18
Bɑbilonin wɔrumɑɑ
1 Yenin biru nɑ kpɑm wɔllun gɔrɑdo goo wɑ u sɑrɑm wee wɔllun di. U yiiko bɑkɑ mɔ, win burɑm, u bɑllimɔwɑ pɑri pɑri hɑnduniɑ kpuro sɔɔ. 2 U nɔɔgiru suɑ u nɛɛ, yɑ wɔrumɑ, Bɑbiloni bɑkɑ ye, yɑ wɔrumɑ. Yɑ tɛ̃ kuɑ Setɑm bwɑ̃ɑbun wɑ̃ɑ yeru kɑ wɛrɛku kɔ̃su bɑɑgeren kuku yeru kɑ gunɔ bɔrɔnugisu kɑ si su gɔbun wɑ̃ɑ yeru. 3 Domi tem kpuron tɔmbu bɑ yen dɑɑ bɛrɛtɛkɛn tɑm nɔrɑ. Hɑnduniɑn sinɑmbu bɑ kɑ ye kurɔ tɑnɔ kookoosu kuɑ, mɑ hɑnduniɑn tenkubɑ bɑ kuɑ gobigibu yen dɑɑ bɛrɛtɛkɛn kpɑ̃ɑrun sɔ̃.
4 Yerɑ nɑ kpɑm nɔɔ gɑgu nuɑ wɔllun di gɑ nɛɛ, i yɑrimɑ nɛn tɔmbu, i yɑrimɑ yen min di kpɑ i ku kɑ ye yen durum bɔnu ko kpɑ i ku rɑ tii kpɛ̃ɛ yen gbee swɑ̃ɑnu sɔɔ. 5 Domi yen durum yɑ wɔllu girɑri, mɑ Gusunɔ u yen kom kɔ̃sum yɑɑyɑ. 6 I ye kɔsieyo nge mɛ yɑ bɛɛ kuɑ. I ye kɔsieyo nge mɛ yɑ bɛɛ kuɑn nɔn yiru. I yen nɔrɑ yibio kɑ tɑm mɛ mu bɔɔbu nɔn yiru n kere nge mɛ yɑ bɛɛ sɔkɑ. 7 I ye tɔ̃yɑ kɑ nuku sɑnkirɑnu kɔsio, nge mɛ yɑ yen yiiko kɑ dukiɑn doo nɔɔru di. Domi yɑ yen tii sɔ̃ɔwɑ yɑ nɛɛ, wee, yɑ sɔ̃ nge sinɑ boko, yɑ ǹ sɑ̃ɑ gɔmini. Mɛyɑ yɑ ǹ mɑɑ nuku sɑnkirɑnu wɑsi pɑi. 8 Yen sɔ̃, yen gbee swɑ̃ɑrɑ koo ye deemɑ sɔ̃ɔ teerun sɔ̃ɔ, bɑrɑnu kɑ nuku sɑnkirɑnu kɑ mɑɑ gɔ̃ɔru, kpɑ yu dɔ̃ɔ mwɑɑrɑ muku muku. Domi Yinni Gusunɔ wi u ye siri u sɑ̃ɑ dɑmgii.
9 Hɑnduniɑn sinɑmbu kpuro be bɑ kɑ ye kurɔ tɑnɔru kɑ dɑɑ bɛrɛtɛkɛ kuɑ bɑ koo swĩ, bɑ koo weeweenu ko yen sɔ̃, sɑnɑm mɛ bɑ yen dɔ̃ɔ mwɑɑrɑbun wiisu mɛɛrɑ. 10 Bɑ ko bɑ n yɔ̃ n dɛsire yèn sɔ̃ bɑ yen nɔni swɑ̃ɑrun bɛrum mɔ, kpɑ bu nɛɛ, Bɑbiloni wuu bɔkɔ dɑmguu, ɑ kɑm kuɑ, ɑ kɑm kuɑ. Kɔbi tiɑ sɔɔrɑ siribu nun di.
