Lupapulo lweke Paulo kwa
Filimooni
Paulo no Timoseo bhalikumuposya Filimooni
1
Lupapulo loolu nyeghile une Paulo, mwighalilwa ku nfūno jhya kutangaasya Sikūla Sisogha syeke Jheesu Kiliisito. Une, hamwi no Timoseo ghwamughana ghwane ghotwisighile kumwi naajhe, tulikukuposya ughwe Filimooni, munywanyi, mukola milīmo mwineetu. 2 Tulikumuposya no mukulwana Afia, no Alikipo, musilikale mwineetu mu kutangaasya Sikūla Sisogha, hamwi na bhahemba bheke Jheesu ^bhakokomenkana mu nyumba mumoobhe.3 Sighōngo na maholo kufuma kwa Taata Kabhumba, no kwa Sifwe Bhusya Jheesu Kiliisito, fibhe hamwi namwe.
Kunyomwa no kwisigha kwajhe Filimooni
4 Mafuku ghonse ghondikubha nendikukutendajhyukila, ndikumusīima Kabhumba, 5 bhukohela ndikuhulika kubha ti ujhililiike kumwisigha Sifwe Bhusya Jheesu no kubhatēha bhahemba bhaajhe bhonse. 6 Ndikumusēegha Kabhumba kubhala kwisigha koobhe hamwi na bhandi, kukufūnaanile kumānya nkana kupambulilwa konse kotuli nako ku kujha bhujhakumwi no Kiliisito. 7 Ghwamughana ghwane ghotwisighile kumwi, ghwandyohya, ghwansīkya mwēgho nkana, bhukohela ghwasangabhasya myēgho jhya bhahemba bheke Jheesu ku kutēha koobhe.
Paulo alikumulebhelesya Filimooni amupokeele kabhili Oneesimo
8 Hamwi ne teetyo, ku managha ghonheebhilwe na Kiliisito, nkobhwele kukulaghiila ukole bhuli ghohenseelwe kukola. 9 Tukubha nandōla ni fisogha nkana inkusēeghe, bhukohela nyinsi kutēha koobhe. Une Paulo, mughosimukulu kabhili mwighalilwa ku nfūno jhya kumwisigha Jheesu Kiliisito, 10 ndikukusēegha kubhala umufūnaanile Oneesimo. Nyene ni mwanaane, bhukohela ku mafuku ghonse ghonjīghaliilwe mwi ighelesya, nankamufūnaanila amwisighe Jheesu. 11 Mu nfuku sya ku nyuma, tyakabheele ghakulyohya, tukubha nonwe alikukulyohya ughwe hamwi none.a
12 Nonwe ndikumuheleesya Oneesimo kumoobhe, singa bhomutēhile ku mwēgho ghwane ghonse. 13 Inatēhe kubha anajhililike kwīkala nane hanu, akulinga alōle mpeghupeghu jhya kunfūnaanila kwi isiina lyobhe bhosiliho, ku mafuku ghaagha ghondi mwi ighelesya ku nfūno jhya Sikūla Sisogha syeke Jheesu. 14 Tukubha nonwe nandōla kubhala, te fisogha kukola lyolyonse bhusila ughwe kunswesya. Nsihensile kukusuntilisya kubha ti nfūnaanile, tukubha ndikuhensa ukole matendeke bhuli ughwe ghwenyene bhotēhile.
15 Hamwi Oneesimo ghakafumanga kumoobhe ku nfuku nse tue, akulinga ubhe naajhe kabhili nfuku syonse. 16 Kusumbulila nonwe unyene te musya bhuhela kumoobhe, tukubha unyene ni ghwamughana bhukohela alisighile kobhe ufwe. Une mutēhile nkana, noghwe ulakumutēha kusumba une. Ulakumutēha kobhe musya ku lugho kumoobhe, kabhili kobhe ghwamughana bhukohela twisighile kumwi kwa Sifwe Bhusya Jheesu.
17 Nonwe kansi, kubha nontembekeesye une kubha ti ndi bhujhakumwi naghwe, mupokeele ghoogho kobhe bhuli bhonampokeele une. 18 No kubha Oneesimo ghakakubhiihya ighāmbo lyolyonse, ajhe ulikumwimukila sintu, njimukile une. 19 Une Paulo, nyeghile na kubhoko kwa kumwane nenyene kubhala, ndokakulīha. Bhombwene nsihensile kukwisukisya kubha ti ndikukwimukila, bhukohela nankakufūnanilanga ughwe umwisighe Kiliisito. 20 Nonwe ughwe uli ghwamughana ghwane, njilile leeli lyondikukusēegha. Ndikukusēegha ughulyohye mwēgho ghwane bhukohela tuli hamwi mu kumwisigha Jheesu.
21 Ndikukunyeghela ghaagha bhukohela nyinsi kubha ti ulakughaswa, kabhili ulokola kusumba bhuli bhonankwighongeela.
22 Hamwi na ghaagho, njōojhisye ha kwīkala, bhukohela nyinsi kubha ti ku kusēegha kwenyu, Kabhumba alakunfūnaanila injise kumwenyu.
Maghāmbo gha kutāahya
23 Epafula, ^ajhīghaliilwe mwi ighelesya kumwi none ku kutenda Sikūla Sisogha syeke Jheesu Kiliisito, alikukuposya. 24 Kabhili bhakola milīmo bhenaane Maaliko, Alisitaliko, Deema no Luuka, bhalikukuposya. 25 Ndikusēegha kubhala sighōngo syeke Sifwe Bhusya Jheesu Kiliisito sibhe hamwi namwe mwense.