Isehaagiit toofray.
21
01 W'ankwana Saaraay dehaay daayiib iiktiyeet toonaatii,
toona tuwaadiyaayaneet dehaay itkwikw.
02 Ibraahiim eegrimamiya,
laakiin Ukwaasana waadiyaayaab iiktiyeet toos'a Saara tinkwiit oor tifri.
03 Ibraahiim w'oorooh Saara tifriyeeb Isehaag iisim.
04 W'ooruuh Isehaag ifrayeekka w'asimha imb'i,
Ukwaasana diyaa iifi akay Ibraahiim barooh ikwishib.
05 Isehaag ifrayihoob,
Ibraahiim sheeb hawlaab iibri.
06 Saara masi <<Ukwaasana isfaayideheeb,
een bareeh eemsiiwka aree iifiyad indi.>>
tidi.
07 Batuuh masi <<Ibraahiimii deha Saara nisrik kadhishtini aaw diyaabu?
Masi ani barooh umatuuniib oor dehaay afarri han!>>
tidi.
08 W'oor iwin aflaay nugw kadhiib kiiki.
Oomb'i Isehaag oongwii iftakeeb Ibraahiim wint aduuma id'i.
09 Laakiin Saara,
Haajir Tumasri Ibraahiimiib oor tiibri akay batiiyooh faaydee rhita.
10 Oont'a batuuh Ibraahiimii dehaay,
<<Beet tukishiyaawwa w'ooroohwa giigsaa.
Been tukishiyaati oor aniib w'oor Isehaagi geeb kwasaami kiidi.>>
tidi.
11 Ismaa'iil ooroosu akay,
tuun tuuna Ibraahiim winneet tisehas.
12 Laakiin Ukwaasana bariiyooh dehaay,
<<Baruuk w'oorwa tukishiyaatookwa winneet hooy baahasaya.
Saara tindiyeet toona sinaakira,
Isehaag aree indhiwaayeek isuusim indi.
13 W'oorook tukishiyaatiib tifriyeeb han bariiyook oor ikatiyi sabbii,
oon han dehay iikwasi andi.>>
idi.
14 Karuumaab oomb'i ooraaw Ibraahiim m'ariitwa sar yameebwa Haajir yhi.
Igadh'eehwa w'oorwa wharkaay kehii dehaay daasiya.
Batuuhwa w'ooruuhwa giigiyaana.
Aflaay batuuh usalalooh t'abik.
Barsheebaayt tusabbootiib aree hawriikta.
15 Aayam usariib iifiin hooy inhadnihoob,
w'oor hindi whii daasta.
16 Batuuh sagi mhiin tibi.
W'oor yaayee bitshabiibi jillaay aree shib mitir hooy tisgiit tis'a,
winneet aree waawti.
17 Ukwaasana w'oor waawee imaasiw.
Ukwaasanaay umalak Haajir tibreetee waliikiya,
<<Haajir naanaati hook?
Biirikwii!
Ukwaasana w'oor beentooy b'ee waawee imaasiw.
18 W'oor asa singadii,
w'ayi abikii,
gwida dehay iikwasa andi.>>
idi.
19 Malyaab Ukwaasana batooh eegw'ad ingil,
reet yameet aree rhita.
Toori tibaayt oosar yam titib,
w'oor han gw'asta.
20 Ukwaasana w'oori geeb iifi,
aree baruuh iwin.
Baruuh tusabbootiib dhhaniyaat shookanaab akay ikwiir.
21 Baruuh Baaraaneet tusabbootiib ikwiirihoob,
tuundi doobaat Masriit dehaay timri.
M'asgi galad
22 Beenhoob Abiimaalikwa,
Fiikuul udheeshiyuuh daabitwa Ibraahiimii dehaay,
<<Daatniyi shagaayka Ukwaasana geebook eefi.
23 Oont'a baruuk aneebwa y'areewwa,
tidirriyaaytoowwa maagt hoon iid'i bitdiyeet toona dehoon halafooya.
Baruuk tooy girba tak akay geeboon asgaa kwarriya.
Maagt hoon iid'i bitdiyeet toona Ukwaasanaay oosmii dehoon halafooya.>>
idiin.
24 Ibraahiim <<Ani halafooyan>> idi.
25 Malyaab Ibraahiim <<Abiimaalikiib ikishiya reet yameet hoosu iyheen.>>
idiit Abiimaalik ashkiimiya.
26 Laakiin Abiimaalik <<Toon aab id'iyeeb ani kaakan.
Een suur baruuk sooyaayu kitta,
amsi oobhaat eemsiiw.>>
idi.
27 Aflaay Ibraahiim anootwa sh'aabwa haay eeyaayt Abiimaalik yhii.
Aanda imalu aree m'asgi majlis id'iin.
28 Ibraahiim asaramaat arginaat t'anooteesooh waasiya.
29 Abiimaalik Ibraahiim raatiya,
<<Naanhooy een tiweera?>>
idi.
30 Ibraahiim aree <<Toon toori ani afrikeet toona baadehaat akay teen t'argina t'asarama hoosu gabbalama.>>
idi.
31 Toon toonaatii dehaay been whaash Barsheeba itoosaam.
Aanda imalu beentooy hooy halafooyaan akay bak titoosaam.