20
Wɔ̃ɔ nɔrɔbu
1 Yen biru nɑ kpɑm wɔllun gɔrɑdo goo wɑ u sɑrɑm wee wɔllun di, u wɔru bɔkɔ nɔru sɑriruguu gen kɔkɔrɔ nɛni kɑ yɔni bɛkɛ. 2 U yɑɑ binti binti te sɛ̃re ye yɑ sɑ̃ɑ gɑsɔn wɑɑ ye bɑ mɔ̀ Yibirisi kɑ Setɑm, mɑ u ye bɔkuɑ kɑ yɔni yi, sere wɔ̃ɔ nɔrɔbu. 3 Mɑ gɔrɑdo wi, u ye bɔrie wɔru bɔkɔ ge sɔɔ, u bɛrisi mɑ u yĩreru doke kpɑ yu ku mɑɑ kɑ bwesenu kpuro nɔni wɔ̃ke sere wɔ̃ɔ nɔrɔbu yu kɑ kpe. Yen biruwɑ bɑ koo ye kɛniɑ bu ye kusiɑ sɑɑ fiiko.
4 Nɑ mɑɑ sinɑ kitɑnu wɑ. Be bɑ sɔ̃ nin wɔllɔ bɑ bu yɔllɑɑ kuɑ bu kɑ siribu ko. Nɑ mɑɑ tɔmbun hundebɑ wɑ be bɑ wiru burɑ Gusunɔn gɑri kɑ Yesun seedɑn sɔ̃, kɑ be bɑ ǹ gbeeku yɑɑ ye sɑ̃wɑ ǹ kun mɛ yen weenɑsiɑ, bɑ ǹ mɑɑ wure bɑ n yen yĩreru mɔ ben sirinɔ ǹ kun mɛ ben nɔmɑɔ. Bɑ seewɑ gɔrin di mɑ bɑ bɑndu di kɑ Kirisi sɑnnu wɔ̃ɔ nɔrɔbu. 5 Yeniwɑ yɑ sɑ̃ɑ gɔribun see gbiikibu. N deemɑ, gɔri be bɑ tie bɑ ǹ seewe gɔrin di sere wɔ̃ɔ nɔrɔbu ye, yu kɑ yibu. 6 Doo nɔɔrugibɑ be bɑ bɔnu mɔ see gbiikibu sɔɔ. Bɑ sɑ̃ɑ be bɑ wunɑ nɛnɛm Gusunɔn sɔ̃. Gɔɔ yiruse kun mɑɑ yiiko mɔ be sɔɔ, domi bɑ ko bɑ n sɑ̃ɑwɑ Gusunɔ kɑ Kirisin yɑ̃ku kowobu, bɑ ko n kɑ nùn bɑndu dii wɔ̃ɔ nɔrɔbu.
Bɑ Setɑm tɑbu di
7 Wɔ̃ɔ nɔrɔbu yɑ̀ n yibɑ bɑ koo Setɑm yɔ̃su yen pirisɔm di, 8 yɑ koo yɑri yu dɑ yu hɑnduniɑn bwesenu kpuro nɔni wɔ̃ke ni bɑ mɔ̀ Mɑgɔgu kɑ nin wirugii Gɔgu, kpɑ yu nu mɛnnɑ bu kɑ tɑbu ko. Bɑ koo dɑbiɑ nge nim wɔ̃kun goorun yɑni sɛɛri. 9 Be wee bɑ wee bɑ tɛrie, tem kpuro sɔɔ mɑ bɑ nɑɑnɛ dokeobun sɑnsɑni sikerenɑ kɑ wuu ge Gusunɔ u kĩ. Adɑmɑ u derɑ dɔ̃ɔ u sɑrɑmɑ wɔllun di, mɑ be kpuro bɑ dɔ̃ɔ mwɑɑrɑ. 10 Yerɑ bɑ Setɑm ye yɑ rɑɑ tɔmbu nɔni wɔ̃kuɑ kpɛ̃ɛ dɔ̃ɔ bwerɔ wi u mwɑɑrɑmɔ kɑ sɔ̃ɔ bisu, mì sɔɔ bɑ rɑɑ gbeeku yɑɑ ye kɑ sɔmɔ weesugii wi kpɛ̃ɛ. Miyɑ bɑ koo nɔni swɑ̃ɑ bɑkɑru wɑ wɔ̃kuru kɑ sɔ̃ɔ sɔɔ sere kɑ bɑɑdommɑɔ.
Siri dɑ̃ɑkibu
11 Yerɑ nɑ mɑɑ sinɑ kitɑ kpiki bɑkɑru wɑ kɑ wi u sɔ̃ ten wɔllɔ. Mɑ tem kɑ wɔllɑ dukɑ doonɑ win wuswɑɑn di, yen gɑɑ kun mɑɑ wɑɑrɔ. 12 Yen biru nɑ gɔribu wɑ, bɑkɑ kɑ buu, bɑ yɔ̃ sinɑ kitɑ ten wuswɑɑɔ. Mɑ bɑ tirenu wukiɑ kɑ mɑɑ tireru gɑru te bɑ mɔ̀ wɑ̃ɑrun tireru. Bɑ gɔribu siri nge mɛ ben kookoosu nɛ si bɑ yorusi tire ni sɔɔ. 13 Sɑnɑm mɛyɑ nim wɔ̃ku gɑ kɑ gen gɔribu nɑ, mɑ gɔɔ kɑ gɔribun wɑ̃ɑ yerɑ mɑɑ kɑ begibu nɑ be bɑ rɑɑ nɛni. Mɑ bɑ be kpuro siri nge mɛ ben bɑɑwuren kookoosu nɛ. 14 Yerɑ bɑ gɔɔ kɑ gɔribun wɑ̃ɑ yee te suɑ bɑ kpɛ̃ɛ dɔ̃ɔ bwee te sɔɔ. N deemɑ, dɔ̃ɔ bwee terɑ tɑ sɑ̃ɑ gɔɔ yiruse. 15 Bɑɑwure wìn yĩsiru bɑ ǹ yoruɑ wɑ̃ɑrun tire te sɔɔ, bɑ nùn suɑ bɑ kpɛ̃ɛ dɔ̃ɔ bwee te sɔɔ.