19
1 Yen biru nɑ nɔɔ nuɑ nge tɔn wɔrun wurenu wɔllɔ gɑ nɛɛ, su Gusunɔ bɛsɛn Yinni siɑrɑ. U sɑ̃ɑwɑ fɑɑbɑ kowo, u yiiko kɑ dɑm mɔ. 2 Win siribu sɑ̃ɑ gem bu mɑɑ dɛnde. Domi u kurɔ tɑnɔ kpoko wi siri wi u hɑnduniɑ kpuro sɑnkɑ kɑ win dɑɑ bɛrɛtɛkɛ mɑ u nùn sɛɛyɑsiɑ yèn sɔ̃ u win sɔm kowobu go. 3 Mɑ bɑ kpɑm nɔɔgiru suɑ bɑ nɛɛ, su Gusunɔ siɑrɑ, wuu bɔkɔ gen dɔ̃ɔ wiisu ko n yɔɔmɔwɑ sere kɑ bɑɑdommɑɔ. 4 Yerɑ guro gurobu yɛndɑ nnɛ ye kɑ hunde koni nnɛ ye, bɑ kpunɑ Gusunɔn wuswɑɑɔ mi u sɔ̃ win sinɑ kitɑrɔ, bɑ nùn sɑ̃wɑ bɑ nɛɛ, ɑmi, su Gusunɔ siɑrɑ.
Yɑ̃ɑ kinɛ kpɛndun
kurɔ kpɑɑ tɔ̃ɔ bɑkɑru
5 Sɑnɑm mɛyɑ nɔɔ gɑgɑ mɑɑ nɔɔrɑ sɑɑ sinɑ kitɑru giɑn di gɑ nɛɛ, i Gusunɔ bɛsɛn Yinni siɑro bɛɛ win sɔm kowobu kpuro, bɛɛ be i nùn nɑsie, bɑkɑ kɑ buu. 6 Yerɑ nɑ nɔɔ nuɑ nge tɔn wɔrun wurenu, gɑ sɑ̃ɑ nge surun bɑkɑru ǹ kun mɛ guru gbɑ̃suku bɑkɑnu, gɑ nɛɛ, su Gusunɔ bɛsɛn Yinni dɑm kpurogii siɑrɑ domi u bɑndu di. 7 I de su yɛ̃ɛri kpɑ bɛsɛn nuki yi dorɑ. I de su nùn bɛɛrɛ wɛ̃ domi Yɑ̃ɑ kinɛ kpɛndun kurɔ kpɑɑrɑ tunumɑ, kurɔn tii mɑɑ sɔɔru kpɑ. 8 Bɑ derɑ u yɑ̃ɑ kpiki bɛɛrɛginu sebuɑ ni nu dɛɛre wɑsɑ wɑsɑ. Yɑ̃ɑ bɛɛrɛgii ni, nu sɑ̃ɑwɑ nɑɑnɛ dokeobun kookoo geesu.
9 Yerɑ gɔrɑdo wi, u mɑn sɔ̃ɔwɑ u nɛɛ, ɑ yeni yoruo, doo nɔɔrugibɑ be bɑ dim sokɑ Yɑ̃ɑ kinɛ kpɛndun kurɔ kpɑɑ yerɔ.
U mɑɑ mɑn sɔ̃ɔwɑ u nɛɛ, gɑri yi, Gusunɔn gɑri geen tii tiiwɑ.
10 Yerɑ nɑ yiirɑ win nɑɑsɔ n kɑ nùn sɑ̃, ɑdɑmɑ u nɛɛ, n ku ko mɛ, u sɑ̃ɑwɑ nɛn sɔm kowosi kɑ mɑɑ nɛn berusebu kpurogii be bɑ Yesun gem seedɑ di, n Gusunɔ sɑ̃ɑwɔ.
Domi seedɑ ye bɑ Yesu diiyɑ, yeyɑ yɑ sɑ̃ɑ Gusunɔn sɔmɔbun gɑrin nuuru.
