Ukwaasana Noohi geeb galad id'i
9
01 Ukwaasana Noohwa y'areehwa baarakiya,
<<Guudaana firiina,
toobuut tabna.
02 Kassuuh uureewwa,
aakilaywa,
buut ranfiifaawwa,
y'aashoowwa bareekna iraakw iyadna.
Kasseeh baraak hukwimeeneeb akwaas.
03 Kastaah taana tidhhaniitwa tehantaayeenwa m'ariit dehookna iiktiin iyadna.
Idaruur suur whiyaayookna akatiyeenaayt,
oont'a han naatka aniiw hookna.
04 Laakiin shaat masi midhhani booy hooy eefiyeet ibakii baatamaana.
05 Shaawti ani ubooyookna dehaay haasabi hookna andi.
Kasteeh tidhhaniya haasabi andi.
Dhhaniit tooraaw tindiir ituudir tindi,
uutak ooraaw indiir han ituudir indi.
06 W'aadami ugarooyu t'iiteeb akay kwaasaabu akay,
taki booy infiif ootakka,
ubooyuuh iitfaf indi.
07 Baraak gwida ar tibariin akeena,
shawaayamaana toobuuti kehii guudaana.>>
idi.
08 Ukwaasana shaawti Noohwa y'areeyoohwa dehaay:
09 <<Oont'a ani bareekwa har'ookna y'eenwa galad dehookna hankwiir.
10 Tidhhaniya kasteeh bariiyook geeb iifiint,
eekilaywa,
ooreewwa,
imalaaliit dhhaniyaawwa,
tumirkabtiib geebook eeyaant kasteeh toobuuti kehii hantaayeent tidhhaniyaawwa,
11 ani galad ahakwir eefi.
Shaawti kasteeh tidhhaniya kwaan iyaay kiidi.
Shaawti oonaay har'ii toobuur kastooh kwidhsiini kwaan daayi kiidi.
12 Tuun tuuna ugalad ani bareek geebwa kasteeh tidhhaniyaawwa geeb ahankwiir,
kassooh oodehay har'ook lawiiniibwa galad dehookna shuumaabi.
13 Oobrii hil'i tibreeteeb d'iyaab akatiyeeb,
bareekwa toobuutiib ikwarriin kasseehwa alaamaat dehaay ikati.
14 Ani kassooh oodoor b'aluuk toobuuti kehii adan'iyeeb oodoorwa oobrii hil'i lawiiniyi doorwa,
ilasooy rhi tiyadna.
15 Ani ugalad bareekwa kasteeh tidhhaniyaati geebwa ahakwireeb beeb sh'ani.
Shaawti yam kwaan ikatiin toobuur kwidhseen daayi kiidiin.
16 Tibreeteeb oobrii whal'i ib'aluukiib lawiiniyi dooriika rhani.
Beenhoob aneebwa toobuuti kehii kwanriinaaki geebwa d'iyaab akatiyeeb ugalad udaayim sh'ani.
17 Tuun tuuna aneebwa toobuuti kehii kwanriinaaki geebwa ad'iyeeb ugaladiit alaama iikti tindi.>>
idi.
Noohwa y'areehwa
18 Noohiib y'ar,
Saamwa,
Haamwa,
Yaafeetwa tumirkabtii ifr'ani eeyaan.
Haam malya Kan'aan iidni oor ifri.
19 Baliin baraah Noohiib y'ar eemhaya.
Uun uudehay amsi eefeen aree bareetooh dirriyaayti.
20 Nooh dir'aat kinaab ikee,
w'inab hindi awwal y'adiib barooh ikati.
21 B'eeb gaal baruuh haab gw'iyani oodoor,
askiryaayt raboobaa ugawiyooh diwiya.
22 Haam,
Kan'aaniib ubaaba,
baabooh rabooba rhiyanihoob,
oogaw ubaaba hooy diwiyeeb hooy ifir'a.
Beet toona aree isanaayeeh sooya.
23 Laakiin Saamwa Yaafeetwa halaak yharkaayeehna kehii id'iiniit,
oogaw tisaratteeh yhiiniit har'a hiireeree shuumiyaan.
Ubaabaay kehii aree halaak daasiyaan.
Aflaay ubaabaay iraboob biishabiibni jillaay gidehooh nakamiyaaniit ugawii ifir'ana.
<<Atoo'itaab iikati Kan'aan!
Isanaayi kishiya ba'iikti.>>
idi.
26 Baruuh masi <<Ukwaasana Saam baarakiiniyeet toona hooy aharriiw.
Kan'aan aree Saami kishiya ikwasiyeena hooy aharriiw.
27 Ani Ukwaasanaay deha sileelani,
Yaafeet gwida haash iniiweena,
malya na Saamiib whaashiib barooh kookiiniyeena,
Kan'aan aree Yaafeeti kishiya ikwasiyeena Ukwaasanaay aharriiw.>>
idi.