11 Hɑnduniɑn tenkubɑ bɑ koo ye swĩisi kɑ nuku sɑnkirɑnu yèn sɔ̃ goo kun mɑɑ ben kiɑnu dwemɔ 12 ni nu sɑ̃ɑ wurɑ kɑ sii geesu kɑ kpee gobi bɛkɛginu kɑ goo kpikinu kɑ bekɑ ye bɑ kuɑ kɑ wɛ̃ɛ dɑmgii, kɑ ni bɑ kuɑ kɑ kɔrɔnnɔ kɑ beku mɑri mɑrinu kɑ mɑɑ beku wunɔmginu. Goo kun mɑɑ dɑ̃ɑ gobigiɑ dwemɔ kɑ yɑbu bwese bwesekɑ ye bɑ kuɑ kɑ suunu donnu kɑ dɑ̃ɑ yĩsinuginu kɑ sii gɑndu kɑ sisu kɑ kpee kpikinu, 13 kɑ mɑɑ dɑ̃run kokosun buuru te bɑ mɔ̀ kɑnɛli, kɑ kpee yɑ̃nu kɑ turɑre kɑ gum mɛ bɑ mɔ̀ miru, kɑ gum swɑ̃m kɑ tɑm kɑ gum kɑ som kɑ ɑlikɑmɑ kɑ nɛɛ kɑ yɑ̃ɑnu kɑ dumi kɑ yin kɛkɛbɑ kɑ mɑɑ tɔmbun tii. 14 Mɑ tenku be, bɑ ye sɔ̃ɔwɑ bɑ nɛɛ, gɑ̃ɑ geenu kpuro ni ɑ rɑ rɑɑ kɑ̃ nu n sɑ̃ɑ wunɛginu nu nun doonɑri, wunɛn dukiɑ kɑ gɑ̃ɑ burɑnu kpuro nu nun nɔmɑ yɑnde, tɔnu kun mɑɑ ni wɑsi pɑi. 15 Gɑ̃ɑnu kpuron tenkubɑ be bɑ yen sɔ̃ kuɑ dukiɑgibu, bɑ koo yɔ̃rɑ n tonde, bɑ n sumɔ bɑ n weeweenu mɔ̀ yen nɔni swɑ̃ɑrun bɛrum sɔ̃ 16 bɑ n mɔ̀, wee, wuu bɔkɔ ge, gɑ kɑm kuɑ ge gɑ rɑɑ tii burɑru bɛrɑ kɑ yɑ̃ɑ ni bɑ kuɑ kɑ wɛ̃ɛ dɑmgii kɑ ni bɑ kuɑ kɑ kɔrɔnnɔ kɑ beku wunɔmginu kɑ sere mɑɑ wurɑbɑ kɑ kpee gobi bɛkɛginu kɑ goo kpikinu. 17 Mɑ kɔbi tiɑ sɔɔ gen dukiɑ kpuro yɑ kɑm kuɑ.
Goo nimkusu kpuron wirugibu kɑ be bɑ duɑ sɔɔ kɑ goo nimkusun sɔm kowobu kɑ be kpuro gesi be bɑ dim wɑɑmɔ nim wɔ̃ku sɔɔ, bɑ yɔ̃rɑ bɑ dɛsire 18 bɑ nɔɔgiru suɑ ye bɑ wuu gen dɔ̃ɔ mwɑɑrɑbun wiisu wɑ bɑ nɛɛ, wuu gɑgu mɑɑ sɑri nge wuu bɔkɔ geni. 19 Bɑ tii yɑnim wisimɔ winɔ bɑ sumɔ kɑ nuku sɑnkirɑnu bɑ nɔɔgiru mɔ̀ bɑ mɔ̀, wuu bɔkɔ ge, gɑ kɑm kuɑwɑ. Gen dukiɑwɑ be bɑ goo nimkusu mɔ bɑ kɑ kuɑ gobigibu. Mɑ kɔbi tiɑ sɔɔ ye kpuro yɑ kuɑ bɑnsu.
20 Wɔllu, ɑ gɔ̃ru doro wuu gen sɔ̃. Bɛɛ mɑɑ nɑɑnɛ dokeobu kɑ gɔrobu kɑ Gusunɔn sɔmɔbu, i gɔ̃ru doro yèn sɔ̃ Gusunɔ u gu siri ye gɑ bɛɛ kuɑn sɔ̃.
21 Yerɑ wɔllun gɔrɑdo dɑmgii goo kperu suɑ tɑ kɑ nɛɛ bɑkɑru nɛ mɑ u tu sure nim wɔ̃ku sɔɔ u nɛɛ, nge mɛyɑ bɑ Bɑbiloni wuu bɔkɔ ge surɑ temɔ kɑ dɑm, gɑ ǹ mɑɑ wɑɑrɔ pɑi. 22 Bɑ ǹ koo mɑɑ mɔrɔkunun swĩi nɔ wunɛn mi kɑ wom kowobu kɑ gɑɑsirɑnu kɑ kɔbi. Bɑ ǹ koo mɑɑ sɔm bwese bwesekɑn kowobu wɑ, bɑ ǹ koo mɑɑ nɛɛ te bɑ nɑmmɔn dɑmu nɔ. 23 Bɑ ǹ mɑɑ fitilɑn yɑm bururɑm wɑsi mi, bɑ ǹ mɑɑ kurɔ kpɑɑ durɔbu kɑ kurɔ kpɑobun nɔɔ nɔɔmɔ. Wunɛn tenkubɑrɑ bɑ rɑɑ dɑm bo hɑnduniɑ girɑ sɔɔ, mɑ ɑ kɑ wunɛn dobo dobo tem kpurogibu nɔni wɔ̃kuɑ.
24 Bɑ mɑɑ Gusunɔn sɔmɔbun yɛm kɑ nɑɑnɛ dokeobugum wɑ wunɛ sɔɔ kɑ be kpuron yɛm gesi be bɑ go hɑnduniɑ kpuro sɔɔ.