Ibraahiimwa Abiimaalikwa
20
01 Ibraahiim beentooysii Kan'aaneeb oos'iid ookiik hantaaya.
Shuurwa Gaadishwa eebtik ikwiri.
Shalik midda Jaraareeb yhagit.
02 Beentooy Ibraahiim udehayii dehaay,
<<Saara kwaatootu>> idiit sooya.
Malya Jaraari had'a Abiimaalik Saaraab ugarooyooh dehaay iiyhi.
03 Laakiin Abiimaalik hawaad gaalnaay hawsooteeb Ukwaasana dehaay eeyaayt,
<<D'aart takat tiyha akay iiyyi tindiya.>>
idi.
04 Abiimaalik batooh diwlaab kiiki.
Baruuh <<W'ankwanaay,
gwabab baabari dehay kwidhsi tindiya han?
05 Baruuh <Kwaatootu> diyaa sooyaayoon kiiki han?
Batuuh han <Anii sanu> diyaa sooyaatoon kitti han?
Toon toona ani aweereet nhas akay dhhani gin'ii aweer.>>
idi.
06 Ukwaasana hawsooteeb bariiyooh dehaay,
<<Baruuk nhas ayeewwa dhhani gin'ii tid'iyeet toona akan akay maagtiib dhibsaayook kaaki.
Oon usabbii aree batooh tehasaayook kaaki.
07 Oont'a utakiit takat agiraa!
Baruuh nabiibu dehook siileeli indi,
malya iidhhan tindiya.
Laakiin batooh bit'agiireek baruukwa udehayuukwa iiyyi tiyadna.>>
idi.
08 Karuumaab oomb'i ooraaw Abiimaalik kasseeh idaabtaayeeh waliikiya.
Toona tutikeet kastooh dehaay hadiidiyanihoob,
baraah winneet irkwiina.
09 Malya Abiimaalik Ibraahiim waliikiya,
<<Naan hoon tid'iya?
Naat maag hook d'iyaabuuyt aneebwa tehad'aayeeti bak hoon sakta?
Bak hoosu batsakayeet toonaati.>>
idi.
10 Abiimaalik masi Ibraahiim raatamiya,
<<Baruuk toon haay tid'iyeeb usabab naanaatu?>>
idi.
11 Ibraahiim <<Ani bak haay aweereeb usabab,
oon oomhiin Ukwaasanaay mirkwaay hooy kiihaay,
tutakati sabbii aree dirati y'een miyaadiib een aweer.
12 Batuuh sidik kwaatu baabitu ootu,
laakiin deetu firaat kitti.
Malya aree takatu tiki.
13 Malya aneeb Ukwaasana baabiyu ugawii weer haash beeti isiistoobi har'ii,
ani turaawti sooyan,
<Sidik areetniyeeti,
gwadib rhinayihoob,
uun baruuh anii sanu.>
dii adi.>>
idi Ibraahiim.
14 Malyaab Abiimaalik anootwa,
sh'aabwa,
kishiyaabwa kishiyaatwa Ibraahiim yhi.
Saaraab tutakatooh han dehaay y'agir.
15 Abiimaalik bariiyooh dehaay,
<<Aniib whaash suurook eefi,
kassooh oomhiin baruuk harriiweeb hooy kwiriya!>>
idi.
16 Baruuh Saaraay dehaay,
<<Usanook alif sheekal ashteet ihi.
Kassuuh uudehay geebook eefeen batuuk maagnaayt gwibbaat bitkaayeet toona iikan iyadna.>>
idi.