araay faay ay giramwa tarab y'iibwa,
malu kwilal gaalka ay tamuunwa ay giram y'iinwa ifir'at t'oor yhii.
23 Malya batooh raatamiya,
<<Batuuk aayiit ootuwii?
Sooyiiheeb.
Indhiwaayeekna shafat amsi hooy naanayeet hooy teefee?>>
idi.
24 Batuuh <<Ani Beetehuul Naahuuriit oot Milkaay faraaytu.>>
tidi.
25 Masi batuuh <<Eekam gwida alafwa aggaabwa dehaay nibari,
baruukwa geebook eefeenwa hooy naateeni mhiin han nibari.>>
tidi.
26 Oont'a uutak kuuramiyaayt Ukwaasanaay dehaay siileeliya.
27 Baruuh <<W'ankwana Ukwaasana,
Ibraahiim w'ankwanaayu Ukwaasana ahamid.
Baruuh w'ankwanaayu dehaay tudaayiinaaywa tooshiboowwa singadaab kiiki.
Aneeb aree w'ankwanaayu dhiwaayi salal is'abikeheeb.>>
idi.
28 T'oor dhaabtaayt,
toondeeti dhiwa beet toona soota.
29 Ribeeka san Laabaan iidneeb tiibri.
Uusan aree ootak eeyami mhiin iifiib ookiik dhaabiya.
30 Baruuh iginfi faaywa eekwilalwa tukwaati ayeeb rhiyanihoob,
Ribeeka tiideeb ibhali maaswaabuuyt ootak ookiik idif.
Ootak iyami mhiin ikameesooh gadee rhiya.
31 Laabaan <<M'aa barook Ukwaasana deharaayooku.
Naanhooy tooy tingadiya,
ani oogaw suur akay asoomir.
Eekam han mhiin dehaay asoomir.>>
idi.
32 Aflaay uutak oogaw geeb idif,
eekam han ganafiya.
Eekam siyaamwa yamwa dehaay haay eeyaan.
Ootakwa y'araweehwa han yam iragadaayeeh haay iishgwadhneeb dehaay haay eeyaan.
33 Bareeh m'ariit suurii daasiyaana.
Ukishiya laakiin <<Ani ibhali bareek asehariiweeb andiyeeb ookiik m'ariit tami kaadi.>>
idi.
Laabaan <<Aflaay t'eeteek hadiidaa!>>
idi.
34 Uutak <<Ani Ibraahiimi kishiya.
35 Ukwaasana aniib w'ankwana Ibraahiim winneet baarakaabu akay oomraay id'i.
Ukwaasana barooh anootwa sh'aabwa,
dim'araabwa ashteetwa,
kishiyaatwa kishiyaabwa,
kamwa makwa rayiisiya.
36 Barooh umatuuniib Ukwaasana Saaraab tutakatiyooh oor isfar.
Baruuh oomraay w'iibriyeeb kassooh w'oorooh yhii.
37 Aneeb Ibraahiim halafoosiyaheeb,
<Een Kan'aani indhiwa ani geeb akwarriyeeb,
w'ooru takat door han dehaay hooy baahariiwa.
38 Laakiin baabiyu dhiwa,
tugabiilaatu bayaat w'ooriyu dehaay takat hooy hariwa.>
idiheeb.
39 Malyaab ani barooh raataman,
<Tutakat ani geeb w'aay tinriibeek kak awari?>
adi.
40 Baruuh han bak idgi,
<Ani Ukwaasanaay geeb diima ashboob,
Ukwaasana uukna malaktaayiib dehook iifdig indi,
been umalak aniib indhiwaayee w'ooriyu dehaay takat marriyi jillaay iishtam hook indi.
41 Malyaab batooh indhiwaayaah oobeer yheebneek,
shaawti baruuk aniit tehalafooytii afoomaabwa.>
idiheeb.
42 Amsi ani eeyami mhiin y'ani door,
diiseet siileelan,
<Yaa W'ankwana,
Ibraahiim w'ankwanaayu Ukwaasana,
oon amsi Isehaagii dehaay takat simaraheeb.
43 Ani oont'a oon eeyami mhiin gadee aagirt eetniyeek,
yam gw'iib raatami andi.
44 Batuuh aneeb yam gw'astiniyeek,
eekam aree gw'astiniyeek,
aflaay tuun batuuh baruuk w'ankwanaayu oorii dehaay haydaab tikatiyeet toona iikan andi.>
idiheeb.