Mɑɑsɔ dum kɑɑgii
11 Nɑ mɑɑ wɑ Gusunɔ wɔllɑ wukiɑrɑ mɑ dum kɑɑ gɑɑ kurɑmɑ. Wi u ye sɔni win yĩsirɑ Gemgii kɑ Bɔrɔkini. Gem sɔɔrɑ u rɑ siri, mɛyɑ u rɑ mɑɑ kɑ tɑbu ko. 12 Win nɔni sɑ̃ɑwɑ nge dɔ̃ɔ yɑrɑ, mɑ u sinɑ furɔ dɑbinu doke win wirɔ. Bɑ yĩsiru gɑru yoruɑ win sirirɔ te goo kun yɛ̃ mɑ n kun mɔ wi turo. 13 U yɑberu sebuɑ te bɑ wɑsɑ yɛm sɔɔ. Win yĩsirɑ Gusunɔn gɑri. 14 Wɔllun tɑbu kowobu bɑ nùn swĩi bɑ dum kɑɑbɑ sɔni, mɑ bɑ yɑbe kpiki bɛɛrɛginu sebuɑ ni nu dɛɛre wɑsɑ wɑsɑ. 15 Win nɔɔn di tɑkobi nɔɔ dorɑgiɑ yɑrɑ ye u koo kɑ tem dɑbinun tɔmbu tɑbu di. U koo bu kpɑrɑ kɑ sii bokuru kpɑ u dɑ̃ɑ binun nim gɑmɑ mɛ mu sɑ̃ɑ Gusunɔ Yinni dɑm kpurogiin mɔru bɑkɑ. 16 Win yɑberɔ kɑ win tɑɑrɔ yĩsi teniwɑ tɑ yoruɑ, sinɑ boko kɑ yinnibun Yinni.
17 Nɑ mɑɑ wɔllun gɔrɑdo goo wɑ u yɔ̃ sɔ̃ɔ sɔɔ. Mɑ u gunɔsu kpuro nɔɔgiru sue si su yɔ̃ɔwɑ sere sere wɔllɔ u nɛɛ, i mɛnnɑmɑ Gusunɔn dim soku yerɔ. 18 I nɑ kpɑ i sinɑmbu kɑ tɑbu sinɑmbun yɑɑ di kɑ tɑbu kowo dɑmgibugiɑ, kɑ dumi kɑ yin mɑɑsɔbugiɑ kɑ sere tɔmbu kpuron yɑɑ, yobu kɑ tii mɔwɔbu, bɑkɑ kɑ buu.
19 Yerɑ nɑ gbeeku yɑɑ ye wɑ kɑ hɑnduniɑn sinɑmbu kɑ ben tɑbu kowobu. Be kpuro bɑ mɛnnɑ bu kɑ wi u dumɑ sɔni mi tɑbu ko kɑ win tɑbu kowobu. 20 Bɑ gbeeku yɑɑ ye mwɑ kɑ sɔmɔ weesugii wi sɑnnu, wi u rɑɑ sɔm mɑɑmɑɑkiginu kuɑ gbeeku yɑɑ yen nɔni biru. Win sɔm mɑɑmɑɑkiginun sɔ̃nɑ u bu nɔni wɔ̃kuɑ be bɑ rɑɑ gbeeku yɑɑ yen yĩreru mɔ, mɑ bɑ yen weenɑsiɑ sɑ̃wɑ. Bɑ gbeeku yɑɑ ye kɑ sɔmɔ weesugii wi kpɛ̃ɛ wɑsi wɑsiru dɔ̃ɔ bweru sɔɔ, wi u mwɑɑrɑmɔ kɑ sɔ̃ɔ bisu. 21 Bɑ ben tɑbu kowobu go kɑ tɑkobi ye yɑ yɑrɑ sɑɑ mɑɑsɔ win nɔɔn di. Mɑ gunɔsu kpuro su ben yɑɑ di su debɑ.