Kwaan
7
01 Ukwaasana Noohii dehaay,
<<Toon toobuutiib aneeb anfirhisiiniib barook oobhaatwa akay,
Baruukwa indhiwaakwa tumirkab shuumaana.
02 Baruuk asarama jinsa kassooh ooreew oonhasnaay kwaabwa rabaabwa hooy yaksaa.
Ooreew oonhas baakaynaay han malu jinsa kwaabwa rabaabwa yaksaa.
03 Masi asarama jinsa kasseeh eekilayee,
kwaabwa rabaabwa yaksaa.
Aan baraah malya whaashiib gaguudeen.
04 Amseenee asarama imb'eeyi har'ii fadhig tamuun imb'eewwa hawadwa toobuuti kehii bireeb isiisiyaam andi.
Kasteeh tidhhaniya toobuuti kehii ad'iyeet kwidhsi andi.>>
idi.
05 Nooh kastooh Ukwaasana sooyaneet toona id'i.
06 Tuubuur kwaantanihoob,
Nooh asagwir sheeb hawla iibri.
07 Noohwa tutakatoohwa,
y'araah tim'ateesoohwa,
ukwaanii iidhhanni jillaay tumarkab shuumiyaan.
08 Maloob maloob kassooh ooreew oonhaswa oonhas baakaywa,
eekilaywa,
tidhhaniya kastaah toobuutiib eefeent,
09 kwaabwa rabaabwa ikeeniit Noohi dehaay eeyaan.
Ukwaasana Nooh sooyaneet toonaatiit aree tumirkab shuumiyaan.
10 Asaramaat yinaati har'ii,
uukwaan toobuuti kehii kwaaniya.
11 Noohiib y'asagwir shi timmiimyaaneet tooyin,
oomb'i utamna asarama ootrig umalyaay,
tuubuut yam thawta,
taabiri iyaamna.
12 fadhig tamuunt yina b'eebwa hawaadwa uubri iyaam.
13 Been oomb'i Noohwa y'araah Saamwa,
Haamwa,
Yaafeetwa,
hiddaab tutakatiyooh geebwa mhayt y'areeteeh tim'ati geebwa tumirkab shuumiyaan.
14 Baraah kasteeh tidhhaniya gaatka jinsiisooh,
ooreewwa,
malaaliit dhhaniyaawwa,
eekilaywa,
anbir tibariinaawwa geebooh iiyheen.
15 Nooh shuuk iibriint tidhhaniya kasteesooh kwaabwa rabaabwa geebooh iiyhi.
16 Tumirkab shuumaa iifiint tidhhaniya kasteeh kwaabwa rabaabwa hooy iifiin.
Een bareeh suur Ukwaasana sooyaab akay id'iin.
Malya W'ankwana idheefa kehii assiya.
17 Fadhig tamuun yinaat tuubuur yam kwaanta.
Aayam guudiyaanihoob,
tumirkab asa y'abikna.
18 Aayam tageegiyaan,
winneet toobuuti kehii guudiyaan.
Tumirkab han eeyami kehii beerta.
19 Aan aayam toobuuti kehii winneet tageegiyaan.
Aarba tibireeti whii iifiin kassaah yamee ikwibasna.
20 Aayam akraab tageegiyaan,
eerba itageegaani umhakwal asarama mitra daayaan.
21 Kastooh toobuuti kehii iifiint tidhhaniya:
aakilaywa,
uureewwa,
imalaaliit dhhaniyaawwa,
tidhhaniya t'itrififwa,
uudehaywa kassaah iiyaana.
22 Whaashiib tiifiina hamshuuktiina kastaah iiyaan.
23 Ukwaasana kasteeh tidhhaniya toobuuti kehii iifiint yhatii id'i.
Oodehaywa,
ooreewwa,
kasteeh tidhhaniya toobuuti kehii itrififwa,
teekilaywa kasteeh Ukwaasana iysis id'i.
Noohwa igeeb tumirkabtiib iifiinwa aabhad imhiin.
24 Aayam sheebwa ay tamuun yina kwaaniyaan.