Aayam ishlikna
8
01 Ukwaasana Noohwa umalaaliit dhhaniyaawwa ooreewwa geeb iifiibwa baadhnaab kiiki.
Toon toonaatii deha baraam toobuuti kehii ifdig,
aayam ishlikna.
02 Oont'a Ukwaasana imhiinan aayam hooy siiwiineeb,
gaal gaalnaay assiya,
teebiri han assiya,
shaawti aayam ingadna.
03 Sheebwa ay tamuunt yinaati har'ii,
aayam diiseet hoogiyaan.
04 Tooyin tutamna asarama ootrig w'asaramaay aayam hoogiyaan,
tumarkab Araaraat ittiyoodi ribaay kehii timhi.
05 Aayam ootrig utamna ookiik igidehana.
Ootrig utamnaay haayeeb irbaayi girma lawiyaan.
06 Fadhig tamuunt yinaati har'ii,
Nooh ishibbaak tumirkabtiib d'iyaab iiktiyeeb ifdig.
07 Baruuh kwiikw'aay linguuya.
Ukwiikw'aay aayam balamyaaneeb ookiik dasooh gidehooh bir'ikiya.
08 Malyaab baruuh aayam igdehaneeb biikaayneeb iishbibee dehaay kwibheeriit ifdig.
09 Tukwibheeri laakiin aayam gwida iifiin akay iragadooh hooy daastiyi mhiin miraat kitti.
Batuuh Nooh beeti tumirkabtii deha t'agar.
Baruuh w'ayooh asa ifir'at tukwibheeri y'abikaayt tumirkabtiib shuumsiya.
10 Baruuh masi asaramaat yina yhagit.
Malya tikwibheeri masi han ifdig id'i.
11 Tukwibheeri bariiyooh deha himniit eetanihoob,
gayi saytuuni hindiit raat uyafiib tiifi.
Been oodoor Nooh aayam dhibiyaaneet toona ikan.
12 Baruuh shaawti asaramaat yina yhagit tukwibheeri t'a han ifdig.
Laakiin oon door oon batuuh bariiyooh dehaay agaart kitti.
13 Nooh asagwir sheebwa gaal hawilwa iibriyihoob,
ootrig w'awwaliinaay haayeeb aayam daayiib toobuuti kehii balamiyaan.
Beenhoob,
Nooh tumirkabtii tikwiyaayt ishbibihoob whaash balamaa rhiya.
14 Tooyin tutagwgwu asarama ootrig umalya aflaay tuubuur daayiib balamta.
15 Ukwaasana Noohii dehaay,
16 <<Baruukwa tutakatuukwa y'araakwa tim'ataahwa tumirkabtii tikwaana!
17 Kasteeh tidhhaniya geebook eefeent fir'a haay m'aa,
eekilaywa,
toobuutiib itrafiifwa,
ooreewwa kasseeh haay m'aa.
Aan baraah shaawti gaguudiin iyadna.>>
idi.
18 Aflaan Noohiit tutakatwa y'araahwa tim'ataahwa tumirkabtii ifr'ana eeyaan.
19 Kassooh ooreewwa,
kasteeh tidhhaniya toobuuti kehii itrafiifwa,
kasteeh teekilaywa,
kasteeh toobuuti kehii hantaayiint taanaawwa tumirkabtii ifr'ana eeyaana.
20 Nooh malyaab W'ankwanaay deha karaamaati mhiin shagaamiya.
Baruuh kassooh ooreew oonhaswa eekilay eenhaswa atoolwaat karaama ikwaas.
21 W'ankwana tikaraama iitlawni door hooy baraamiin,
malya igarooyooh dehaay,
<<Ani shaawti oodehayi sabbii toobuur ata kaadi.
Uudehay kassuuh dibilooyaab akay igin'a maagt ataabtu,
shaawti oont'a ad'iyeet iikwasi kaadi.
Uudehay gwanbiibeet naatiika toobuur oon hallaan hamshuuk tibariinaaka kwidhshaneeb aflaay iiwari kaadi.
22 Tuubuur teefiyeeb ookiik,
aduuywa waakwa iiktiin iyadna,
nab'uuytwa l'anaaywa daayi iyadna.
Hibiitwa mhagaayiibwa daayi iyadna,
b'eebwa hawaadwa daayi iyadna.>>
idi.