Ibraahiim Jarrabamiya
22
01 Shalik doori har'ii,
Ukwaasana Ibraahiim jarrabiya.
Ukwaasana Ibraahiimii dehaay,
<<Ibraahiim!>>
idi.
Ibraahiim <<Ani tooy eefi>> idi.
02 Malya Ukwaasana <<W'oorook ahaa,
gaal oorook Isehaag,
w'oorook w'areetiniyeeb ahaa.
Malyaab Mooryaay whaash baya.
Beentooy anii dehaay ribaab gaalnaay karaamaateeb fir'aa.
Been oorba rhisi hook andi.>>
idi.
03 Karuumaab oomb'i ooraaw Ibraahiim yakiyaayt umeekooh irbi.
Ikishiyaayee maloobwa w'oorooh Isehaagwa geebooh yaksiya.
Gwida hindiib n'eetiib tikaraamaatee dehaay kat'iyaayt,
Ukwaasana sooyaneeb oomhiin ookiik giigiya.
04 Tooyin tumhaya Ibraahiim guugamiyanihoob,
oomhiin sagii rhiya.
05 Baruuh ikishiyaayee dehaay,
<<Tooy umeeki geeb hagitna,
aneebwa w'oorwa beentooy niibi niyad.
Beentooy Ukwaasana abid niyad,
malya agara y'aa hookna niyad.>>
idi.
06 Ibraahiim toon'eeti hindi itikaraamaateeb w'oorooh Isehaagi kehii daasiya.
Baruuh uukna aree toon'eewwa tumananwa yaksiya.
Baraah mhalla hiddaab hiireeree,
07 Isehaag ubaaba bhaliisamiya,
<<Baab?>>
idi.
Ibraahiim <<Ahaa!
W'ooru>> idi.
Isehaag <<Tuun'eewwa yhindiiwwa tooy eefeen,
laakiin w'argin baruuk hirid tindiyi keeya?>>
idi.
08 Ibraahiim <<W'ooru,
Ukwaasana uukna w'argin tikaraamaateeb iyaaw hoon indi.>>
idi.
Mhalla aree hiddaab hiireeriin.
09 Oomhiin Ukwaasana diyaab iiktiyeeb iktimnihoob,
Ibraahiim beentooy karaamaati mhiin id'ir,
yhindi daayiib itaakwikw.
W'oorooh Isehaag yhaakwiraayt been tikaraamaati mhiin yhindiyi kehii daasiya.
10 Malyaab w'oorooh yhirdee dehaay tumanan w'ayiisooh y'abik.
11 Laakiin Ukwaasanaay malaktaayi tibireetee waliikiya,
<<Ibraahiim!
Ibraahiim!>>
idi.
Baruuh aree <<Ani tooy eefi.>>
idi.
12 Baruuh <<W'oori kehii w'ayook baadaasaa,
naat han baaweera!
Baruuk Ukwaasana rankwiyeet toona oont'a akan,
w'oorook oongaal han haay akish kitta,
haay karramamtiib harriiwa.>>
idi.
13 Ibraahiim nakamiyanihoob,
argin id'aayee yhindiyi bitik tabaak rhiya.
Been w'argin w'ooriyooh mhiin W'ankwanaayt karaamaateeb yharid.
14 Ibraahiim been oomhiin <<W'ankwana iniiw.>>
idiit iisim.
Oont'a han uudehay,
<<W'ankwanaay oorbaay ittiyiw tindi.>>
iyadna.
15 Ukwaasanaay umalak Ibraahiim tibireetee t'a han malya door waliikiya.
16 Baruuh <<Ani halafooyaabu,
baruuk toon toona tid'iyeet,
w'oorook oongaal Ukwaasanaay dehaay haay karramamta akay,
17 ani baaraki hook andi.
Y'areek yhaykweet guudsi andi,
w'issi t'iiteena guudsi andi.
Y'araak y'ashooyeeh girbiit whaashoohna hooy iyaay iyadna.
18 Baruuk aneeb tisnaakirheeb akay,
kassuuh uudehay bariisook baarakami iyadna.>>
idi.
19 Malya Ibraahiim ikishiyaayeeh dehaay y'agar,
hiddaab aree Barsheebaab ookiik giigiyaan.
Ibraahiim Beersheebaay is'a.
Naahuuri ar
20 Shalik doori har'ii,
Milkaa han deet tiki.
Batuuh usanooh Naahuur ar dehaay tifriyeet toona Ibraahiim soomamiya.
21 Uusa w'oor usuurkina.
Buusa uusan,
Gumuu'eel (Araami baaba),
22 Kaasidwa,
Haasoowwa,
Fildaash,
Yidlaafwa Batuu'eelwa ikatiin.
23 Batuu'eel Ribeekaab ifri.
Milkaa een y'ar y'asimhay,
Naahuur Ibraahiimiib oosaniib tifri.
24 T'araawtooh Ru'uuma iidna.
Batuuh han ar tifri:
Taabaahwa,
Jaahamwa,
Taahaashwa,
Ma'aakaahwa iidna.