45 Ani oogin'iisu iideet toosleelti faaysaab baakaay,
Ribeeka yami gidir wharkaay kehii fiyakee uthawii dehaay tikwtaay eeta.
Oogidir yam titibihoob,
ani batooh yam gw'iib raatan.
46 Batuuh willa ugidirooh wharkaay gadehitaayt,
<M'aa gw'aa,
eekam han dehook gw'asi andi.>
tidi.
Ani han gw'an,
batuuh masi eekam gw'asta.
47 Ani <Aayt ootuwii?>
adiit batooh raatan.
Batuuh han <Beetehuuliit ootu,
Naahuur Milkaay ifriyeeb w'oor Beetehuuliiti.>
tidi.
Shaawti ani batiiyooh w'ayiib eekwilal ad'i,
oofaay aree oognuufiib ad'i.
48 Malyaab ani kuuramanaayt W'ankwanaay deha asjidan.
W'ankwana,
Ibraahiim w'ankwanaayu Ukwaasana ahamid.
Ukwaasana uukna Ibraahiimiib dhiwaayi salal is'abikeheeb.
Beentooy aree w'ankwanaayu Ibraahiimiib usaniit oot Isehaagii dehaay amri.
49 Baraak aniib w'ankwanaay dehaay shibootwa amaanaateewwa saki tiyadneek,
oont'a sooyaanaheeb.
Barooh daayiib iiwari tiyadna?
Hana giigiit takat weenaati harawaay yakani?>>
idi.
50 Laabaanwa Beetehuulwa <<Tuun Ukwaasana id'iyeenaatu,
hinin niyadeena kitehaay.
51 Ribeeka tooy teefi.
Ukwaasana idiyeet tunaatiit shaawti w'ankwanaaytook ooriit dooba batiikti,
haay giigaa.>>
idiin.
52 Ibraahiimiib ukishiya een ibhali baraah idiineeb imaasiwihoob,
Ukwaasanaay suurii asjidiya.
53 Malya baruuh halaakaabwa,
dim'araabwa ashteeti mhakwarwa Ribeekaab yhii.
Masi baruuh t'ooti sanwa toondeewwa alyaana yhii.
54 Malyaab baruuhwa aanda geeb iifiinwa tamiyaana,
gw'iyaana,
whawaad beentooy geeb naayaana.
Oomb'i ooraaw ib'arnihoob,
ukishiya bareeyooh dehaay,
<<Oont'a w'ankwanaayu iibiyeet areeyan,
giigsaanheeb.>>
idi.
55 Laakiin t'ootiit deewwa uusanwa <<Ribeekaab asaramaat tari tamint yina geeboon ishaa,
malya giigtini.>>
idiin.
56 Laakiin baruuh <<Shaawti tooy gwidaakaat yina baasoos'anaheeb.
Ukwaasana uukna ishamheeb,
w'ankwanaayu oorii dehaay takat ismarheeb.
Aflaay iibaabat eenay ishna hoon.>>
idi.
57 Baraah <<Hinin Ribeekaab kak saktiniyeeb raatat eenay.>>
idiin.
58 Baraah Ribeekaab waliikiyaaniit raatamiyaan,
<<Oon ootak iitram tindii?>>
idiin.
Ribeeka <<Awooh han.>>
tidi.
59 Aflaay baraah tukwaatoohna Ribeekaab tukishiya batooh sehamaanaati geeb giigsiyaan.
Ibraahiimiib ukishiyaawwa aanda geeb iifiinwa giigiyaan.
60 Baraah Ribeekaab ideharna,
<<Tukwaatuun,
guudii,
alfaab akayii,
y'araak y'ashooyeet timadiina kwasaameen ba'iiktiin.>>
idiin.
61 Malyaab Ribeekaabwa tikishiyaataahwa eekam y'amna,
ootak iramna.
Shaawti ukishiya Ribeekaab iyhaayt giigiya.
62 Isehaag Beer Laahaay Rooy whaashii eeya.
Baruuh Neegeeb iidni haashiib ikwiir.
63 Himniit gaat siileelti jillaay tudir'a beeti ifir'ihoob,
sagi mhiinii daab kami kehii iifiin,
barooh beeti sakee rhiya.
64 Ribeeka han asa tishbibihoob,
Isehaag rhita.
Malya ookaam hooy tikwta.
65 Batuuh ukishiya raatamta,
<<Been uutak beetoon sakiini ungwaabiib eefi aabu?>>
tidi.
Ukishiya <<Baruuh aniib w'ankwana.>>
idi.
Beenhoob batuuh whalaakooh tiyhaayt ifiireeh tikwibis.